សម្រាប់ការប្រកួតជម្រុះលើកទី២ នៃព្រឹត្តិការណ៍ប្រដាល់ដណ្ដើមខ្សែក្រវាត់ខារ៉ាបាវរដូវកាលទី៧ ទម្ងន់៦០គីឡូក្រាមនៅលើសង្វៀនSEA-TV កាលពីរសៀលថ្ងៃទី២២ ខែកញ្ញា ឆ្នាំ២០១៨នោះ ឃីម បូរ៉ា អ្នកប្រដាល់កម្ពុជាក្លិបរស្មីភូមិគាបខេត្តបន្ទាយមានជ័យ និងសុខ សាវិន ក្លិបឆ្មាសែនសុខគុនខ្មែរ រកបាន៣ពិន្ទុបន្ថែមដូចគ្នា។
ឃីម បូរ៉ា បានវាយឈ្នះអ្នកប្រដាល់ថៃ Phat Maha ក្នុងទឹកទី២ ហើយសុខ សាវិន បានប្រើពេលមិនដល់បីទឹកទេ ផ្តួលអ្នកប្រដាល់ថៃ Phat Chhayak Phum អោយសន្លប់ក្នុងទឹកទី៣ ។
ដូច្នេះ ឃីម បូរ៉ា និង សុខ សាវិន អ្នកប្រដាល់កម្ពុជាយើង ដែលថិតក្នុងពូលA(ពូលខ្មែរ) ពួកគេទាំងពីររកបាន៦ពិន្ទុម្នាក់ដូចគ្នាក្នុងជម្រុះពីរលើកនេះ ដោយឈ្នះទាំងពីរលើក ហើយ Phat Maha និង Phat Chhayak Phum បាន២ពិន្ទុម្នាក់សម្រាប់ការប្រកួតជម្រុះ២លើកនេះ ។
សូមបញ្ជាក់ថា ការប្រកួតជើងឯកខារ៉ាបាវរដូវកាលទី៧ ទម្ងន់៦០គីឡូក្រាមលើកនេះ មានអ្នកប្រដាល់ខ្លាំងៗចំនួន ៨ រូប ចូលរួមប្រកួត គឺខ្មែរ៤នាក់ ថៃ៤នាក់ ។ អ្នកប្រដាល់ខ្មែរទាំង៤នាក់នោះ រួមមានឃីម បូរ៉ា ក្លិបរស្មីភូមិគាបខេត្តបន្ទាយមានជ័យ , សុខ សាវិន ក្លិបឆ្មាសសែនសុខគុនខ្មែរ , លី ភា ក្លិបសំរោងកោងខេត្តបាត់ដំបង និងសូត្រ ខេវិន ក្លិបបក្សីស្លាបដែក។ ឯ អ្នកប្រដាល់ថៃ ៤ នាក់វិញ មាន Phat ChhayakPhum , Phat Maha , Phat Ngenthong និង Phat Thana ៕
ជម្រុះជុំចុងក្រោយដណ្តើមប្រាក់លានទម្ងន់៦៥គ.ក្រ ៖ ហុងជីវ៉ុងបោះបង់ការប្រកួត, មុត ខ្លឹមខ្មៅ ឈ្នះ ធឿន ធី
ព្រឹត្តិការណ៍ប្រកួតប្រដាល់ជម្រុះដណ្តើមប្រាក់១០លានរៀល របស់ក្រុមហ៊ុនស្រាបៀរGanzberg ក្នុងប្រភេទទម្ងន់៦៥គីឡូក្រាម នៅលើសង្វៀនទូរទស្សន៍អាស៊ីអាគ្នេយ៍ សម្រាប់សប្តាហ៍ទី៨ យប់ថ្ងៃទី២២កញ្ញា២០១៨ ដែលជាការប្រកួតជុំចុងក្រោយនោះ ហុង ជីវ៉ុង អ្នកប្រដាល់ក្លិបមិត្តប៉ូលីស បានបោះបង់ចោលការប្រកួត ធ្វើអោយប៊ី ចាន់ណា អ្នកប្រដាល់ក្លិបមហិទ្ធរិទ្ធមេសរថ្ងកខេត្តស្វាយរៀង ឈ្នះដោយស្វ័យប្រវត្តិ ហើយមួយគូទៀត មុត ខ្លឹមខ្មៅ អ្នកប្រដាល់ក្លិបមកុដរាជសីហ៍ បានវាយឈ្នះ ធឿន ធី អ្នកប្រដាល់ក្លិបអង្គរមានជ័យខេត្តសៀមរាប ដោយពិន្ទុ ។
នន់ ជំនិត ឈ្នះ Julien ឯ ផាន់ គ្រាន់ ចាញ់ Yuok Phit
នន់ ជំនិត អ្នកប្រដាល់ក្លិបស្វាយរលំឫទ្ធីជ័យ បានវាយឈ្នះអ្នកប្រដាល់បានរាំងJulie n ក្នុងទឹកទី៤ ក្នុងការជួបប្រកួតគ្នា នាយប់ថ្ងៃសៅរិ៍ទី២២កញ្ញា២០១៨ នៅលើសង្វៀនGanzberg Top Fighter របស់SEA-TV ។
អ្នកប្រដាល់បារាំងJulien ត្រូវជំនិត វាយកែងបែកហូរឈាមខ្លាំងរំខានដល់ការប្រកួត ដែលធ្វើឲ្យគ្រូពេទ្យសម្រេចបញ្ឈប់រូបគេលែងអោយបន្តការប្រកួតទៀត ព្រោះខ្លាចមានគ្រោះថ្នាក់ធ្ងន់ធ្ងរជាងនេះទៀត ។
នេះជាលើកទី០៦ ក្នុងចំណោម១០លើករបស់នន់ជំនិត ដែលបានវាយអ្នកប្រដាល់បរទេស ។ Julienកាលពីថ្ងៃទី០១កញ្ញា នៅលើសង្វៀនSEATVនេះ គេបានវាយឈ្នះជើងចាស់ហេង សំរាំង ដោយពិន្ទុ តែមកជួបជើងចាស់នន់ ជំនិត គេទៅមិនរួចជាមួយកែងជំនិតដែរដែលធ្វើអោយចាញ់ក្នុងទឹកទី៤ ។
ចំពោះ អ្នកប្រដាល់ជើងខ្លាំងផាន់ គ្រាន់ ក្លិបពុទ្ធសេរីវង្សកីឡា បានប្រកួតចាញ់អ្នកប្រដាល់ថៃYuok Phit ដោយពិន្ទុ បន្ទាប់ពីវាយគ្នា៥ទឹកពេញនោះ ។ ពួកគេទាំងពីរ ប្រកួតគ្នាក្នុងទម្ងន់៦៣,៥០០គីឡូក្រាម៕
Source: Kampuchea Thmey Daily
0 Comments