ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជាបានថ្លែងទៅកាន់អង្គការសហប្រជាជាតិថា ព្រោះតែមហិច្ឆតាជ្រៀតជ្រែកកិច្ចការផ្ទៃក្នុងរបស់កម្ពុជាមជ្ឈដ្ឋានខាងក្រៅបន្តធ្វើជាមើលមិនឃើញនូវគុណភាពនិងសុច្ចរិតភាពនៃការបោះឆ្នោតនៅកម្ពុជា។
សម្តេចតេជោបានប្រាប់ទៅវេទិកាអន្តរជាតិមួយនេះថា ការព្យាយាមមិនទទួលស្គាល់លើការបោះឆ្នោតនេះ ជាការប្រមាថដ៏ធ្ងន់ធ្ងរលើឆន្ទៈរបស់ប្រជាពលរដ្ឋខ្មែរ។
សម្តេចតេជោ ហ៊ុន សែន បានរំលេចបែបនេះ នៅក្នុងសេចក្តីថ្លែងការណ៍ដែលបានថ្លែងនៅក្នុងកិច្ចប្រជុំទូទៅនៃមហាសន្និបាតអង្គការប្រជាជាតិលើកទី៧៣ នៅក្នុងទីស្នាក់ការអង្គការសហប្រជាជាតិនាវេលាម៉ោងជាង១រំលងអធ្រាត្រថ្ងៃទី២៩ ខែកញ្ញា ឆ្នាំ២០១៨នេះ ម៉ោងនៅកម្ពុជា ដែលត្រូវនឹងម៉ោងជិត២រសៀលថ្ងៃទី២៨ ខែកញ្ញា ម៉ោងនៅទីក្រុងញូវយ៉ក សហរដ្ឋអាមេរិក។
នៅចំពោះមុខមន្ត្រីអង្គការសហប្រជាជាតិ និងមេដឹកនាំបណ្តាប្រទេសនានាដែលបានចូលរួមក្នុងមហាសន្និបាតអង្គការសហប្រជាជាតិនោះ សម្តេចនាយករដ្ឋមន្ត្រីបានលើកបង្ហាញពីដំណើរការបោះឆ្នោតជ្រើសតាំងតំណាងរាស្ត្រនីតិកាលទី៦ ធ្វើឡើងកាលពីថ្ងៃទី ២៩ ខែកក្កដា ឆ្នាំ២០១៨កន្លងទៅប្រកបដោយភាពល្អប្រសើរ។
សម្តេចតេជោបានថ្លែងថា «ការបោះឆ្នោតកន្លងទៅមានប្រជាពលរដ្ឋចេញទៅបោះឆ្នោតជិត ៧លាននាក់ ឬស្មើនឹង ៨៣,០២ភាគរយ នៃចំនួនអ្នកចុះឈ្មោះបោះឆ្នោតសរុប។ សម្តេចនាយករដ្ឋមន្ត្រី បានបន្ថែមទៀតថា ប្រជាពលរដ្ឋកម្ពុជាបានចេញទៅបោះឆ្នោត និង បានសម្រេចយកនូវជម្រើសនយោបាយរបស់ពួកគេដោយសេរី និងដោយគ្មានការបង្ខិតបង្ខំ ឬ ការគំរាមកំហែង ឬអំពើហិង្សាណាមួយនោះឡើយ។
គណបក្សនយោបាយចំនួន២០បានចូលរួមប្រកួតប្រជែងក្នុងការបោះឆ្នោតដែលជាការបង្ហាញយ៉ាងច្បាស់ នូវភាពជាតំណាងស្របច្បាប់នៃនយោបាយពហុនិយម និង ឆ្លុះបញ្ចាំងនូវអ្វីដែលអ្នកសង្កេតការណ៍ជាតិ និងអន្តរជាតិរាប់ម៉ឺននាក់បានបរិយាយថា ជាដំណើរការលទ្ធិប្រជាធិបតេយ្យប្រកបដោយស្ថិរភាពនៅកម្ពុជា និងជាការបោះឆ្នោតមានលក្ខណៈសេរី យុត្តិធម៌និងអាចជឿទុកចិត្តបាន»។
សម្តេចតេជោ ហ៊ុន សែន បានបន្តថា « តាមរយៈសន្លឹកឆ្នោតរបស់ពួកគេប្រជាជនកម្ពុជាបានបញ្ជាក់ជាថ្មីទៀតនូវបំណងប្រាថ្នាចង់បាននូវសុខសន្តិភាព ស្ថិរភាព និង ការអភិវឌ្ឍប្រកបដោយចីរភាពជាប់មិនដាច់។ ជាការពិតជម្រើសដោយសេរីរបស់ប្រជាជនកម្ពុជានិងលទ្ធផលប្រកបដោយធម្មានុរូបនៃការ បោះឆ្នោតនេះមិនមែនជាប្រធានបទដែលត្រូវចោទសួរឬពិភាក្សាដេញដោលនោះទេ»។
សម្តេចតេជោ ហ៊ុន សែន ក៏បានធ្វើការរិះគន់ចំពោះបណ្តាប្រទេសធំៗដែលតែងប្រើអំណាចដោយកម្រោលរបស់រដ្ឋមួយដើម្បីបន្តុបឆន្ទៈរបស់ខ្លួនទៅលើរដ្ឋអធិបតេយ្យដទៃ។ សម្តេចបន្តថា បើទោះបីការបោះឆ្នោតនេះបានប្រព្រឹត្តទៅក្នុងស្ថានភាពល្អប្រសើរយ៉ាងណាក្តី តែក៏នៅតែមានប្រទេសមួយចំនួនដែលប៉ុនប៉ងជ្រៀតជ្រែកការងារផ្ទៃក្នុងរបស់កម្ពុជា នៅតែធ្វើជាមើលមិនឃើញនូវភាពល្អប្រសើរនៃការបោះឆ្នោតនេះ។
សម្តេចតេជោនាយករដ្ឋមន្ត្រីបានបន្តថា «មជ្ឈដ្ឋានខាងក្រៅមួយចំនួនដែលចិញ្ចឹមជាប់នូវមហិច្ឆតាប៉ុនប៉ងជ្រៀតជ្រែកចូលកិច្ចការផ្ទៃក្នុងរបស់កម្ពុជានៅតែធ្វើជាមើលមិនឃើញនូវគុណភាព និង សុចរិតភាពនៃដំណើរការបោះឆ្នោតរបស់យើងតាមរយៈការចេញសេចក្តីថ្លែងការណ៍នានាប្រឆាំងនឹងឬវាយប្រហារ លើលទ្ធផលបោះឆ្នោតនេះដែលទង្វើនេះ គឺជាការប្រមាថធ្ងន់ធ្ងរចំពោះឆន្ទៈរបស់ប្រជាជនកម្ពុជា»។
សម្តេចតេជោនាយករដ្ឋមន្ត្រីក៏បានទាញអារម្មណ៍អ្នកចូលរួមក្នុងមហាសន្និបាតអង្គការសហប្រជាជាតិអំពីសារៈសំខាន់នៃធម្មនុញ្ញអង្គការសហប្រជាជាតិដោយសម្តេចបានលើកឡើងថា វាអាស្រ័យលើយើងទាំងអស់គ្នានៅក្នុ្ងការផ្តល់ការគោរពដ៏ត្រឹមត្រូវចំពោះធម្មនុញ្ញដ៏មានសារៈសំខាន់នេះ ដោយត្រូវចៀស វាងការជ្រៀតជ្រែក ,ការធ្វើឲ្យអន្តរាយ ឬការរំខានដល់ការកិច្ចការអធិបតេយ្យរបស់រដ្ឋឯករាជ្យ។
ជាមួយនេះ សម្តេចតេជោនាយករដ្ឋមន្ត្រីបានសំដែងនូវការសោកស្តាយជាពន់ពេកចំពោះការរំលេច នូវតថភាពដែលថា សិទ្ធិមនុស្សនាពេលបច្ចុប្បន្ននេះបានទៅជា« បេសកកម្មដើម្បីបំពាក់អរិយធ៌ម»សម្រាប់ប្រទេសមានអំណាចមួយចំនួន ឬ ក៏អាចនិយាយបានថា ជានិយាមប្រតិបត្តិថ្មីដែលគេយកធ្វើជាលេសសម្រាប់លូកដៃជ្រៀតជ្រែកការងារផ្ទៃក្នុងរបស់ប្រទេសដទៃ។
សម្តេចតេជោថ្លែងថា « ការដាក់ទណ្ឌកម្មជាឯកតោភាគីបានក្លាយទៅជាអាវុធដ៏ពេញនិយមនៃប្រទេសមហាអំណាចនៅក្នុងការគ្រប់គ្រងនយោបាយអន្តរជាតិ ដែលស្ថិតនៅក្រោមរបៀបវារៈភូមិសាស្ត្រនយោបាយ។ ទាំងនេះគឺគ្មានអ្វីក្រៅពីការប្រើអំណាចដោយកម្រោលរបស់រដ្ឋមួយ ដើម្បីបន្តុបឆន្ទៈរបស់ខ្លួនទៅលើរដ្ឋអធិបតេយ្យដទៃនោះឡើយ»។
សម្តេចប្រមុខរាជរដ្ឋាភិបាលកម្ពុជាបានលើកឡើងថា សម័យកាលចក្រពត្តិនិយម និង អាណានិគមនិយមសម្រាប់ពិភពលោកវាបានក្លាយទៅជាព្រឹត្តិការណ៍ប្រវត្តិសាស្ត្រទៅហើយ។ ដូច្នេះប្រទេសធំៗមិនគួរដាក់បន្តុបប្រព័ន្ធគ្រប់គ្រងរដ្ឋបាលរបស់ពួកគេមកលើប្រទេសនានាដែលតូចជាងខ្លួននោះឡើយ ព្រោះប្រទេសតូចៗទាំងនេះក៏មានអធិបតេយ្យភាពនិងមានសេចក្តីប្រាថ្នាស្របច្បាប់ក្នុងការរក្សានូវអត្តសញ្ញាណរបស់ខ្លួន។
សម្តេចនាយករដ្ឋមន្ត្រីបានគូសបញ្ជាក់ដែរថា សម័យកាលបច្ចុប្បន្ននេះជាសម័យកាលដែលប្រទេសទាំងអស់នៅលើពិភពលោកពឹងផ្អែកគ្នាទៅវិញទៅមកហើយផ្នត់គំនិតចាប់បង្ខំដ៏ចាស់គំរឹលនោះ គួរតែត្រូវបានបានបញ្ចប់។ សម្តេចតេជោ ហ៊ុន សែន បានសង្កត់ធ្ងន់ថា ប្រទេសតូច ប្រទេសធំ ត្រូវតែរួមគ្នាគោរព និងលើកតម្កើងវិធាននៃច្បាប់អន្តរជាតិ និងធម្មនុញ្ញអង្គការសហប្រជាជាតិដែលចែងពីការគោរពគ្នា និងមិនជ្រៀតជ្រែកគ្នានោះ៕
Source: Kampuchea Thmey Daily
0 Comments