ក្រុមប្រឹក្សាសន្តិសុខអង្គការសហប្រជាជាតិបានអនុម័តជាឯកច្ឆន្ទនូវសេចក្ដីសម្រេចមួយ ដោយអំពាវនាវឲ្យមានបទឈប់បាញ់ និងការដោះស្រាយនយោបាយនៅក្នុងប្រទេសស៊ីរី។ សេចក្ដីសម្រេចនេះមានទស្សនវិស័យអំពីការបង្កើតរដ្ឋាភិបាលរួបរួមមួយ និងបានអំពាវនាវឲ្យបញ្ឈប់ជាបន្ទាន់នូវការវាយប្រហារលើគោលដៅស៊ីវិល។
ក្រុមដែលដកចេញពីបទឈប់បាញ់នេះគឺមានក្រុមរដ្ឋឥស្លាមនិងរណសិរ្ស Al-Nusra ដែលជាសាខារបស់ក្រុមអាល់កៃដាក្នុងប្រទេសស៊ីរី។
សេចក្ដីសម្រេចនេះក៏បានស្នើឲ្យអង្គការសហប្រជាជាតិកោះប្រជុំពិភាក្សាជាផ្លូវការផងដែរ លើរដ្ឋាភិបាលអន្តរកាលមួយ។ កិច្ចពិភាក្សារវាងរបប និងក្រុមប្រឆាំងត្រូវបានកំណត់គោលដៅនៅដើមខែមករា។
សេចក្ដីសម្រេចនេះបានសម្ដែងនូវការគាំទ្រចំពោះដំណើរការនយោបាយដឹកនាំដោយស៊ីរីមួយ ដែលនឹងបង្កើតអភិបាលកិច្ចបញ្ចូលគ្នា និងការមិនប្រកាន់និកាយនៅក្នុងរយៈពេលប្រាំមួយខែ ហើយកំណត់ពេលវេលាសម្រាប់ដំណើរការមួយក្នុងការធ្វើសេចក្ដីព្រាងរដ្ឋធម្មនុញ្ញថ្មីជាមួយគោលបំណងរៀបចំការបោះឆ្នោតដ៏ត្រឹមត្រូវក្នុងរយៈពេល១៨ខែ។
បន្ទាប់ពីសេចក្ដីសម្រេចនេះបានអនុម័ត រដ្ឋមន្ត្រីការបរទេសអាមេរិកលោក John Kerry ដែលជាប្រធានកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិបានឲ្យដឹងថា វាគឺជាពេលវេលា ដើម្បីបញ្ចប់ការទម្លាក់គ្រាប់បែកដោយមិនរើសមុខ ការធ្វើទារុណកម្ម និងការបង្ហូរឈាមនៅក្នុងប្រទេសស៊ីរី។
ជាមួយគ្នានោះរដ្ឋមន្ត្រីក្រសួងការបរទេសរុស្ស៊ីលោក Sergei Lavrov បានកត់សម្គាល់ថា ផែនការទីក្រុង Vienna គឺជាវិធីតែមួយគត់ ដើម្បីនាំបុគ្គលបរទេសទាំងអស់មកកាន់តុពិភាក្សា និងធានាបាននូវដំណោះស្រាយដ៏សមរម្យមួយនៅក្នុងប្រទេសស៊ីរីតាមរយៈការចរចា។
លោក Lavrov បាននិយាយថា “មានតែការចរចាដឹកនាំដោយស៊ីរីប៉ុណ្ណោះ ដែលអាចបញ្ចប់ការរងទុក្ខវេទនាយ៉ាងខ្លាំងនៅក្នុងប្រទេសនេះ”។ លោកបានសង្កត់ធ្ងន់ថា ប្រទេសស៊ីរីគួរតែជាប្រទេសដែលមិនមានការប្រកាន់សាសនា បង្រួបបង្រួម និងពហុជនជាតិភាគតិច។
លោកបាននិយាយទៀតថា “មានតែប្រជាជនស៊ីរីប៉ុណ្ណោះ ដែលត្រូវសម្រេចចិត្តលើអនាគតរបស់ពួកគេរួមទាំងជោគវាសនារបស់លោកប្រធានាធិបតី អាសាដ ផងដែរ”។
បើយោងតាមលោក Lavrov បានឲ្យដឹងថា “ដំណោះស្រាយនេះបានសង្កត់ធ្ងន់ពីតម្រូវការក្នុងការផ្តល់ជំនួយមនុស្សធម៌ដល់ប្រជាជនស៊ីរី។ វាត្រូវតែត្រូវបានផ្តល់ដោយអនុលោមតាមគោលការណ៍ណែនាំរបស់អង្គការសហប្រជាជាតិ ដែលបានចែងនៅក្នុងសេចក្ដីសម្រេចរបស់មហាសន្និបាត និងការសម្រេចចិត្តរបស់ក្រុមប្រឹក្សាសន្តិសុខ”។
រដ្ឋមន្ត្រីការបរទេសមកពី១៨ប្រទេសព្រមទាំងតំណាងអង្គការសហប្រជាជាតិ និងសម្ព័ន្ធអារ៉ាប់បានជួបប្រជុំគ្នានៅទីក្រុង ញូវយ៉ក កាលពីថ្ងៃសុក្រ ដើម្បីជំរុញឲ្យមានផែនការប្រទេសស៊ីរី។ ក្រុមនេះបានជួបប្រជុំគ្នាពីរដងរួចទៅហើយនៅទីក្រុង Vienna ក្នុងរយៈពេលប្រាំមួយសប្ដាហ៍មុន ហើយបានព្រាងផែនការមួយសម្រាប់ការផ្សះផ្សាជម្លោះនៅស៊ីរី។
ក្រៅពីអង្គការសហប្រជាជាតិ និងសម្ព័ន្ធអារ៉ាប់ ក្រុមនេះរួមមានប្រទេសរុស្ស៊ី សហរដ្ឋអាមេរិក សហភាពអឺរ៉ុប អង់គ្លេស អាល្លឺម៉ង់ បារាំង ចិន អេហ្ស៊ីប ហ្សកដានី អ៊ីរ៉ង់ អ៊ីរ៉ាក់ អ៊ីតាលី កាតាលីបង់ អារ៉ាប់រួម អារ៉ាប៊ីសាអ៊ូឌីត និងទួរគី។
ទោះបីជាយ៉ាងណាក៏ដោយ ការអំពាវនាវថ្មីឲ្យលោក បាសា អាល់អាសាដ ចុះចេញពីតំណែងត្រូវបានគេឮក្នុងអំឡុងពេលកិច្ចប្រជុំនេះ ដោយមានការលើកឡើងថា ការចាកចេញរបស់ប្រធានាធិបតីស៊ីរីរូបនេះនឹងជួយសម្រួលដល់ការប្រយុទ្ធប្រឆាំងជាមួយក្រុមភេរវកម្ម។
គួរបញ្ជាក់ថា ជម្លោះក្នុងប្រទេសស៊ីរីបានអូសបន្លាយអស់រយៈពេលជាងបួនឆ្នាំមកហើយ ខណៈដែលមនុស្សជាង ៣០០.០០០ នាក់ត្រូវបានសម្លាប់៕
RT
ក្រុមប្រឹក្សាសន្តិសុខអង្គការសហប្រជាជាតិអនុម័តជាឯកច្ឆន្ទ ចំពោះសេចក្ដីសម្រេចផែនការស៊ីរី
0 Comments