ប្រកួត​នៅ​កីឡដ្ឋាន AEU Sport Park របស់​អាស៊ី​អឺរ៉ុប​ក្នុង​ពានរង្វាន់​លី​គ​កំពូល​កម្ពុជា ត្រូវ​ប្តូរ​ទីលាន​ដោយសារ​ទឹកជំនន់

កីឡដ្ឋាន​AEU Sport Park របស់​ក្លិប​បាល់ទាត់​អាស៊ី​អឺរ៉ុប​យូ​ណាយ​ធី​ត ត្រូវ​បាន​ទឹក​លិចលង់​ពី​ទឹកទន្លេ កាល​ពី​ពេល​ថ្មីៗ​នេះ ហើយ​គ្រោះធម្មជាតិ​នេះ​បាន​ធ្វើ​ឲ្យ​ប៉ះពាល់​ខ្លាំង​ដល់​ស្មៅ​លើ​ទីលាន និង របស់របរ​ក្នុង​ការិយាល័យ និង សម្ភារៈ​សំខាន់ៗ​មួយ​ចំនួន​ទៀត​នៅ​ទីតាំង​ដែលមាន​ទំហំ​ប្រមាណ​៤​ហិក​តា រហូត​មិនអាច​ទទួល​រៀបចំ​ការប្រកួត​នានា​ក្នុងពេល​ដ៏​ខ្លី​ខាងមុខ​នោះទេ​។



ដោយ​ក្លិប​អាស៊ី​អឺរ៉ុប មានការ​ស្នើសុំ​មក​គណៈកម្មការ​ប្រកួត​បាល់ទាត់​ជាតិ​កម្ពុជា CNCC ឲ្យ​មាន​ផ្លាស់ប្តូរ​ទីលាន​ប្រកួត​ទើបបាន​ឯកភាព និង សម្រេច​ប្ដូរ​ការប្រកួត​ចំនួន​២​លើក​ទៅកាន់​វាលស្មៅ​ពហុ​កីឡដ្ឋាន​ជាតិ ក្នុង​រាជធានី​ភ្នំពេញ វិញ​។ ក្នុង​លិខិត​ចេញ​ថ្ងៃទី​១៥ សីហា ឆ្នាំ​២០១៨ ចុះហត្ថលេខា​ដោយ​លេខា​ប្រតិបត្តិ CNCC លោក ឆាំង ពិសិដ្ឋ បង្ហាញថា ការប្រកួត​សប្ដាហ៍​ទី​១៨ រវាង អាស៊ី​អឺរ៉ុប តទល់​អគ្គិសនី​កម្ពុជា នៅ​ម៉ោង​១៥:០០ ថ្ងៃទី​១៩ សីហា និង ជំនួប​សប្ដាហ៍​ទី​២០ រវាង​អាស៊ី​អឺរ៉ុប ជាមួយ​ភ្នំពេញ​ក្រោ​ន នៅ​ម៉ោង​១៥:០០ ថ្ងៃទី​១៦ កញ្ញា នៅ​កីឡដ្ឋាន AEU Sport Park នឹងត្រូវ​ប្ដូរ​ទៅ​ពហុ​កីឡដ្ឋាន​ជាតិ​ទាំង​២​ប្រកួត ដោយ​រក្សា​កាលបរិច្ឆេទ និង ពេលវេលា​ប្រកួត​នៅ​ដដែល​។



គួរ​បញ្ជាក់​ថា ​កីឡដ្ឋាន AEU Sport Park មាន​ទីតាំងនៅ​ឃុំ​ស្វាយជ្រំ ស្រុក​ខ្សាច់កណ្ដាល ខេត្តកណ្ដាល ដែល​ទើប​បើក​ដំណើរការ​នៅ​រដូវ​កាល​២០១៨​នេះ​បាន​រងគ្រោះ​លិចលង់​ដោយសារ​បាក់​ទំនប់​នៅ​ព្រឹក​ថ្ងៃ​អង្គារ ទី​១៤ សីហា ថ្មីៗ​នេះ​។ លោក ម៉ែន ពិសិដ្ឋ អ្នកចាត់ការ​ក្លិប​អាស៊ី​អឺរ៉ុប លើកឡើង​ថា ​ក្លិប​លោក​ទំនង​ត្រូវ​ចំណាយ​ថវិកា​ខ្ទង់​ម៉ឺន​ដុល្លារ​អាមេរិក ​ដើម្បី​រៀបចំ​ហេដ្ឋារចនាសម្ព័ន្ធ​នៅ​កីឡដ្ឋាន​នេះ​ឡើងវិញ ក្រោយ​រងគ្រោះ​លិចលង់​ដោយសារ​បាក់​ទំនប់​នេះ​៕

   

Source: Kampuchea Thmey Daily