លោកសាស្ត្រាចារ្យ ធា គ្រុយ បានចូលរួមបើកសន្និបាតការងារសុខាភិបាល ឆ្នាំ២០១៨ និង លើកទិសដៅឆ្នាំ២០១៩

បន្ទាយមានជ័យ ៖ ពេញ១ថ្ងៃៗទី៣ ខែឧសភា ឆ្នាំ២០១៩នេះ នៅសាលប្រជុំក្នុងមន្ទីរសុខាភិបាលខេត្តបន្ទាយមានជ័យ ស្ថិតក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ បានបើកសន្និបាតបូកសរុបការងារសុខាភិបាលឆ្នាំ២០១៨ លើកទិសដៅឆ្នាំ២០១៩ ផ្តោតទៅលើលោកវេជ្ជបណ្ឌិត គ្រូពេទ្យទាំងអស់ ក្នុងការផ្តល់សេវាវិជ្ជាជីវៈសុខាភិបាលឲ្យកាន់តែមានគុណភាព និងប្រសិទ្ធភាពដើម្បីធ្វើឲ្យសុខភាពប្រជាពលរដ្ឋឲ្យកាន់តែប្រសើរឡើង។

កិច្ចប្រជុំសន្និបាតបូកសរុបនេះ មានការចូលរួមលោកសាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាល និងជាក្រុមប្រឹក្សាគណៈគ្រូពេទ្យជាតិកម្ពុជា លោកស្រី ប៉ុកណាឌី អភិបាលរងខេត្ត លោកវេជ្ជបណ្ឌិត កែវ សុភ័ត្ត្រា ប្រធានមន្ទីរសុខាភិបាលខេត្តបន្ទាយមានជ័យ លោកវេជ្ជបណ្ឌិត និងលោកគ្រូពេទ្យ មកពីខេត្តបន្ទាយមានជ័យ និងមន្ត្រីពាក់ព័ន្ធជាច្រើននាក់បានចូលរួមផងដែរ។

កិច្ចប្រជុំសន្និបាតបូកសរុបនោះ លោកវេជ្ជបណ្ឌិតកែវ សុភ័ត្ត្រា បានមានប្រសាសន៍ទៅកាន់លោកវេជ្ជបណ្ឌិត និងគ្រូពេទ្យថា ក្នុងសន្និបាតបូកសរុបឆ្នាំ២០១៨ លើកទិសដៅឆ្នាំ២០១៩ ក្នុងគោលបំណងអភិវឌ្ឍន៍ចំណេះដឹងវិជ្ជាជីវៈវេជ្ជសាស្ត្រ និងផ្លាស់ប្ដូរបទពិសោធន៍គ្នាទៅវិញទៅមក ក្នុងការអនុវត្តវិជ្ជាជីវៈក្នុងវិស័យសុខាភិបាលខេត្តបន្ទាយមានជ័យ ដើម្បីកែលំអរាល់ចំណុចខ្វះខាតរបស់លោកវេជ្ជបណ្ឌិត និងលោកគ្រូពេទ្យទាំងអស់ ក្នុងការផ្តល់សេវាវិជ្ជាជីវៈសុខាភិបាលឲ្យកាន់តែមានគុណភាព និងប្រសិទ្ធភាព ដើម្បីធ្វើឲ្យសុខភាពប្រជាពលរដ្ឋឲ្យកាន់តែប្រសើរឡើង ដើម្បីរួមចំណែកកាត់បន្ថយភាពក្រីក្ររបស់ប្រជាពលរដ្ឋផងដែរ។

លោក កែវ សុភ័ត្ត្រា បានបញ្ជាក់ទៀតថា ក្នុងសន្និបាតនេះផងដែរ ដើម្បីពិនិត្យមើលឡើងវិញរួមគ្នាពីសមិទ្ធផលលើការងារដែលមន្ទីរសុខាភិបាលរួមជាមួយដៃគូអភិវឌ្ឍន៍ក្នុងការផ្តល់សេវាសាធារណៈដល់ប្រជាពលរដ្ឋ និងជាឱកាសធ្វើការផ្សព្វផ្សាយដល់សាធារណៈ ប្រជាជន សហគមន៍ ដើម្បីស្វែងយល់ឲ្យកាន់តែច្បាស់អំពីផែនការយុទ្ធសាស្ត្រលើវិស័យសុខាភិបាល ដែលត្រូវយកទៅអនុវត្ត ដោយឈរលើគោលការណ៍ទទួលខុសត្រូវឲ្យមានប្រសិទ្ធភាព គុណភាព និង សមធម៌ ដើម្បីរួមចំណែកកាត់បន្ថយភាពក្រីក្ររបស់ប្រជាពលរដ្ឋ និងចូលរួមអភិវឌ្ឍន៍សង្គម សេដ្ឋកិច្ច សង្គមកិច្ចឲ្យកាន់តែរីកចម្រើនទៀតផង។

ក្នុងនោះ លោកស្រី ប៉ុក ណាឌី បានមានប្រសាសន៍ថា ក្នុងសន្និបាតនេះ មានសារះសំខាន់ណាស់សម្រាប់មន្ទីរសុខាភិបាលខេត្ត មន្ទីរពាក់ព័ន្ធ ដៃគូអភិវឌ្ឍន៍សុខាភិបាល វិស័យឯកជន អាជ្ញាធរ រដ្ឋអំណាចមូលដ្ឋាន បានចូលរួមធ្វើការវាយតម្លៃសមិទ្ធផល និងវឌ្ឍនភាពវិស័យសុខាភិបាលប្រចាំឆ្នាំលោកវេជ្ជបណ្ឌិត និងលោកគ្រូពេទ្យទាំងអស់ ត្រូវបន្តដោះស្រាយបញ្ហាប្រឈមចំពោះមុខ និងត្រូវជំរុញការអនុវត្តការងារសុខាភិបាលឲ្យកាន់តែប្រសើរឡើងថែមទៀត នូវស្ថានភាពសុខភាពរបស់ប្រជាពលរដ្ឋក្នុងមូលដ្ឋាន។

ក្នុងនោះដែរ លោកសាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាល បានធ្វើការផ្ដាំផ្ញើដល់លោកវេជ្ជបណ្ឌិត និងលោកគ្រូពេទ្យទាំងអស់ ត្រូវបំពេញកិច្ចការក្រមសីលធម៌វិជ្ជាជីវៈ និងអាកប្បកិរិយា ឲ្យបានសមរម្យ ចំពោះអ្នកជំងឺ មិនត្រូវប្រើអាកប្បកិរិយាអសុរោះដល់អ្នកជំងឺឡើយជាហេតុធ្វើឲ្យជះឥទ្ធិពលមិនល្អដល់សេវាសាធារណៈ ហើយលោកបានធ្វើការកោតសរសើរដល់លោកវេជ្ជបណ្ឌិត និងលោកគ្រូពេទ្យទាំងអស់ដែលខិតខំប្រឹងប្រែងប្រកបដោយឆន្ទៈទទួលខុសត្រូវខ្ពស់ក្នុងការបំពេញភារកិច្ចសម្រេចបានជោគជ័យស្របតាមផែនការយុទ្ធសាស្ត្រសុខាភិបាល ឆ្នាំ២០១៨កន្លងមក។ កត្តាជោគជ័យទាំងអស់នេះហើយ បានឆ្លុះបញ្ចាំងនូវសាមគ្គីភាពយ៉ាងល្អប្រសើររឹងមាំក្នុងថ្នាក់ដឹកនាំរបស់មន្ទីរសុខាភិបាលទៀតផង៕