កំពង់ឆ្នាំង ៖ ដោយសារការដុតធូបទៀនចោលមិនប្រុងប្រយ័ត្នក្នុងថ្ងៃសីល ផ្ទះមួយខ្នងឈើខាងលើនិងថ្មពីក្រោម បានឆេះអស់ស្ទើរតែទាំងស្រុង។
គ្រោះអគ្គិភ័យខាងលើនេះ បានកើតឡើងនៅវេលាម៉ោងប្រមាណជាង៨យប់ ថ្ងៃទី០៣ ខែឧសភា ឆ្នាំ២០១៩ នៅចំណុចផ្សារសាលាលេខ៥ ស្ថិតក្នុងឃុំអូរឫស្សី ស្រុកកំពង់ត្រឡាច ខេត្តកំពង់ឆ្នាំង។
ប្រភពពីសមត្ថកិច្ចនគរបាលមូលដ្ឋាន បានឲ្យដឹងថា មកដល់ពេលនេះ ករណីភ្លើងឆេះផ្ទះខាងលើនេះ គេនៅមិនទាន់ដឹងពីទំហំ នៃការខូចខាតច្បាស់លាស់នៅឡើយទេ ចំពោះមូលហេតុ នៃគ្រោះអគ្គិភ័យនេះសង្ស័យថា ដោយសារភ្លើងធូបទៀន។
ដោយឡែក ប្រជាពលរដ្ឋនៅរស់នៅជិតផ្ទះជនរងគ្រោះបានឲ្យដឹងថា ស្ត្រីម្ចាស់ផ្ទះ ជាអ្នកប្រកបមុខរបរលក់បង្អែម នៅក្នុងផ្សារសាលាលេខ៥ ហើយករណីឆេះផ្ទះនេះ សង្ស័យថាបណ្តាលមកពីការអុចភ្លើងធូបទៀនក្នុងថ្ងៃសីល ដោយពេលឆេះអស់ភ្លាមៗ ម្ចាស់មិនដឹងឡើយ ទើបបង្កឲ្យភ្លើងឆេះសន្ធោសន្ធៅឡើង រហូតឆេះផ្ទះស្ទើរតែទាំងស្រុងតែម្តង ទើបមានការអន្តរាគមន៍ពីរថយន្តបាញ់ទឹករបស់នគរបាលស្រុកកំពង់ត្រឡាច។
សមត្ថកិច្ចនគរបាលបានឲ្យដឹងថា ក្នុងការជួយពន្លត់ និងទប់ស្កាត់កុំឲ្យរាលដាលគ្រោះអគ្គិភ័យនេះសមត្ថកិច្ចប្រើប្រាស់រថយន្តពន្លត់អគ្គិភ័យចេញធ្វើសកម្មភាព ដោយប្រើប្រាស់ទឹកអស់៣ឡាន ទើបគ្រប់គ្រងសភាពការណ៍បាន។ ដោយឡែក ក្នុងគ្រោះអគ្គិភ័យនេះ មិនមានប្រជាពលរដ្ឋណាម្នាក់រងរបួសឡើយ ប៉ុន្តែម្ចាស់ផ្ទះបានខូចខាតទ្រព្យសម្បត្តិក្នុងផ្ទះ និងផ្ទះទាំងស្រុង៕
Source: Kampuchea Thmey Daily
0 Comments