បន្ទាយមានជ័យ ៖ លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត ក្រោយពីបានទទួលពាក្យបណ្តឹងពី ឈ្មោះកែម និល ភេទស្រី អាយុ៥១ឆ្នាំ រស់នៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ក្នុងករណីកូនវាយទ្រព្យសម្បត្តិក្នុងផ្ទះដោយសារតែឆ្កួតនឹងថ្នាំញៀនលោកបានដឹកនាំកម្លាំងអាវុធហត្ថ១ក្រុម ចុះឃាត់ខ្លួនបានជនសង្ស័យម្នាក់ មានឈ្មោះ ខាន់ ម៉ាប់ ភេទប្រុស អាយុ ៣១ឆ្នាំ នៅវេលាម៉ោង៦ល្ងាចថ្ងៃទី១៤ ខែសីហា ឆ្នាំ២០១៨ នៅចំណុចជិតវត្តថ្មី ស្ថិតក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។កម្លាំងអាវុធហត្ថបានធ្វើការដកហូតវត្ថុតាងរួមមានគ្រឿងញៀនមេតំហ្វេតាមីន ទឹកកក ចំនួន ១កូនថង់ ស្មើ ០.២៤ក្រាម ប្រាក់ខ្មែរ ចំនួន ១១.៥០០រៀល ឧបករណ៍សម្រាប់ជក់គ្រឿងញៀនមួយចំនួន លោកបានកសាងសំណុំរឿងបញ្ជូនជនសង្ស័យ រួមជាមួយវត្ថុតាង ទៅទីបញ្ជាការដ្ឋានកងរាជអាវុធហត្ថខេត្តដើម្បីសាកសួរបន្ត។
លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្ត ទទួលការងារប្រយុទ្ធប្រឆាំងគ្រឿងញៀន ដោយបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ លោកបានធ្វើការសាកសួរជនសង្ស័យបានឆ្លើយសារភាពថា នៅថ្ងៃកើតហេតុនោះ ខ្លួនបានជក់គ្រឿងញៀនខ្លាំងមកដល់ផ្ទះបានផ្ទុះកំហឹងជាមួយម្តាយ ហើយបានយកញញួរមកវាយបំផ្លិចបំផ្លាញសម្ភារៈក្នុងផ្ទះអស់មួយចំនួន ម្តាយគាត់មានការភ័យខ្លាចខ្លាំង ក៏ទៅដាក់ពាក្យបណ្តឹងនៅមូលដ្ឋានកងរាជអាវុធហត្ថក្រុងតែម្តង។ បន្ទាប់ពីទទួលបានចម្លើយសារភាពរបស់ជនសង្ស័យហើយ លោកបានកសាងសំណុំរឿងបញ្ជូនជនសង្ស័យ រួមជាមួយវត្ថុតាង ទៅតុលាការដើម្បីដាក់ទោសទៅតាមផ្លូវច្បាប់៕
Source: Kampuchea Thmey Daily
0 Comments