អាជ្ញាធររាជធានី ជំរុញអោយមន្ត្រីជំនាញ និងអាជ្ញាធរបន្តការងារបុកស៊ីផាយ ចាក់ដីបំពេញ ប្រគល់ដីកម្មសិទ្ធិជូនប្រជាពលរដ្ឋនៅប្រឡាយស្ទឹងមានជ័យ ខណៈជំហានទី១បានបញ្ចប់

ភ្នំពេញ ៖ អភិបាលនៃគណៈអភិបាលរាជធានីភ្នំពេញលោកឃួង ស្រេងបានជំរុញអោយមន្ត្រីជំនាញនៃមន្ទីរសាធារណការនិងដឹកជញ្ជូនរាជធានីភ្នំពេញ និងអាជ្ញាធរដែនដី បន្តការងារបុកស៊ីផាយ ចាក់ដីបំពេញ ដើម្បីប្រគល់ដីកម្មសិទ្ធិជូនប្រជាពលរដ្ឋនៅប្រឡាយស្ទឹងមានជ័យ ជំហានទី២ និងជំហានបន្តបន្ទាប់ទៀត ខណៈជំហានទី១បានបញ្ចប់ ដោយបានប្រគល់ដីជូនប្រជាពលរដ្ឋរួចរាល់ហើយនោះ។

ការជំរុញរបស់លោកឃួង ស្រេងបែបនេះបានធ្វើឡើង កាលពីល្ងាចថ្ងៃទី១៨ ខែកក្កដា ក្នុងកិច្ចប្រជុំជាមួយមន្ត្រីជំនាញ និងអាជ្ញាធរខណ្ឌពាក់ព័ន្ធ នៅសាលារាជធានីភ្នំពេញ ពាក់ព័ន្ធនឹងការស្តារ ការស្ថាបនា ការចាក់ដីបំពេញដើម្បីចែកជូនប្រជាពលរដ្ឋរស់នៅតាម ប្រឡាយស្ទឹងមានជ័យអោយបានលឿនទៅតាមគម្រោងដែលបានគ្រោងទុក។

លោក ឃួង ស្រេង អភិបាលរាជធានីភ្នំពេញបានមានប្រសាសន៍ថា ការងាររៀបចំកែលម្អប្រឡាយស្ទឹងមានជ័យ បាននិងកំពុងទទួលការអបអរសាទរពីសំណាក់បងប្អូនប្រជាពលរដ្ឋទូទៅ ពិសេសគឺបងប្អូនរស់នៅទីតាំងប្រឡាយនេះតែម្តង ព្រោះបានទទួលនូវប្រឡាយស្អាត ផ្លូវល្អ ភ្លើង-ទឹកគ្រប់គ្រាន់ ពិសេសគឺផ្ទះសំបែងត្រឹមត្រូវ។ ក្នុងនោះអភិបាលរាជធានី លោកបានផ្តាំផ្ញើដល់ជំនាញទាំងអស់ ត្រូវយកចិត្តទុកដាក់ខ្ពស់ក្នុងការសាងសង់ប្រឡាយបេតុងស្ទឹងមានជ័យនេះឱ្យបានឆាប់រហ័សទាំងគុណភាព និងប្រសិទ្ធភាពការអនុវត្តការងារ។

លោក ម៉េតមាសភក្តី អ្នកនាំពាក្យរដ្ឋបាលរាជធានីភ្នំពេញបានអោយដឹងក្រោយកិច្ចប្រជុំនេះថា ការដ្ឋានប្រឡាយស្ទឹងមានជ័យនេះ ក្នុងជំហានទី១រដ្ឋបាលរាជធានីភ្នំពេញ បានអនុវត្តការងារ ដោយបានចាក់ដីបំពេញនៅមាត់ប្រឡាយព្រមទាំងផ្តល់កម្មសិទ្ធិដីទំហំ៤គុណនឹង៦ម៉ែត្រជូនប្រជាពលរដ្ឋបានបានជាង១០០គ្រួសារ ហើយនៅសល់៤១០គ្រួសារ ឬក្បាលដីក្នុងចំណោមប្រជាពលរដ្ឋទាំងអស់ចំនួន៥៧៣គ្រួសារ។

លោកម៉េត មាសភក្តីបានបញ្ជាក់ថា ប្រឡាយស្ទឹងមានជ័យ បានដើរតួយ៉ាងសំខាន់ ក្នុងការរំដោះទឹកចេញពីតំបន់ព្រលានយន្តហោះភ្នំពេញ ហូរនាំទឹកទម្លាក់ចូលមកប្រឡាយស្ទឹងមានជ័យនេះ ទើបបន្តហូរទម្លាក់បន្តទៅបឹងទំពុន។ ជាគម្រោងតួប្រឡាយស្ទឹងមានជ័យមានទំហំ៨ម៉ែត្រ។

លោកជូ គឹមទ្រី អនុប្រធានមន្ទីរសាធារណការនិងដឹកជញ្ជូនរាជធានីភ្នំពេញបានអោយដឹងផងដែរថា ការដ្ឋានស្ថាបនាប្រឡាយស្ទឹងមានជ័យនេះ ក្នុងជំហានទី១នេះ យើងអនុវត្តការងារលើការបុកស៊ីផាយ បានសម្រេចប្រវែង២២៦ម៉ែត្រសងខាងហើយ ក្នុងប្រវែងសរុបចំនួន៣២៨ម៉ែត្រសងខាង ក្នុងនោះក្រុមការងារក៏បានដាក់លូប្រអប់បាន៥៣កង់។ ក្រោយបញ្ចប់ជំហានទី១នេះ យើងនឹងបន្តបុកស៊ីផាយជំហានទី២ទៀត ដែលមានប្រវែង២៥២ម៉ែត្រសងខាង។

គួរបញ្ជាក់ថា នៅតំបន់ប្រឡាយស្ទឹងមានជ័យ រដ្ឋបាលរាជធានី បាននិងកំពុងស្ថាបនាប្រឡាយស្ទឹងមានជ័យមានប្រវែង១៣៩៨ម៉ែត្រ ដោយចាក់បេតុងបុកស៊ីផាយ ទទឹង៨ម៉ែត្រ ហើយគម្រោងនេះ ត្រូវបានបែងចែកជា៤ដំណាក់កាល ឆ្លងកាត់ខណ្ឌចំនួន២ គឺខណ្ឌមានជ័យនិងខណ្ឌសែន សុខ ដែលមានប្រជាពលរដ្ឋរស់នៅនិងរងផលប៉ះពាល់ប្រឡាយនេះចំនួន៥៧៣គ្រួសារ ហើយប្រជាពលរដ្ឋទាំងអស់នេះ នឹងទទួលបានដីទំហំ៤គុណនិង៦ម៉ែត្រជាកម្មសិទ្ធិស្របច្បាប់នៅហ្នឹងកន្លែងតែម្តង៕