អ្នកប្រដាល់ទម្ងន់៦៣,៥០០គីឡូក្រាម៤រូប នឹងត្រូវជួបប្រកួតគ្នាដណ្តើមពានរង្វាន់ប្រាក់លានរបស់ទូរទស្សន៍បាយ័ន នាល្ងាចថ្ងៃសៅរ៍ទី២១ ខែកក្កដា ឆ្នាំ២០១៨នេះ នៅលើសង្វៀនបាយ័នស្ទឹងមានជ័យ។
អ្នកប្រដាល់ទាំង៤រូបនោះ គឺសុខ សុវណ្ណ អ្នកប្រដាល់ក្លិបកងពលធំអន្តរាគមន៍លេខ២ , ថន វាសនា អ្នកប្រដាល់ក្លិបនាគរាជមានជ័យ, នូវ ដារ៉ូ អ្នកប្រដាល់ក្លិបអាណាចក្រគុនខ្មែរ និង ស៊ឹម វណ្ណដេត អ្នកប្រដាល់ក្លិបថ្មគោលពោធិសែនជ័យ ។ ពួកគេទាំង៤ ត្រូវប្រកួតគ្នាតាមរូបមន្តម៉ារ៉ាតុង គឺចាញ់ហាលអាវ ឈ្នះត្រូវបន្តការប្រកួតទៀត រហូតរកឃើញអ្នកជាប់លេខ១ ជាម្ចាស់ពានរង្វាន់ ។
សម្រាប់ការជួបគ្នារវាងអ្នកប្រដាល់ជើងខ្លាំងទាំង៤រូបនេះ គឺសុខ សុវណ្ណ នឹងត្រូវជួបប្រកួតជាមួយនូវ ដារ៉ូ ពួកគេទាំងពីរមិនធ្លាប់ប៉ះគ្នាទេកាលពីពេលកន្លងមក ។ រវាងពីរនាក់នេះ បើតាមកម្រិតសមត្ថភាពបច្ចេកទេស និងកាយសម្បទារបស់ពួកគេទាំងពីរនេះ ឃើញថាប្រហាក់ប្រហែលគ្នា តែស្នៀតគុននិងកលល្បិចគឺចាញ់សុខសុវណ្ណទេ ។ ទោះជាយ៉ាងណា សម្រាប់ការជួបគ្នាលើកនេះ មិនអាចទស្សន៍ទាយមុនបានថា អ្នកណាហាលអាវ អ្នកណាឡើងទៅផ្តាច់ព្រ័ត្រនោះឡើយ ។
ចំពោះអ្នកប្រដាល់ស៊ឹម វណ្ណដេត គេនឹងត្រូវជួបប្រកួតជាមួយថន វាសនា ។ ពួកគេទាំងពីរនេះ ធ្លាប់ជួបគ្នាពីរដងហើយកន្លងមក ដោយវណ្ណដេតឈ្នះវាសនាដោយពិន្ទុទាំងពីរលើក ។ ពួកគេទាំងពីរនាក់នេះ ថន វាសនាជាអ្នកប្រដាល់ជើងចាស់ ឯស៊ឹម វណ្ណដេត ជាអ្នកប្រដាល់ស្រករក្រោយ តែពួកគេទាំងពីរ មានថ្វីដៃល្អ ហើយខ្លាំងនិងកម្លាំងស៊ុហ្វរឹងមាំដូចគ្នា ។ យ៉ាងណា ប៉ះគ្នាលើកនេះ គឺមានលក្ខណះតឹងតែងហើយ។
ប៉ុន្តែទោះជាយ៉ាងណា រវាងអ្នកប្រដាល់ជើងខ្លាំងទាំង៤រូបនេះ ទោះបីជាមិនដឹងថាអ្នកណាជ្រុះធ្លាក់ អ្នកណានឹងបានឡើងទៅដល់វគ្គផ្តាច់ព្រ័ត្រ ហើយអ្នកណានឹងក្លាយជាម្ចាស់ពានរង្វាន់នេះក្តី ក៏គេមើលឃើញមុនរួចជាស្រេចថា សុខ សុវណ្ណ និង ស៊ឹម វណ្ណដេត អាចនឹងជួបគ្នាក្នុងវគ្គផ្តាច់ព្រ័ត្រ ដើម្បីប្រជែងគ្នាយកពានរង្វាន់នេះ។
សូមបញ្ជាក់ថា ការប្រកួតចែកចេញជាពីរដំណាក់កាល ដែលដំណាក់កាលទី១ប្រកួតជម្រុះ ដើម្បីជម្រុះចោលពីរនាក់ដែលចាញ់ៗ ហើយពីរនាក់ដែលឈ្នះនោះ ត្រូវឡើងទៅជួបគ្នាក្នុងដំណាក់កាលទី២ ដែលជាការប្រកួតផ្តាច់ព្រ័ត្រដណ្តើមពានអនុស្សាវរីយ៍របស់ស្ថានីយ៍ទូរទស្សន៍បាយ័ន ។
ការប្រកួតក្នុងដំណាក់កាលទី១ គឺប្រកួតតែ៣ទឹកប៉ុណ្ណោះដោយក្នុងមួយទឹកមាន៣នាទី និងការប្រកួតក្នុងដំណាក់កាលផ្តាច់ព្រ័ត្រ គឺវាយ៥ទឹក តែមួយទឹកវាយតែ២នាទីទេ ។
ក្រៅពីគូដណ្តើមពានរង្វាន់នេះ អ៊ូច ធារិទ្ធ អ្នកប្រដាល់ក្លិបអាណាចក្រគុនខ្មែរនឹងជួបប្រកួតជាមួយ វុត្ថា លាន់លិញ អ្នកប្រដាល់ក្លិបអង្គរធំគុនខ្មែរ ។ពួកគេទាំងពីរ នឹងប្រកួតគ្នាក្នុងប្រភេទទម្ងន់៦០គីឡូក្រាម។
ពីរនាក់នេះ មិនដែលប៉ះគ្នាទេកន្លងមក ។ សម្រាប់ការជួបប្រកួតគ្នាលើកដំបូងនេះ មិនដឹងថា អ៊ូច ធារិទ្ធ គេអាចវាយឈ្នះវុត្ថា លាន់លិញ ឬអត់នោះទេ? ព្រោះវុត្ថា លាន់លិញ ជាអ្នកប្រដាល់ជើងថ្មី ដែលមានស្នៀតគុនល្អនិងខ្លាំង ដោយវាយឈ្នះ៣ប្រកួតជាប់ៗគ្នាក្នុងការប្រកួតចុងក្រោយនេះ ។ ប៉ុន្តែយ៉ាងណា វុត្ថា លាន់លិញ គេក៏មានស្នៀតប្រដាល់ល្អនិងខ្លាំងគួរសមដែរ ។ ចំណែក លី សំណាង ក្លិបកងចក្ររាជសីហ៍មានរិទ្ធ ត្រូវជួបប្រកួតជាមួយវ៉ាត់ ធារ៉ា ក្លិបមហិទ្ធរិទ្ធមេសរថ្ងកខេត្តស្វាយរៀង ក្នុងប្រភេទទម្ងន់៥៤គីឡូក្រាម៕
Source: Kampuchea Thmey Daily
0 Comments