រដ្ឋបាលខណ្ឌដូនពេញ បន្តចុះរៀបចំសណ្ដាប់ធ្នាប់ផ្លូវសំខាន់ទាំង១១ខ្សែ

ភ្នំពេញ ៖ ដោយអនុវត្តតាមបញ្ជារបស់លោកអភិបាល នៃគណៈអភិបាល រាជធានីភ្នំពេញ ស្តីពីការរៀបចំសន្តិសុខ សណ្តាប់ធ្នាប់ក្នុងមូលដ្ឋានខណ្ឌដូនពេញនោះ នៅថ្ងៃចន្ទ ១៣រោច ខែជេស្ឋ ឆ្នាំច សំរឹទ្ធិស័ក ពស.២៥៦២ ត្រូវនឹងថ្ងៃទី១១ ខែ មិថុនា ឆ្នាំ២០១៨ វេលាម៉ោង ០៨និង៣០នាទីព្រឹក លោក សុខ ពេញវុធ អភិបាល នៃគណៈអភិបាលខណ្ឌដូនពេញ បានបញ្ជាអោយ លោក យស យុទ្ធី អភិបាលរងខណ្ឌ និង លោក សាន ណារិទ្ធ ប្រធានប្រជាការពារស្តីទី ខណ្ឌ ដូនពេញ ដឹកនាំកម្លាំងគណៈបញ្ជាការឯកភាពរដ្ឋបាលខណ្ឌ បន្តចុះរៀបចំសន្តិសុខ សណ្ដាប់ធ្នាប់ របៀបរៀបរយសាធារណៈ និងអនាម័យ នៅតាមបណ្តោយផ្លូវសំខាន់ៗទាំង១១ខ្សែ។

មហាវិថីសំខាន់ ដែលលោកអភិបាលរាជធានីភ្នំពេញ បានអោយរដ្ឋបាលខណ្ឌចុះរៀបចំរបៀបរៀបរយឲ្យបានល្អប្រសើរនោះ ក្នុងនោះមាន មហាវិថីព្រះមុនីវង្ស មហាវិថីសហព័ន្ធរុស្ស៊ី មហាវិថីព្រះនរោត្តម តីរវិថីព្រះស៊ីសុវត្ថិ ផ្លូវផ្លូវស៊ូស្រ៊ុន មហាវិថីសម្តេចសុធារស មហាវិថីព្រះសុរាម្រិត ផ្លូវលេខ៤៧ ផ្លូវលេខ ១៣ កែង ១៥៤ -៦៣-១៤២ ១១៩ និង ផ្លូវលេខ១០៦-១០៨-ល- ។

ក្នុងនោះរដ្ឋបាលខណ្ឌ បានបន្តធ្វើការប្រកាសផ្សព្វផ្សាយសេចក្តីជូនដំណឹងអោយបងប្អូនប្រជាពលរដ្ឋដែលចតយានយន្តគ្រប់ប្រភេទ នៅលើទ្រូងផ្លូវ ត្រូវចតអោយផុតពីចិញ្ចើមផ្លូវ ដើម្បីទុកផ្លូវសម្រាប់ថ្មើរជើង ចំពោះបងប្អូនដែលប្រកបអាជីវកម្មផ្សេងៗ ត្រូវលក់តាមគំនូសដែលរដ្ឋបាលខណ្ឌ បានកំណត់ជូន និង រក្សាអនាម័យបរិស្ថានឲ្យបានស្អាត មានសោភ័ណភាព។

ជាក់ស្តែងនៃការចុះរៀបចំសណ្តាប់ធ្នាប់នេះ រដ្ឋបាលខណ្ឌ បានធ្វើកាឃាត់យានយន្ត ដែលចតគ្មានសណ្ដាប់ធ្នាប់បានចំនួន០៤គ្រឿង រថយន្តដឹកទឹកកកចំនួន០១គ្រឿង រថយន្តដាក់តាំងលក់លើចិញ្ចើមផ្លូវសាធារណៈ ចំនួន០៣គ្រឿង សម្ភារៈមួយចំនួន និងជនអនាថា ដែលដេកតាមផ្លូវសាធារណៈ ចំនួន០១នាក់ យកមករក្សាទុកនៅសាលាខណ្ឌដូនពេញ ដើម្បីធ្វើកិច្ចសន្យាអប់រំណែនាំ តាមនីតិវិធីច្បាប់៕