កណ្ដាល ៖ ស្ត្រីកម្មកររោងចក្រម្នាក់ ត្រូវបានកម្លាំងនគរបាលចាប់ខ្លួនពាក់ព័ន្ធអំពើហិង្សា ប្លន់យកទ្រព្យសម្បត្តិ (លួច មានស្ថានទម្ងន់ទោស) ដោយសារការខឹងភាគីម្ខាងទៀត មិនព្រមឲ្យក្រដាសទូទាត់សងលុយរួចហើយមកខ្លួន។
ចំណែកភាគីដែលព្យាយាមមិនព្រមឲ្យក្រដាសសងលុយ រងរបួសជាទម្ងន់ ត្រូវបានក្រុមគ្រួសារចាត់បញ្ជូនទៅកាន់មន្ទីរពេទ្យភ្លាមៗផងដែរ។
អំពើលួច មានស្ថានទម្ងន់ទោសនេះ បានកើតឡើងនៅថ្ងៃទី២៦ ខែមីនា ឆ្នាំ២០១៩ វេលាម៉ោង០៩និង៣០នាទី ត្រង់ចំណុចផ្ទះជនរងគ្រោះ ភូមិជ្រោយមេត្រីក្រោម ឃុំឫស្សីជ្រោយ ស្រុកមុខកំពូល ខេត្តកណ្ដាល។ នគរបាលស្រុកមុខកំពូលបានឲ្យដឹងថា ជនរងគ្រោះ ឈ្មោះ កៃ គឹមឡាង ភេទស្រី អាយុ៥៣ឆ្នាំ ជនជាតិខ្មែរ(រងរបួស) រស់នៅភូមិជ្រោយមេត្រីក្រោម ឃុំឫស្សីជ្រោយ ស្រុកមុខកំពូល ខេត្តកណ្ដាល។ ជនសង្ស័យ ឈ្មោះម៉ិច ទីណា ភេទស្រី អាយុ៣០ឆ្នាំ ជនជាតិខ្មែរ មុខរបរកម្មកររោងចក្រ(ឃាត់ខ្លួន) មានទីលំនៅ ភូមិជ្រោយមេត្រីក្រោម ឃុំឫស្សីជ្រោយ ស្រុកមុខកំពូល ខេត្តកណ្ដាល។
នគរបាលបញ្ជាក់ថា អំពើលួចមានស្ថានទម្ងន់ទោសនេះ សម្ភារៈបាត់បង់មានរួមមាន ប្រាក់៤.០០០ដុល្លារ ខ្សែក១ខ្សែ ចិញ្ចៀន០១វង់ និង ប្រាក់រៀល០១លានរៀល។ រីឯវត្ថុតាងចាប់យក ៖
១.ប្រាក់រៀល៣៦៧.៣០០រៀល
២.ខ្សែក ដាច់ ចំនួន០១ខ្សែ ដែលមានបន្តោងរូបបេះដូងចំនួន០១
៣.ចិញ្ចៀនដាំត្បូងចំនួន០១វង់
៤.ខោក្រណាត់ ពណ៌លឿង មានប្រឡាក់ឈាម០១
៥.អាវក្រឡាការ៉ូ សលាយខ្មៅ០១
៦.ក្រមា ពណ៌ត្រួយចេកលាយក្រហម០១
៧.កាត សម្រាប់បញ្ចូលលុយរបស់ក្រុមសែលកាត២៣ដុល្លារ ស្មាត៤០ដុល្លារ មិត្តហ្វូន០៦ដុល្លារ។
នៅថ្ងៃទី២៦ ខែមីនា ឆ្នាំ២០១៩ វេលាម៉ោង០៨និង៣០នាទី ជនសង្ស័យ បានដើរចេញពីផ្ទះមកទិញជីស្លឹកខ្ទឹម នៅផ្ទះយាយធំ ក្រោយពីទិញរួច ជនសង្ស័យបានដើរចូលមកក្នុងផ្ទះជនរងគ្រោះសួរនាំពីរឿងក្រដាស ជំពាក់លុយថា ៖ (ក្រដាសជំពាក់មុន ខ្ញុំសងប្រាក់រួច ម៉េចមិនឲ្យខ្ញុំ) ជនរងគ្រោះឆ្លើយថា ៖ (អញអត់ឲ្យទេ ម៉េចខ្លាចអញទារលុយទៀតមែន) ជនសង្ស័យឆ្លើយថា ៖(អ៊ំឯងច្រើនតែវង្វេង) ប៉ុន្តែជនរងគ្រោះនៅតែមិនឲ្យក្រដាសខ្ចីប្រាក់មកជនសង្ស័យទេ ហើយជនសង្ស័យក៏មានការអន់ចិត្ត ដើរមកផ្ទះយកជី ខ្ទឹមទុក។
លុះដល់វេលាម៉ោង០៩និង៣០នាទី ជនសង្ស័យ បានដើរទៅវិញតែម្នាក់ឯងចូលផ្ទះជនរងគ្រោះ និងជួបជនរងគ្រោះទារក្រដាសជំពាក់លុយមុន ដែលបានសងរួចមក ហើយខ្លាចក្រែងជនរងគ្រោះទារទៀត ប៉ុន្តែជនរងគ្រោះមិនឲ្យ បែរជាទារប្រាក់ទើបខ្ចីថ្មីទៅវិញ ពេលនោះក៏មានជជែកគ្នា ហើយជនរងគ្រោះក៏ដើរចូលមកក្នុងបន្ទប់។ ចំណែកជនសង្ស័យ ក៏ដើរមកតាមក្រោយ ដោយខឹងជនរងគ្រោះនិយាយទារលុយដដែលៗ ទប់ចិត្តមិនបានស្ទុះច្រានជនរងគ្រោះផ្ទប់ជញ្ជាំងថ្ម បណ្តាលឲ្យដួលទៅលើឥដ្ឋ ហើយជនរងគ្រោះស្រែកថា ៖ (ងែងធ្វើអីចឹង) ភ្លាមនោះ ជនសង្ស័យ បានចាប់សក់ក្បាលបោកទៅលើថ្ម ចំនួនពីរដងថែមទៀត បណ្តាលឲ្យជនរងគ្រោះសន្លប់ ជនសង្ស័យយកក្រមាពណ៌ប៉ៃតងខៀវ មកចងរឹត.ក ជនរងគ្រោះបន្ថែមទៀត ដោយនឹកស្មានថាជនរងគ្រោះស្លាប់ ជនសង្ស័យបានដកយកកាបូបលុយស្ពាយពណ៌ខ្មៅពីជនរងគ្រោះ ហើយលូកយកលុយពីក្នុងកាបូបនោះដាក់ក្នុងថង់ខ្មៅ ហើយបោះកាបូបស្ពាយនោះចោល មូលហេតុដោយឆ្កែព្រុសពេក បន្ទាប់មកជនសង្ស័យ ក៏ដើរ សសៀរតាមមុខផ្ទះ។ ក្រោយពីកើតហេតុ រួច ប្តីជនរងគ្រោះបានមកផ្ទះកើតហេតុ ឃើញប្រពន្ធ ដេកសន្លប់នៅលើថ្ម ក្នុងបន្ទប់ ដោយមានក្រមាចងរឹត.ក ថែមទៀត ប្តីជនរងគ្រោះ ក៏ស្រាយក្រមាចេញជនរងគ្រោះក៏ដឹងខ្លួនវិញ ដោយនិយាយប្រាប់ថា ទីណាអ្នកវាយ ឮដូច្នេះ ក៏ទូរស័ព្ទប្តឹងមកសមត្ថកិច្ចប៉ុស្តិ៍ រួចមកប៉ុស្តិ៍បានមកដល់កន្លែងកើតហេតុ ឃាត់ខ្លួនជនសង្ស័យ ឈ្មោះ ម៉ិច ទីណា មកធ្វើការសាកសួរនៅប៉ុស្តិ៍ ហើយឆ្លើយសារភាពថា ខ្លួនពិតជាបានវាយជនរងគ្រោះប្លន់យកប្រាក់ពិតប្រាកដមែន៕
Source: Kampuchea Thmey Daily
0 Comments