សម្ដេច​ប្រមុខ​រដ្ឋ​ស្តីទី ទទួល​សារ​តាំងពី​ឯកអគ្គរដ្ឋទូត​សាធារណរដ្ឋ​សហព័ន្ធ​ប្រេ​ស៊ី​ល​

​ភ្នំពេញ ​៖ សម្ដេច​វិបុល​សេនា​ភក្តី សាយ ឈុំ ប្រមុខ​រដ្ឋ​ស្តីទី នៃ​ព្រះរាជាណាចក្រ​កម្ពុជា នៅព្រឹក​ថ្ងៃទី​២៧ មីនា​នេះ បាន​អនុញ្ញាត​ឲ្យ លោកស្រី Ana Lucy Gentil Cabral Petersen ឯកអគ្គរដ្ឋទូត​តែងតាំង​ថ្មី នៃ​សាធារណរដ្ឋ​សហព័ន្ធ​ប្រេ​ស៊ី​ល ចូល​ជូន​សារតាំង និង ​សម្ដែង​ការ​គួរសម នៅ​វិមាន​ព្រឹទ្ធសភា​។​

ក្នុងជំនួប​នេះ​ លោកស្រី Ana Lucy Gentil Cabral Petersen ឯកអគ្គរដ្ឋទូត នៃ សាធារណរដ្ឋ​សហព័ន្ធ​ប្រេ​ស៊ី​ល បាន​ថ្លែងអំណរគុណ​សម្ដេច​ប្រមុខរដ្ឋស្តីទី ដែល​បាន​ចំណាយ​ពេល​វេលា ដ៏​មានតម្លៃ​អនុញ្ញាត​ឲ្យ​លោកស្រី​ បាន​ចូល​ជូន​សារតាំង និង​ សម្តែង​ការ​គួរសម​។

លោកស្រី​Ana Lucy Gentil Cabral Petersen បាន​សម្ដែង​នូវ​សេចក្ដីសោមនស្ស​រីករាយ ដែល​នេះ គឺជា​លើក​ទី​១​ហើយ ដែល​លោកស្រី​ ត្រូវបានតែងតាំង​ជា​ឯកអគ្គរដ្ឋទូត​ប្រចាំ​នៅ​អាស៊ី ជាពិសេស​ប្រចាំ​នៅ​ព្រះរាជាណាចក្រ​កម្ពុជា​។

លោកស្រី​មាន​សេចក្តី សង្ឃឹមថា លោកស្រី​នឹងមាន​ឱកាស ស្វែងយល់​បន្ថែមទៀត ​អំពី​ប្រទេស​កម្ពុជា បើទោះបីជា​ប្រទេស​កម្ពុជា​នៅ​ឆ្ងាយ​ពី​ប្រទេស​ប្រេ​ស៊ី​ល​យ៉ា​ណា​ក៏​ដោយ ក៏​ប្រទេស​កម្ពុជា​ស្ថិត​ក្នុង​ដួងចិត្ត​របស់​ប្រជាពលរដ្ឋ​ប្រេ​ស៊ី​ល​។​
​
លោកស្រី​Ana Lucy Gentil Cabral Petersen បាន​សន្យា​ថា នឹង​ខិតខំ​ប្រឹងប្រែង​ពង្រឹង​ពង្រីក ទំនាក់​ទំនង និង​កិច្ចសហប្រតិបត្តិការ​រ​វាង​ប្រទេស​ទាំងពីរ ដើម្បី​ជា​ផលប្រយោជន៍​សម្រាប់​ប្រជាជន និង ប្រទេស​ទាំងពីរ​។​

ក្នុង​ព្រះបរមនាម ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ នៃ​ព្រះរាជាណាចក្រ​កម្ពុជា ក្នុងនាម​ព្រឹទ្ធសភា រដ្ឋសភា រាជរដ្ឋាភិបាល​កម្ពុជា និង​ខ្លួន​ខ្ញុំ​ផ្ទាល់ សម្ដេច វិបុល​សេនា​ភក្តី សាយ ឈុំ បាន​សម្ដែង​នូវ​ការ​ស្វាគមន៍​ដ៏​កក់ក្ដៅ​ជាទីបំផុត ដែល​លោក រដ្ឋាភិបាល​នៃ​សាធារណរដ្ឋ​សហព័ន្ធ​ប្រេ​ស៊ី​ល តែងតាំង​លោកស្រី​Ana Lucy Gentil Cabral Petersen ជា​ឯកអគ្គរដ្ឋទូត​វិសាមញ្ញ និង​ពេញ​សមត្ថភាព នៃ​សាធារណរដ្ឋ​សហព័ន្ធ​ប្រេ​ស៊ី​ល ប្រចាំ ព្រះរាជាណា​ចក្រ​កម្ពុជា​។​
​
សម្ដេច​វិបុល​សេនា​ភក្តី ប្រមុខ​រដ្ឋ​ស្តីទី មាន​ជំនឿ​ជឿជាក់ថា ក្នុងឋានៈ​លោកស្រី ជា​ឯកអគ្គរដ្ឋទូត នៃ​សាធារណរដ្ឋ​សហព័ន្ធ​ប្រេ​ស៊ី​ល ប្រចាំ​ព្រះរាជាណាចក្រ​កម្ពុជា លោកស្រី​ នឹង​បន្ត​ខិតខំ​ពង្រឹង​ពង្រីក ចំណងមិត្តភាព និង​កិច្ចសហប្រតិបត្តិការ​លើ​គ្រប់​វិស័យ​ឲ្យ​កាន់តែ​ទូលំទូលាយ ដើម្បី​ជា​គុណ​ប្រយោជន៍ សម្រាប់​ប្រជាជន និង​ប្រទេស​ទាំងពីរ​។​
​
សម្ដេច​វិបុល​សេនា​ភក្តី ប្រមុខ​រដ្ឋស្តីទី បាន​សម្តែង​នូវ​សេចក្តី​រីករាយ​ ដោយ​បាន​មើល​ឃើញ​ទំនាក់ ទំនង និង​កិច្ចសហប្រតិបត្តិការ​រ​វាង​ប្រជាជន និង​ប្រទេស​ទាំងពីរ​មានការ​រីកចម្រើន​ជា​បន្តបន្ទាប់​។​
​
សម្ដេច​វិបុល​សេនា​ភក្តី ប្រមុខរដ្ឋស្តីទី បាន​បញ្ជាក់ថា ព្រឹទ្ធសភា រដ្ឋសភា រាជរដ្ឋាភិបាល ក្រសួង ស្ថាប័ន​ជាតិ ​នៃ​ព្រះរាជាណាចក្រ​កម្ពុជា ត្រៀមខ្លួន​ជានិច្ច​ដើម្បី​ធ្វើ​កិច្ចសហប្រតិបត្តិការ​ដ៏​ជិតស្និទ្ធ​ជា​មួយ​នឹង​លោកស្រី​ឯកអគ្គរដ្ឋទូត ដើម្បី​លើកកម្ពស់​ទំនាក់ទំនង​មិត្តភាព និង​កិច្ច​សហ​ប្រតិបត្តិការ​ឈាន​ឡើង កម្រិត​ថ្មី​មួយទៀត ដើម្បី​ផលប្រយោជន៍​ដ៏​ធំធេង​សម្រាប់​ប្រជាជន និង​ប្រទេស​ទាំងពីរ​ទៅវិញទៅមក​។​
​
តាមរយៈ​ លោកស្រី​ឯកអគ្គរដ្ឋទូត សម្ដេច​វិបុល​សេនា​ភក្តី ប្រមុខ​រដ្ឋ​ស្តីទី បាន​ពាំ​នាំ​នូវ​ព្រះរាជ បណ្តាំ​សួរសុខទុក្ខ សេចក្តី​គោរព និង​សេចក្តី​នឹករលឹក​អំពី ព្រះករុណា​ព្រះបាទ​សម្ដេច​ព្រះបរមនាថ នរោត្តម សីហមុនី ព្រះមហាក្សត្រ នៃ​ព្រះរាជាណាចក្រ​កម្ពុជា និង​ សម្តេចព្រះ​មហាក្សត្រី នរោត្តម មុនីនាថ សីហនុ និង​ថ្នាក់ដឹកនាំ​កំពូល​ជាតិ នៃ​ព្រះរាជាណាចក្រ​កម្ពុជា ជូន​ចំពោះ ​ឯកឧត្ដម ប្រធានា​ធិបតី និង​ថ្នាក់ដឹកនាំ​កំពូល​គ្រប់​លំដាប់ថ្នាក់ នៃ​សាធារណរដ្ឋ​សហព័ន្ធ​ប្រេ​ស៊ី​ល​ផង​ដែរ​៕



Source: Kampuchea Thmey Daily