បន្ទាយមានជ័យ ៖ យុវជនម្នាក់ទើបតែត្រឡប់មកពីធ្វើការនៅប្រទេសថៃមិនបានប៉ុន្មានផង ខណៈពេលដែលកំពុងបើកម៉ូតូតែម្នាក់ឯងតាមផ្លូវជាតិលេខ៥ ដល់ចំណុចខាងលិចផ្សារអូរអំបិល ក្នុងភូមិ/សង្កាត់អូរអំបិល ក្រុងសិរីសោភ័ណ ក៏ត្រូវរថយន្តកាំម៉ារីបើកបុកចំពេញទំហឹង ហើយកិនស្លាប់នៅនឹងកន្លែងកើតហេតុតែម្តង។
តាមសាក្សីឃើញហេតុការណ៍បានឲ្យដឹងថា មុនពេលកើតហេតុ គេឃើញបុរសម្នាក់ជិះម៉ូតូពណ៌ខ្មៅ ដោយជិះពីលិចសំដៅទៅកើត លុះមកដល់ចំណុចខាងលើ ក៏មានរថយន្តកាំម៉ារីមួយគ្រឿងបើកផ្ទុយគ្នាក្នុងល្បឿនលឿនទៅបុកម៉ូតូជនរងគ្រោះពេញទំហឹងឮយ៉ាងខ្លាំងធ្វើឲ្យជនរងគ្រោះប៉ើងទៅម្ខាងនៃផ្លូវរថយន្តដែលបុក ឯម៉ូតូខ្ទាតទៅខាងឆ្វេងនៃផ្លូវ ហើយរថយន្តដែលបុកបើកទៅមុខកិនជនរងគ្រោះ រួចបើកទៅបាត់បន្សល់ទុកជនរងគ្រោះបែកក្បាលស្លាប់នៅនឹងកន្លែង។
ជនរងគ្រោះត្រូវបានគេស្គាល់ឈ្មោះ បាត់ ភេទប្រុស អាយុ២៧ឆ្នាំ មានទីលំនៅភូមិគាបសង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ដែលទើបតែមកពីធ្វើការនៅប្រទេសថៃបានជិតមួយខែ ហើយបានដើរធ្វើការតាមចុងភៅការ។
នគរបាលចរាចរណ៍បានចុះទៅដល់កន្លែងកើតហេតុភ្លាមៗបានឲ្យដឹងថា ជនរងគ្រោះពុំមានពាក់មួកសុវត្ថិភាព ទើបបណ្ដាលឲ្យបែកក្បាលខ្ទេចស្លាប់នឹងកន្លែង ហើយនាំយកសពជនរងគ្រោះប្រគល់ឲ្យក្រុមគ្រួសារសព ចំណែកម៉ូតូជនរងគ្រោះម៉ាកហុងដាសេ១២៥ ពណ៌ខ្មៅ ពាក់ស្លាក់លេខបន្ទាយមានជ័យ២I0934 ត្រូវបាននាំយកមករក្សាទុកនៅស្នងការខេត្ត រីឯរថយន្តដែលបុកជនរងគ្រោះ បន្ទាប់ពីបើករត់ចេញពីកន្លែងកើតហេតុមិនបានប៉ុន្មានគីឡូម៉ែត្រ ក៏ឈប់ទុកចោលនៅខាងលិចស្ពានទឹកថ្លា ដោយតៃកុងរថយន្តរត់បាត់ ត្រូវបាននាំយកមករក្សាទុកនៅស្នងការដូចគ្នាដើម្បីស្រាវជ្រាវរកម្ចាស់រថយន្តមកអនុវត្តតាមផ្លូវច្បាប់៕
អ ពៅ.
0 Comments