ភ្នំភ្លើងមួយនៅលើកោះបាលីរបស់ប្រទេសឥណ្ឌូនេស៊ី បានផ្ទុះឡើងកាលពីថ្ងៃចន្ទដោយព្រួសផេះឡើងលើកម្ពស់២,០០០ម៉ែត្រ ហើយបានបញ្ចេញកំអែពណ៌ទឹកក្រូចចេញពីកំពូលរបស់វា។
កាលពីសប្ដាហ៍មុន កោះត្រូពិចមួយនេះបានបិទអាកាសយានដ្ឋានជាបណ្តោះអាសន្នដែលជាហេតុធ្វើឲ្យជើងហោះហើររាប់រយជើងត្រូវជាប់គាំងបន្ទាប់ពីភ្នំភ្លើង Agung បានផ្ទុះឡើង។
ភ្នាក់ងារភូមិសាស្ត្រឥណ្ឌូនេស៊ីបាននិយាយថា ការផ្ទុះចុងក្រោយបំផុតនៃភ្នំភ្លើង Agung នៅប្រហែលម៉ោង៩យប់គឺមានរយៈពេលជាងប្រាំពីរនាទីហើយកំអែបានធ្លាក់ចុះទៅចម្ងាយ២គីឡូម៉ែត្រចេញពីមាត់ភ្នំភ្លើង។
មានតំបន់ហាមចូលចម្ងាយ៤គីឡូម៉ែត្រនៅជុំវិញភ្នំភ្លើង Agung។ វានៅតែស្ថិតក្នុងកម្រិតប្រុងប្រយ័ត្នដែលជាការព្រមានគ្រោះថ្នាក់បំផុតទី២ខណៈអាកាសយានដ្ឋាន Ngurah Rai របស់កោះនេះនៅតែបើកទ្វារ។
ការផ្ទុះលើកមុនកាលពីខែវិច្ឆិកាបានធ្វើឲ្យភ្ញៀវទេសចររាប់ពាន់នាក់ត្រូវជាប់គាំងនិងធ្វើឲ្យប៉ះពាល់ដល់ឧស្សាហកម្មទេសចរណ៍ដែលរកប្រាក់ចំណេញបានយ៉ាងច្រើនរបស់កោះបាលី។
ផេះគឺមានគ្រោះថ្នាក់ណាស់ដល់យន្តហោះព្រោះវាធ្វើឲ្យផ្លូវរត់មានភាពរអិលនិងអាចស្រូបចូលទៅក្នុងម៉ាស៊ីន។
ភ្នំ Agung ចម្ងាយប្រមាណ៧០គីឡូម៉ែត្រពីមជ្ឈមណ្ឌលទេសចរណ៍ Kuta។ ប្រជាពលរដ្ឋរាប់ពាន់នាក់បានភៀសខ្លួនទៅមជ្ឈមណ្ឌលជម្លៀសបន្ទាប់ពីសកម្មភាពផ្ទុះកាលពីឆ្នាំមុន។
ការផ្ទុះដ៏ធំបំផុតចុងក្រោយរបស់ភ្នំ Agung ក្នុងឆ្នាំ១៩៦៣បានសម្លាប់មនុស្សប្រហែល១,៦០០នាក់។
ប្រទេសឥណ្ឌូនេស៊ីស្ថិតនៅលើខ្សែក្រវាត់ភ្នំភ្លើងប៉ាស៊ីហ្វិក ដែលជាទីតាំងមានការរញ្ជួយនិងសកម្មភាពភ្នំភ្លើងជាញឹកញាប់៕ AFP
Source: Kampuchea Thmey Daily
0 Comments