ភ្នំពេញ ៖ យោងតាមប្រភពពីលោកវរសេនីយ៍ទោ ម៉ៅ សឿត អធិការរងនគរបាលខណ្ឌច្បារអំពៅបានឲ្យកម្ពុជាថ្មីដឹងថា កាលពីវេលាម៉ោង៤និង១៥នាទីព្រឹកព្រលឹមថ្ងៃទី៨ ខែឧសភានេះ មានជនជាតិអូស្ត្រាលីម្នាក់ បានស្លាប់ដែលគ្រូពេទ្យអះអាងថា ដោយសារគាំងបេះដូង។
លោកអធិការរងបានបន្តថា ជនរងគ្រោះឈ្មោះSTEVENS JAMES SIDNEY ភេទប្រុស ឆ្នាំកំណើត១៩៤៥ មុខរបរនៅផ្ទះ និងមានប្រពន្ធជាជនជាតិខ្មែរស្នាក់នៅផ្ទះជួលបុរីឧទ្យានតាងៅ ភូមិអូរអណ្តូងទី១ សង្កាត់ព្រែកប្រា ខណ្ឌច្បារអំពៅរាជធានីភ្នំពេញ។
លោកអធិការរងបានបន្តថា តាមការបំភ្លឺពីប្រពន្ធជនរងគ្រោះបានឲ្យដឹងថា មុនម៉ោងកើតហេតុជនរងគ្រោះបានឲ្យប្រពន្ធយកទឹកក្រូចកូកាឲ្យគាត់ផឹក។ ចំណែកប្រពន្ធបានទៅដេកបន្ទប់ខាងក្នុងដោយឡែកជនរងគ្រោះដេកនៅបន្ទប់ក្រៅជាមួយកូនស្រីអាយុ៥ឆ្នាំ។ លុះដល់ម៉ោង៤និង១៥នាទីទៀបភ្លឺស្រាប់តែកូនស្រីស្រែកឲ្យជួយប៉ាៗ ហើយប្រពន្ធស្ទុះទៅមើលឃើញរឹងថ្គាមស្លាប់ទៅហើយ។
លោកម៉ៅ សឿត បានបញ្ជាក់ថា ជនរងគ្រោះបានស្លាប់ដោយសារជំងឺគាំងបេះដូង។ សពត្រូវបានបញ្ជូនចេញពីផ្ទះជួលយកទៅមន្ទីរពេទ្យកាល់ម៉ែតដើម្បីរង់ចាំឲ្យក្រុមគ្រួសារនៅប្រទេសអូស្ត្រាលីមកធ្វើបុណ្យ៕
Source: Kampuchea Thmey Daily
0 Comments