នៅយប់ថ្ងៃច័ន្ទ ទី៦ ខែឧសភា ឆ្នាំ២០១៩ ថ្មីៗនេះខ្សែការពាររបស់ក្លិបអង្គរថាយហ្គឺរ សមាជិកលីគកំពូលកម្ពុជា (Metfone Cambodian League) គឺកីឡាករ តាំង ពិសី បានជួបគ្រោះថ្នាក់ចរាចរណ៍ នៅវេលាម៉ោង២១:០០នាទី ម្តុំមុខសាកលវិទ្យាល័យបៀលប្រាយ ក្នុងទីរួមខេត្តសៀមរាប ខណៈពេលនេះរូបគេបានត្រឡប់ទៅសម្រាកព្យាបាលនៅផ្ទះរបស់ខ្លួនវិញហើយ។
យោងតាមការបញ្ជាក់នៅលើវិបសាយផ្លូវការរបស់ក្លិបដែលមានមូលដ្ឋាននៅខេត្តសៀមរាប មួយនេះបញ្ជាក់ថា ខ្សែការពារស្លាបឆ្វេង តាំង ពិសី បានជួបគ្រោះថ្នាក់ចរាចរណ៍វាក់អីជាមួយឡានដឹកដីនៅចំណុចផ្លូវបែកជាបី ទល់មុខសាលាសង្កត់ ស្វាយដង្គុំ ខេត្ត សៀមរាប។ ភ្លាមៗនោះ ត្រូវបានសាច់ញាតិ និងមិត្តភ័ក្ត្រ បានដឹកបញ្ជូនទៅមន្ទីរពេទ្យខេត្ត និងបានធ្វើការស្កេនពិនិត្យផ្នែកក្បាលផងដែរ។
ជាលទ្ធផលលោកគ្រូពេទ្យបានអោយដឹងថា របួសរបស់កីឡាករ តាំង ពិសី ពុំមានការប៉ះពាល់ដល់ផ្នែកខួរក្បាលនោះទេ និងមិនមានអាការៈធ្ងន់ធ្ងរនោះដែរ ដោយគ្រាន់តែបាក់ឆ្អឹងខាងលើ និងក្រោមភ្នែកបន្តិច និងរយះត្រង់ចិញ្ចើមដេរ៧ថ្នេរ។ ក្រោយពេទ្យពិនិត្យនិងព្យាបាលបឋមរួចរាល់កីឡាករ តាំង ពិសី បានត្រឡប់មកសម្រាកនៅផ្ទះវិញហើយ។
ទន្ទឹមនឹងគ្នានេះដែរលោក Akihiro Kato ប្រធានក្លិបអង្គរថាយហ្គឺរ ដែលកំពុងតែធ្វើដំណើរទៅត្រួតពិនិត្យក្លិបរបស់លោកមួយទៀតនៅប្រទេសនីហ្សេរីយ៉ា បានចូលរួមសោកស្តាយចំពោះគ្រោះថ្នាក់ដល់កីឡាកររបស់ខ្លួនហើយលោកសង្ឃឹមថាកីឡាករ តាំង ពិសី នឹងជាសះស្បើយដូចដើមវិញក្នុងពេលឆាប់ៗ។ បុរសជនជាតិជប៉ុនរូបនេះរំពឹងថាបញ្ហាគ្រោះថ្នាក់ចរាចរណ៍នៅកម្ពុជា នឹងថមថយជាងមុននៅថ្ងៃអនាគត។
បញ្ហារបួសរបស់កីឡាករ តាំង ពិសី ទំនងមិនទាន់ចូលរួមជួយក្រុមអង្គរថាយហ្គឺរ របស់ខ្លួនទទួលស្វាគមន៍ក្រុមអាស៊ីអឺរ៉ុប នៅវេលាម៉ោង៣:៣០នាទីរសៀលថ្ងៃអាទិត្យ ទី១២ខែឧសភា ឆ្នាំ២០១៩ ខាងមុខលើទីលានកីឡដ្ឋានខេត្តសៀមរាប ប្រចាំសប្ដាហ៍ទី៧ នៃពានរង្វាន់លីគកំពូលកម្ពុជា (Metfone Cambodian League 2019)៕
Source: Kampuchea Thmey Daily
0 Comments