ភ្នំពេញ ៖ សមាគមគ្រឹះស្ថានឧត្តមសិក្សាកម្ពុជា ដែលមានគ្រឹះស្ថានសិក្សាឯកជនចំនួន១០៣ជាសមាជិក និងបានចាត់បញ្ជូនសមាជិករបស់ខ្លួនចំនួន២៥៩៥នាក់ ដែលជានិស្សិត សាស្ត្រាចារ្យ បញ្ញវ័ន្ត ចូលរួមជាអ្នកសង្កេតការណ៍បោះឆ្នោតទាំង២៥ រាជធានី-ខេត្តទូទាំងប្រទេស ជាលក្ខណៈចល័ត និងអចល័ត នៅក្នុងការបោះឆ្នោតជ្រើសតាំងតំណាងរាស្ត្រនីតិកាលទី៦ កាលពីថ្ងៃទី២៩ ខែកក្កដា ឆ្នាំ២០១៨កន្លងទៅនេះ បានប្រកាសគាំទ្រ និងទទួលស្គាល់លទ្ធផលផ្លូវការ ដែលប្រកាសដោយ គ.ជ.ប កាលពីយប់ថ្ងៃទី១៥ ខែសីហា។
ដំណើរការបោះឆ្នោតជ្រើសតាំងតំណាងរាស្ដ្រ នីតិកាលទី៦ ឆ្នាំ២០១៨ បានប្រព្រឹត្តិទៅកាលពីថ្ងៃទី២៩ ខែកក្កដា ឆ្នាំ២០១៨ ដោយមានគណបក្សនយោបាយចំនួន២០ បានចូលរួមប្រកួតប្រជែង ហើយកាលពីថ្ងៃទី១៥ ខែសីហា ឆ្នាំ២០១៨ គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសលទ្ធផលផ្លូវការបង្ហាញថា គណបក្សប្រជាជនកម្ពុជា ទទួលបាន១២៥ អាសនៈតែម្តង។
នៅលើសេចក្តីថ្លែងការណ៍របស់ខ្លួន សមាគមគ្រឹះស្ថានឧត្តមសិក្សាកម្ពុជា បានបញ្ជាក់ថា តាមរយៈនៃការសង្កេតយ៉ាងយកចិត្តទុកដាក់គ្រប់ដំណាក់កាល លើការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨នេះ ព្រមទាំងបានពិនិត្យតាមដានយ៉ាងហ្មត់ចត់ ទី១, សេចក្តីប្រកាសព័ត៌មានលេខ ១៤៥ គ.ជ.ប ចុះថ្ងៃទី៣០ ខែកក្កដា ឆ្នាំ២០១៨ ស្តីពីលទ្ធផលបឋមនៃការ បោះឆ្នោតជ្រើសតាំងតំណាងរាស្ត្រនីតិកាលទី៦ឆ្នាំ២០១៨។ ទី២, សេចក្តីសម្រេចលេខ ៣៧០ គ.ជ.ប ចុះថ្ងៃទី១១ ខែសីហា ឆ្នាំ២០១៨ ស្តីពីការប្រកាសលទ្ធផលបណ្តោះអាសន្ននៃការបោះឆ្នោតជ្រើសតាំងតំណាងរាស្ត្រនីតិកាលទី៦ឆ្នាំ២០១៨។ ទី៣, លិខិតគោរពជូនប្រធានក្រុមប្រឹក្សាធម្មនុញ្ញរបស់លោក ស៊ិក ប៊ុកហុក ប្រធាន គ.ជ.ប លេខ ១២៨១ គ.ជ.ប ចុះថ្ងៃទី១៤ ខែសីហា ឆ្នាំ២០១៨ ស្តីពីគ្មានពាក្យបណ្តឹងក្រោយការប្រកាសលទ្ធផលបណ្តោះអាសន្ន។ ទី៤, លិខិតគោរពជូនប្រធាន គ.ជ.ប របស់ប្រធានក្រុមប្រឹក្សាធម្មនុញ្ញ អ៊ឹម ឈុនលឹម លេខ១០/២០១៨ កបធ.សជណ ចុះថ្ងៃទី១៤ ខែសីហា ឆ្នាំ២០១៨ ស្តីពីការបញ្ចប់ការទទួលដោះ ស្រាយបណ្តឹង។ ទី៥, សេចក្តីសម្រេចរបស់ គ.ជ.ប ចុះថ្ងៃទី១៥ ខែសីហា ឆ្នាំ២០១៨ ស្តីពីលទ្ធផល ជាស្ថាពរនៃការបោះឆ្នោតជ្រើសតាំងតំណាងរាស្ត្រនីតិកាលទី៦ឆ្នាំ២០១៨។
សមាគមគ្រឹះស្ថានឧត្តមសិក្សាកម្ពុជាបានសន្និដ្ឋាន និងវាយតម្លៃថា ការបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ ពិតជាបានប្រព្រឹត្តិទៅដោយរលូន គោរពច្បាប់ គ្មានការបង្ខិត បង្ខំ គ្មានហិង្សា ស្ងប់ស្ងាត់ មានសណ្តាប់ធ្នាប់ល្អ ស្ថិតនៅក្នុងបរិយាកាសនយោបាយប្រជាធិបតេយ្យសេរីពហុបក្ស ហើយគ.ជ.ប ជាស្ថាប័នរបស់ជាតិ ដែលបានរៀបចំការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ពិតជាស្របទៅតាមច្បាប់រដ្ឋធម្មនុញ្ញ ច្បាប់បោះឆ្នោត លិខិតបទដ្ឋានគតិយុត្តិ ប្រតិទិនការងារ រួមទាំងបច្ចេកទេស និងបានប្រកាន់យកជំហរអព្យាក្រឹត្យ យុត្តិធម៌ ស្អាតស្អំ និងតម្លាភាព។
យោងទៅលើសេចក្តីថ្លែងការណ៍លើកទី១ និងទី២ របស់សមាគម និងយោងទៅលើការសង្កេតឃើញដូចបានជម្រាបជូនខាងលើ សមាគមគ្រឹះស្ថានឧត្តមសិក្សាកម្ពុជា បានប្រកាសគាំទ្រ និង ទទួលស្គាល់នូវលទ្ធផលផ្លូវការ ដែលប្រកាសដោយគណៈកម្មាធិការជាតិរៀបចំការបោះ ឆ្នោត ( គ.ជ.ប ) សម្រាប់ការបោះឆ្នោតជ្រើសតាំងតំណាងរាស្ត្រនិតិកាលទី៦ ឆ្នាំ២០១៨ នាថ្ងៃទី១៥ ខែសីហា ឆ្នាំ២០១៨នេះ។
ទាក់ទងការបោះឆ្នោតនេះ លោកបណ្ឌិត ហេង វណ្ណដា ប្រធានសមាគមគ្រឹះស្ថានឧត្តមសិក្សាកម្ពុជា ធ្លាប់បានមានប្រសាសន៍ថា ការបោះឆ្នោតជ្រើសរើសតំណាងរាស្ត្រ នីតិកាលទី៦ ឆ្នាំ២០១៨ នេះ បានប្រព្រឹត្តិទៅដោយរលូន គោរពច្បាប់ គោរពសិទ្ធិមនុស្ស គ្មានការបង្ខិតបង្ខំ គ្មានហិង្សា គ្មានការភ័យខ្លាច គ្មានការលក់ដូរសន្លឹកឆ្នោត ស្ងប់ស្ងាត់ មានសណ្ដាប់ធ្នាប់ល្អ និងស្ថិតនៅក្នុងបរិយាកាសនយោបាយប្រជាធិបតេយ្យ សេរី និងពហុបក្ស៕
Source: Kampuchea Thmey Daily
0 Comments