ភ្នំពេញ ៖ រាជរដ្ឋាភិបាលកម្ពុជា បានដាក់ចេញវិធាន១២ចំណុច ដើម្បីឱ្យការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបឆ្នាំនេះប្រព្រឹត្តទៅជោគជ័យ និងមានទំនួលខុសត្រូវខ្ពស់។
យោងតាមសារាចរណែនាំស្ដីពី ការរៀបចំការប្រឡងសញ្ញាបត្រមធ្យមសិក្សាទុតិយភូមិ ឬហៅថាបាក់ឌុបរបស់រាជរដ្ឋាភិបាលចេញផ្សាយកាលពីថ្ងៃទី២០ ខែកក្កដា ឆ្នាំ២០១៨ បានឲ្យដឹងថា ដើម្បីធានាដល់ការប្រឡងសញ្ញាបត្រមធ្យមសិក្សាទុតិយភូមិ ចំណេះដឹងទូទៅ និងបំពេញវិជ្ជាដែល នឹងប្រព្រឹត្តទៅនាថ្ងៃទី២០ ខែសីហា ខាងមុខប្រកបដោយជោគជ័យ និងមានការទទួលខុសត្រូវខ្ពស់ រាជរដ្ឋាភិបាលសូមណែនាំដល់ក្រសួងអប់រំយុវជន និងកីឡា និងក្រសួង-ស្ថាប័នពាក់ព័ន្ធនានា អាជ្ញាធរដែនដី ព្រមទាំងអំពាវនាវ និងលើកទឹកចិត្តដល់មាតាបិតា ឬអាណាព្យាបាល បេក្ខជន និងអ្នកពាក់ព័ន្ធទាំងអស់ ចូលរួមអនុវត្តតាមការណែនាំចំនួន ១២ចំណុចសំខាន់ៗ។
ក្នុងនោះរួមមានក្រសួងអប់រំត្រូវរៀបចំមណ្ឌលប្រឡងនៅតាមរាជធានី ទីរួមខេត្តនិងស្រុកធំៗនៃខេត្តមួយចំនួនដោយជ្រើសរើសយកគ្រឹះស្ថានសិក្សា ដែលមានបរិស្ថានល្អ អគាររឹងមាំ មានបណ្ដាញទឹកភ្លើង និងផ្សព្វផ្សាយណែនាំនូវកម្រងភារកិច្ចរបស់គណៈមេប្រយោគដល់បុគ្គលិកអប់រំដែលបានចូលរួមធ្វើគណៈមេប្រយោគប្រឡងនៅគ្រប់ដំណាក់កាលនៃការប្រឡងបទបញ្ញត្តិទូទៅសម្រាប់បេក្ខជននិងបទបញ្ញត្តិ និងកម្រិតវិន័យសម្រាប់បេក្ខជននៅពេលប្រឡងដល់បេក្ខជនឲ្យបានយល់ដឹងនិងគោរពអនុវត្តឲ្យបានល្អ។
ក្រសួងសេដ្ឋកិច្ចនិងហិរញវត្ថុត្រូវបើកផ្តល់បុរេប្រទានថវិកាប្រឡងស្របទៅតាមគោលការណ៍ចំណាយ ដែលប្រកាសដោយអន្តរក្រសួងជាមួយក្រសួងអប់រំឲ្យបានទាន់ពេលវេលានិងសហការជាមួយក្រសួងអប់រំដើម្បីពិនិត្យលទ្ធភាពបង្កើនការឧបត្ថម្ភថវិកាពាក់ព័ន្ធតាមការចាំបាច់ និងទៅតាមលទ្ធភាពថវិកា។
អាជ្ញាធរដែនដីរាជធានីខេត្តត្រូវរៀបចំកងកម្លាំងការពារសន្តិសុខសុវត្ថិភាព និងរក្សាសណ្តាប់ធ្នាប់របៀបរៀបរយនៅតាមមណ្ឌលប្រឡងនីមួយៗក្នុងរាជធានីខេត្ត។ ទប់ស្កាត់នូវការថតចម្លងសំណៅឯកសារផ្សេងៗពាក់ព័ន្ធនឹងការប្រឡង និងបាតុភាពមិនប្រក្រតីនានា ដែលអាចកើតឡើងជាយថាហេតុ។ រក្សាទុក និងប្រគល់ជួនវិញនូវឧបករណ៍អេឡេចត្រូនិចគ្រប់ប្រភេទដែលគណៈមេប្រយោគបានដកហូតពីបេក្ខជន។ សម្រួលចរាចរណ៍ដើម្បីឲ្យបេក្ខជនមកចូលរួមប្រឡងបានទាន់ពេលវេលា។ជួយសម្រួលដល់ម្ចាស់ផ្ទះសំណាក់និងសណ្ឋាគារសម្រាប់មេប្រយោគនិងបេក្ខជនស្នាក់នៅកុំឲ្យដំឡើងថ្លៃនៅពេលប្រឡងក៏ដូចជាការផ្តល់សន្តិសុខសុវត្ថិភាពក្នុងកំឡុងពេលនៃការស្នាក់នៅ។
អង្គភាពប្រឆាំងអំពើពុករលួយត្រូវគ្រប់គ្រងនិងជ្រើសរើសអ្នកសង្កេតការណ៍ស្ម័គ្រចិត្តពីសមាគម សង្គមស៊ីវិលនិងបុគ្គលឯកជនដើម្បីចូលរួមសង្កេតការណ៍នៅគ្រប់ដំណាក់កាលនៃការប្រឡងរួមមានដំណើរការសំណេរ ដំណើរការកំណែ ស្រង់បូកពិន្ទុតាមកុំព្យូទ័រនិងការផ្ទៀងផ្ទាត់លទ្ធផលប្រឡង។
ចំណែកក្រសួងសុខាភិបាលត្រូវរៀបចំបុគ្គលិកប្រចាំការនៅតាមមណ្ឌលប្រឡងនីមួយៗរាជធានីខេត្ត និងប្រដាប់ដោយបរិក្ខារ និងថ្នាំពេទ្យចាំបាច់ដើម្បីបម្រើដល់កិច្ចសង្គ្រោះបឋម និងត្រៀមដាក់រថយន្តសង្គ្រោះបឋមនៅតាមមណ្ឌលប្រឡងធំៗមួយចំនួននៅតាមទីតាំងដែលអាចចល័តពីមណ្ឌលមួយទៅមណ្ឌលមួយទៀតបានតាមការចាំបាច់។
រីឯក្រសួងព័ត៌មានវិញត្រូវណែនាំឲ្យប្រព័ន្ធផ្សព្វផ្សាយរដ្ឋនិងឯកជនផ្សព្វផ្សាយបទបញ្ញត្តិទូទៅសម្រាប់បេក្ខជននិងបទបញ្ញត្តិ និងកម្រិតវិន័យចំពោះបេក្ខជនដែលប្រព្រឹត្តខុសឆ្លងនៅពេលប្រឡងដោយផ្សព្វផ្សាយយ៉ាងតិច៣ដងក្នុង១ថ្ងៃក្នុងរយៈពេល១សប្តាហ៍។ ទន្ទឹមនឹងនេះក្រសួងត្រូវរៀបចំឲ្យមានវេទិកាវិទ្យុដើម្បីឲ្យអ្នកស្តាប់បានសាកសួរសំណួរផ្តល់មតិយោបល់ ទាក់ទិននឹងការប្រឡងយ៉ាងតិចម្តងមុនពេលប្រឡង១សប្តាហ៍។
ចំពោះអគ្គិសនីកម្ពុជាត្រូវរក្សាស្ថេរភាពចរន្តនៅតាមមណ្ឌលសំណេរនិងកំណែនៅទូទាំងប្រទេស។
ក្រុមការងារថ្នាក់ជាតិចុះមូលដ្ឋានត្រូវរួមចំណែកឧបត្ថម្ភគាំទ្រដល់ការបង្រៀនបំប៉នបង្កើនសមត្ថភាពដល់សិស្សថ្នាក់ទី១២ដើម្បីត្រៀមប្រឡងនិងបន្តការឧបត្ថម្ភតាមលទ្ធភាពដើម្បីចូលរួមសម្រាលបន្ទុកដល់មាតាបិតាឬអាណាព្យាបាលសិស្សពិសេសមកពីគ្រួសារក្រីក្រសម្រាប់ចំណាយលើមធ្យោបាយធ្វើដំណើរនិងការស្នាក់នៅនៅក្នុងកំឡុងពេលប្រឡង។
គួរបញ្ជាក់ថាការប្រឡងសញ្ញាបត្រមធ្យមសិក្សាទុតិយភូមិឬបាក់ឌុបនៅឆ្នាំនេះនឹងប្រព្រឹត្តិទៅនៅថ្ងៃទី២០សីហាឆ្នាំ២០១៨ខាងមុខដោយមានបេក្ខជនចូលរួមប្រឡងចំនួន១១៧ ០៦១នាក់កើនឡើងជាងឆ្នាំមុន១៣៩៤៩នាក់និងមាន១៩៥មណ្ឌលចែកជា៤៧១៦បន្ទប់នៅតាមរាជធានីខេត្តទូទាំងប្រទេស ។
ចំពោះលទ្ធផលនៃការប្រឡងវិញក្រសួងនឹងធ្វើការប្រកាសនៅតាមមណ្ឌលប្រឡងនីមួយៗនៅរសៀលថ្ងៃទី១១ខែកញ្ញាឆ្នាំ២០១៨សម្រាប់មណ្ឌលប្រឡងរាជធានីភ្នំពេញនិងខេត្តកណ្តាលនិងនៅថ្ងៃទី១២កញ្ញាឆ្នាំ២០១៨នៅតាមមណ្ឌលផ្សេងៗទៀត។
ថ្លែងនៅក្នុងសន្និសីទកាសែតមួយស្តីពីការរៀបចំប្រឡងសញ្ញាបត្រមធ្យសិក្សាទុតិយភូមិកាលពីដើមខែកក្កដាឆ្នាំ២០១៨នេះលោកបណ្ឌិត សភាចារ្យ ហង់ជួនណារ៉ុនរដ្ឋមន្ត្រីក្រសួងអប់រំយុវជននិងកីឡាបានមានប្រសាសន៍ថាប្រឡងបាក់ឌុបនៅឆ្នាំនេះក្រសួងបានធ្វើការកែសម្រួលបន្ថែមមួយចំនួនទៅលើបទបញ្ញត្តិមួយចំនួនដើម្បីឲ្យការប្រឡងមានសុក្រិត្យភាព យុត្តិធម៌និងអាចទទួលយកបានទាំងអស់គ្នា។
លោកបណ្ឌិតសភាចារ្យ ហង់ជួនណារ៉ុនបានបន្ថែមថាចំពោះវិធានការសម្រាប់បេក្ខជនប្រឡងវិញរួមមានក្នុងករណីបេក្ខជនយកសំណៅឯកសារប្រឡង សៀវភៅសរសេរ ទូរស័ព្ទដៃចូលមណ្ឌលប្រឡងឬមានអាកប្បកិរិយាមិនសមរម្យឬបង្កជំលោះនៅក្នុងមណ្ឌលប្រឡង លួចចំលងឬយកសំណៅឯកសារពីអ្នកដ៏ទៃយកមកដាក់នៅលើតុរបស់ខ្លួន អើតមើលពេលប្រឡង ប្រើប្រាស់ទូរស័ព្ទដៃនិងឧបករណ៍អេឡេចត្រូនិចគ្រប់ប្រ ភេទ អង្គុយខុសលេខតុឬរំកិលតុជាប់គ្នាដូរកិច្ចការប្រឡងគ្នានឹងទទួលបានពិន្ទុសូន្យឬធ្លាក់ជាស្វ័យប្រវត្តិ។
ក្នុងករណីបេក្ខជនប្រឡងដើរចុះដើរឡើងដោយមិនមានការអនុញ្ញាត ហែកក្រដាសកិច្ចការប្រឡងមិនឲ្យមេប្រយោគ ផ្លាស់ប្តូរកន្លែងអង្គុយដោយខ្លួនឯង ឲ្យក្រដាសកិច្ចការរបស់ខ្លួនឲ្យអ្នកដ៏ទៃចំលងឬសរសេរចំណាំនៅលើក្រដាសកិច្ចការប្រឡងឬបង្កជំលោះជាដើមនឹងត្រូវប្រឈមនឹងការធ្លាក់ហើយហាមមិនឲ្យចូលរួមប្រឡង១ឆ្នាំទៀតផង។
លោករដ្ឋមន្ត្រីបានបញ្ជាក់ថាធ្ងន់ធ្ងរជាងនេះទៀតក្នុងករណីបេក្ខជនយកអាវុធជាតិផ្ទុះចូលមណ្ឌលប្រឡ ងឬឲ្យអ្នកដ៏ទៃប្រឡងជំនួសខ្លួនត្រូវធ្លាក់ដោយស្វ័យប្រវត្តិនិងហាមមិនឲ្យប្រឡង២ឆ្នាំ។ចំណែកអ្នកប្រឡងជំនួ សគេត្រូវប្រឈមនឹងតុលាការក្នុងបទក្លែងឯកសារសាធារណៈ។
លោករដ្ឋមន្ត្រីបានឲ្យដឹងទៀតថាចំពោះបុគ្គលិកអប់រំក៏ទទួលពិន័យដូចបេក្ខជនប្រឡងដែរដូចជាមេប្រយោគពេលឃើញបេក្ខជនលួចចំលងគ្នាហើយមិនចាច់នោះគ្រូទាំងនោះនឹងត្រូវទទួលរងការពិន័យជាផ្ទាល់មាត់និងហាមមិនឲ្យធ្វើមេប្រយោគរយៈពេល១ឆ្នាំ។ក្នុងករណីគ្រូជួយធ្វើវិញ្ញាសារឲ្យសិស្ស ទទួលសំណូក ឬរៀបចំជាចំលើយវិញ្ញាប្រឡងអាចប្រឈមនឹងការបណ្តេញចេញពីក្រមខណ្ឌគ្រូបង្រៀនឬប្រឈមនឹងផ្លូវតុលា ការផងដែរ។
ដើម្បីឲ្យសុក្រិតថែមទៀតនោះលោកបណ្ឌិតសភាចារ្យហង់ជួនណារ៉ុនបានបញ្ជាក់ថា ក្រសួងបានអនុវត្តឲ្យការការពង្រាយអ្នកសង្កេតការណ៍ពីអង្គភាពពប្រឆាំងអំពើពុករលួយជាង៦ពាន់នាក់នៅតាមមណ្ឌលប្រឡងនីមួយៗផងដែរ៕
Source: Kampuchea Thmey Daily
0 Comments