បន្ទាយមានជ័យ ៖ នៅយប់ថ្ងៃទី៥ ខែវិច្ឆិកា ឆ្នាំ២០១៥នេះលោកឧត្តមសេនីយ៍ អាត់ ខែមស្នងការនគរបាលខេត្តបន្ទាយមានជ័យបានដឹកនាំកម្លាំងនគរបាលចំនួន៤០នាក់ រថយន្ត១០គ្រឿង និងកាំភ្លើង៣០ដើម ចុះយាមកាមនៅពេលយប់ ដើម្បីពង្រឹងបញ្ហាសន្តិសុខ សណ្ដាប់ធ្នាប់ និងពង្រឹងច្បាប់ចរាចរណ៍ផ្លូវគោក តាំងពីព្រលប់រហូតដល់ព្រឹកទៀបភ្លឺនៅតាមដងផ្លូវសំខាន់ៗមានក្នុងក្រុងសិរីសោភ័ណ ដោយបានត្រួតពិនិត្យបញ្ហាគ្រឿងស្រវឹង និងច្បាប់ចរាចរណ៍ព្រមទាំងធ្វើការឆែកឆេររកអាវុធជាតិផ្ទុះផងដែរ។
លោក អាត់ ខែម បាននិយាយថា ការចុះពង្រឹងសណ្ដាប់ធ្នាប់នៅពេលយប់នេះគឺដើម្បីរក្សាសន្តិសុខ និងទប់ស្កាត់បទល្មើសនានា ដែលអាចកើតមានឡើងនៅតាមមូលដ្ឋានក្នុងគោលបំណងឲ្យប្រជាពលរដ្ឋមានជំនឿចិត្តកាន់តែខ្លាំងមកកងនគរបាល ហើយឲ្យពួកគាត់រស់នៅឲ្យបានសុខ និងប្រកបមុខរបរព្រមទាំងការធ្វើដំណើរបានដោយស្រួល និងពុំមានការភ័យខ្លាច។
លោក អាត់ ខែម បាននិយាយបន្តទៀតថា កម្លាំងនគរបាលទាំងអស់ ទាំងថ្នាក់ស្នងការដ្ឋាន អធិការគ្រប់ស្រុក-ក្រុង និងប៉ុស្តិ៍រដ្ឋបាលត្រូវបង្កើនការពារសន្តិសុខតាមរយៈការចុះល្បាតជាប្រចាំ ទាំងយប់ទាំងថ្ងៃ នៅក្នុងមូលដ្ឋានរបស់ខ្លួនដូចភ្លៀងរលឹមមិនឈប់ឡើយ៕
លោក អាត់ ខែម ដឹកនាំកម្លាំង៤០នាក់ ចុះពង្រឹងសន្តិសុខមួយក្រុងសិរីសោភ័ណ
0 Comments