ភ្នំពេញ ៖ ដោយសារតែខឹង និងអ្នកលក់គ្រឿងក្លែមតាមចិញ្ចើមផ្លូវ ហាមមិនឲ្យខាកស្តោះច្រើនដងពេកពីព្រោះវាប៉ះពាល់ដល់ភ្ញៀវដទៃទៀតនោះ ស្រាប់តែបុរសអ្នកខាកស្តោះនោះ បានដកកាំភ្លើងខ្លីបាញ់ជញ្ជាំងមួយគ្រាប់ បង្អួតស្រីស្នេហ៍ដែលមកជាមួយខ្លួន ហើយក៏បើកម៉ូតូទៅបាត់។
ករណីភ្ញាក់ផ្អើលខាងលើបានកើតឡើង កាលវេលាម៉ោង២១និង៤០នាទីយប់ ថ្ងៃទី៥ ខែមករា ឆ្នាំ២០១៦ ត្រង់ចំណុចផ្លូវរថភ្លើង ក្នុងសង្កាត់ស្រះចក ខណ្ឌដូនពេញ ព្រំប្រទល់ជាមួយសង្កាត់បឹងកក់២ខណ្ឌទួលគោក។
ប្រភពព័ត៌មានពីស្ត្រីវ័យចំណាស់ ដែលត្រូវបុរសម្នាក់គំរាមបាញ់ខាងលើនេះ បានឲ្យដឹងថា នៅមុនពេលកើតហេតុ គឺស្ត្រីរងគ្រោះកំពុងតែអង្គុយលក់គ្រឿងក្លែម និងស្រាតាមផ្លូវរថភ្លើង លុះដល់ម៉ោងកើតហេតុខាងលើ ស្រាប់តែជនបង្កពីរនាក់ប្តីប្រពន្ធ បានជិះម៉ូតូ១គ្រឿងម៉ាក់ហុងដាC125 ពណ៌ខ្មៅ ស៊េរី២០១៣ មិនចាំស្លាកលេខ មកឈប់នៅកន្លែងលក់របស់គាត់ ហើយក៏ស្តោះទឹកមាត់ដោយគ្មានរបៀប ពេលឃើញដូច្នេះ គាត់បានប្រាប់ថា «ក្មួយកុំស្តោះទឹកមាត់អីចឹងកន្លែងមីងលក់ដូរ ព្រោះសុទ្ធតែជាភ្ញៀវគេកំពុងញុំាអី» ពេលនិយាយមិនទាន់ចប់ស្រួលបួលផង ស្រាប់តែបុរសនោះខឹងបានចុះពីលើម៉ូតូមកលើកឥវ៉ាន់គាត់គ្រវែងចោលរួច ក៏ដកកាំភ្លើងខ្លីពីចង្កេះ បាញ់ផ្ទប់ទៅនឹងរបងថ្ម១គ្រាប់ បង្កការភ្ញាក់ផ្អើលតែម្តង។
បន្ទាប់ពីជនបង្កបានបាញ់មួយគ្រាប់រួចហើយនោះ ខ្លួនក៏បានប្រើពាក្យសំដីដាក់ស្ត្រីរងគ្រោះថា «អញបាញ់ប៉ុណ្ណឹងគ្មានអាណា ធ្វើអីអញបានទេ» ហើយជនបង្កជិះម៉ូតូឌុបប្រពន្ធគេចខ្លួនបាត់ស្រមោលតែម្តង។
ក្រោយកើតហេតុ គេឃើញកម្លាំងអាវុធហត្ថ ខណ្ឌទួលគោក និងអាវុធហត្ថខណ្ឌដូនពេញ ចុះទៅអន្តរាគមន៍ភ្លាមៗ និងហៅស្ត្រីរងគ្រោះមកសាកសួររកមូលហេតុ ក្នុងករណីផ្ទុះអាវុធនេះផងដែរ៕
ដកអាវុធបាញ់១គ្រាប់ ព្រោះខឹងអ្នកលក់គ្រឿងក្លែម តាមចិញ្ចើមផ្លូវ ហាមមិនឲ្យខាកស្ដោះ
0 Comments