*សមាជិក សមាជិកាគណបក្សប្រជាជនកម្ពុជាប្រមាណជាង១ម៉ឺននាក់នឹងចូលរួមអបអរសាទរទិវាជ័យជំនះ៧មករាខួបលើកទី៣៧នាព្រឹកនេះ
ភ្នំពេញ៖ នៅថ្ងៃទី០៧ ខែមករា ឆ្នាំ២០១៦ នេះ គឺជាខួបលើកទី៣៧ នៃទិវាជ័យជំនះ៧មករា (៧ មករា ១៩៧៩ – ៧ មករា ២០១៦) ហើយពីធីនេះ នឹងរៀបចំយ៉ាងគគ្រឹកគ្រេង នៅទីស្នាក់ការកណ្តាល រាជធានីភ្នំពេញ ដោយមានមាជិក សមាជិកា ប្រមាណជាង១ ម៉ឺននាក់ ចូលរួមអបអរសាទរក្នុងទិវាជាប្រវត្តិសាស្ត្រ ដ៍មានសារសំខាន់សំរាប់ប្រទេសកម្ពុជា នេះបើតាមការបញ្ជាក់ពីមន្ត្រីជាន់ខ្ពស់គណបបក្ស។
លោក សុខ ឥសាន មន្ត្រីអ្នកនាំពាក្យគណបក្សប្រជាជនកម្ពុជាបានមានប្រសាសន៍ប្រាប់កម្ពុជាថ្មីថា ទិវាជ័យជំនះ៧មករា ឆ្នាំនេះ រៀបចំនៅទីស្នាក់កណ្តាលគណបក្សប្រជាជនកម្ពុជា (គ-៨៥ ) ដែលមានទីតាំងនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ ហើយនៅមជ្ឈមណ្ឌលកោះពេជ្រ ជាមហាសន្និបាតមានរយៈពេល២ ថ្ងៃ គឺថ្ងៃទី០៩ និង១០ ខែមករា។ ដោយឡែករបៀបវារៈសំរាប់ទិវាជ័យជំនះ៧មករា ឆ្នាំនេះ រួមមាន ការសម្តែងសិល្បៈ, ការថ្លែងសុន្ទរកថារបស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា, ការជូនកន្ត្រកផ្កា លែងព្រាប ហើយទីបញ្ចប់តំណាងអង្គមីទ្ទិញឡើងចាប់អារម្មណ៍។
ដោយឡែកទាក់ទងទៅដល់ការរិៈគន់របស់ក្រុមមួយចំនួននោះ លោក សុខ ឥសាន បានអះអាងថា វាជាធម្មតារបស់ពួកគេទៅហើយ យើងមិនចង់ឆ្លើយតបអីទេ។ អ្នកគាំទ្រគេអបអរសាទរ ហើយអ្នកប្រឆាំងគេរិៈគន់ ជារឿងធម្មតារបស់គេ បើកាលណាអ្នកប្រឆាំងទៅអបអរសាទរថ្ងៃ៧មករា វាមិនអាចទៅរួចទេ ហើយជាធម្មតាអ្នកប្រឆាំង កាលណាគេប្រឆាំង៧មករា ជាវប្បធម៌របស់គេទៅហើយ។
គួររំលឹកថា មកដល់ថ្ងៃទី៧ ខែមករា ឆ្នាំ២០១៦ នេះ មានរយៈពេល៣៧ ឆ្នាំហើយ ប៉ុន្តែក្នុងរយៈពេលនេះ មជ្ឈដ្ឋានអគតិមួយចំនួននៅតែតាំងខ្លួនជាសត្រូវ នឹងជ័យជំនះ៧មករាដដែល ដោយព្យាយាមរកគ្រប់វិធីដើម្បីបដិសេធអត្ថន័យដ៏វិសេសវិសាល នៃ ជ័យជំនះ ៧មករា ធ្វើការឃោសនាមួលបង្កាច់ប្រវត្តិសាស្ត្រ និងវាយប្រហារមកលើថ្នាក់ដឹកនាំគណបក្សប្រជាជនកម្ពុជា ដែលបានដឹកនាំការប្រយុទ្ធផ្តួលរំលំរបបប្រល័យពូជសាសន៍ ដើម្បីសង្គ្រោះជាតិ និងដឹកនាំការស្តារ កសាង និងការពារមាតុភូមិជាង៣០ ឆ្នាំកន្លងមកនេះ ។ ពួកគេធ្វើជាងងឹតមើលមិនឃើញការពិតនៃការរីកចម្រើនរបស់កម្ពុជាលើគ្រប់វិស័យនាពេលបច្ចុប្បន្ននេះ ហើយខំស្រែកប្រកូក ប្រកាសរាល់ថ្ងៃ មិនខុសអ្វីពីជនមួយចំនួន ដែលថានៅកម្ពុជាគ្មានលទ្ធិប្រជាធិបតេយ្យ គ្មានសេរីភាពក្នុងការបញ្ចេញមតិ គ្មានការគោរពសិទ្ធិមនុស្ស គ្មានការអភិវឌ្ឍន៍ គ្មានការយកចិត្តទុកដាក់ចំពោះប្រជាជនក្រីក្រ ខណៈពេលដែលខ្លួនឯងកំពុងតែឈរ និងកំពុងស្ថិតនៅលើប្រទេស ឬទឹកដីដែលខ្លួនកំពុងស្រែក កំពុងរិៈគន់ ដើម្បីយកលុយពីបរទេសមកចិញ្ចឹមប្រពន្ធកូន ក្រុមគ្រួសារយ៉ាងសប្បាយ ហ៊ឺហា នោះឡើយ។
ផ្ទុយទាំងស្រុងពីអ្វីៗដែលពួកគេបាន និងកំពុងតែស្រែកនៅកម្ពុជានេះ គឺពួកគេមិនអាចបំផ្លាញការពិតបានឡើយ ព្រោះថាប្រជាជនបានទទួលយកការពិតនោះរួចទៅហើយ។ ទង្វើអកុសលដែលពួកប្រឆាំង និងមជ្ឈដ្ឋានអគតិទាំងឡាយបានធ្វើគ្រាន់តែជាកត្តារារាំងដ៏ទន់ខ្សោយ ដែលមិនអាចទប់ដំណើរដ៏ខ្លាំងខ្លារបស់កម្ពុជា មិនឲ្យទៅមុខនោះឡើយ ។ ប្រជាជនកម្ពុជាដែលបានយល់ដឹងច្បាស់អំពីឧក្រិដ្ឋកម្ម នៃរបបកម្ពុជាប្រជាធិបតេយ្យ និងការរស់ឡើងវិញដ៏អស្ចារ្យរបស់មាតុភូមិខ្លួនចាប់ពីថ្ងៃជ័យជំនះ៧មករា មកកំពុងតែសម្លឹងទៅមុខប្រកបដោយក្តីសង្ឃឹមជាមួយនឹងការប្តេជ្ញាថែរក្សាពូន ជ្រំរាល់សមិទ្ធផលសង្គមជាតិឲ្យបានគង់វង្សរួមសាមគ្គីគ្នាបន្តកសាង និងការពារមាតុភូមិ តាមមាគ៌ាដឹកនាំដ៏ត្រឹមត្រូវរបស់គណបក្សប្រជាជនកម្ពុជា ដែលមានសម្តេចទាំង៣ ជាប្រមុខដ៏ឧត្តុង្គឧត្តមបំផុត។ ប្រជាជនកម្ពុជាគ្រប់ៗជំនាន់ នឹងនៅតែចងចាំជានិច្ចនៅក្នុងមនសិការរបស់ខ្លួនថា ជ័យជំនះ៧មករា ជាសច្ចធម៌ ប្រវត្តិសាស្ត្រ ស្មារតី ៧មករា ជាប្រភពនៃរាល់ជ័យជំនះនៅក្នុងបុព្វហេតុកសាង និងការពារមាតុភូមិកម្ពុជា។
ប្រវត្តិសាស្ត្រជាស្ពានដែលតភ្ជាប់អតីតកាលមកបច្ចុប្បន្នកាល និងចង្អុលបង្ហាញពីអនាគត កាល។ ប្រជាជាតិមួយ ឬបុគ្គលណាមួយដែលមិនស្គាល់ពីអតីតកាល និងមិនយល់ពីបច្ចុប្បន្ន កាល ប្រៀបបានទៅនិងការដែលមិនបានដឹងថា ខ្លួនឯងឲ្យច្បាស់ថា មានប្រវត្តិយ៉ាងដូចម្តេច ហើយបាន និងកំពុងតែធ្វើអ្វីតទៅថ្ងៃមុខទៀត។ ក្នុងន័យថា មានថ្ងៃនេះ គឺពិតជាធ្លាប់បានឆ្លងកាត់ពីអតីកាល គ្រាន់តែអ្នកខ្លះបានកើតទាន់របបវាលពិឃាត និងប្រជាពលរដ្ឋខ្លះទៀត រួមជាមួយយុវជនជំនាន់ក្រោយខ្លះកើតមិនទាន់របបដ៏ឃោរឃៅយង់ឃ្នងនោះតែប៉ុណ្ណោះ។ សក្ខីភាពនៃប្រវត្តិសាស្ត្រដែលកើតចេញពីចលនាតស៊ូរំដោះជាតិមាតុភូមិ រហូតធានាបាននូវសុខសន្តិភាពមកដល់បច្ចុប្បន្ន គឺជាពន្លឺនៃសច្ចធម៌ និងជាដួងព្រលឹងនៃការរំលឹកភាពជាម្ចាស់ នៃការរស់រានមានជីវិតរបស់ពលរដ្ឋកម្ពុជាគ្រប់រូប។
គេនៅចងចាំបានថា ចាប់ពីថ្ងៃទី១៧ មេសា ឆ្នាំ១៩៧៥ ដល់ថ្ងៃទី៧ មករា ១៩៧៩ គឺមានរយៈពេល៣ ឆ្នាំ ៨ខែ ២០ថ្ងៃ ជារបបកម្ពុជាប្រជាធិបតេយ្យ (ខ្មែរក្រហម) ដែលបានបំផ្លាញហេដ្ឋារចនាសង្គមក្លាយជាផេះ ការធ្វើទារុណកម្ម កាប់សម្លាប់ប្រជាជនខ្មែរអស់រាប់លាននាក់ និងបាន បន្សល់ទុកនូវវិបត្តិសង្គមដ៏ធ្ងន់ធ្ងរ ដែលការឈឺចាប់ទាំងនេះ ត្រូវបានពលរដ្ឋខ្មែរដែលឆ្លងកាត់នូវរបបនោះចងចាំជានិច្ច។ សោកនាដកម្ម និងទុក្ខវេទនាដ៏មហាខ្លោចផ្សាអស់ទាំងនេះ មនុស្សគ្រប់រូប ជាពិសេស អ្នកនយោបាយខ្មែរមិនគួរបិទបាំងអំពីកត្តាប្រវត្តិសាស្ត្រ តាមរយៈការបំភ្លៃ បំផ្លើស បំពុលប្រវត្តិសាស្ត្រ ពិតរបស់កម្ពុជានោះទេ គួរតែចងក្រងដើម្បីឲ្យកូនខ្មែរ យុវជន និងអ្នកដឹកនាំជំនាន់ក្រោយបានរៀនសូត្រ និងចៀសវាងបញ្ហាអតីតកាលកើតឡើងជាថ្មីម្តងទៀតនៅលើទឹកដីនេះ។
មានសំណួរជាច្រើនបានលើកឡើងថា តើនរណាជាឥស្សរជនដែលបានបញ្ចប់របបវាលពិឃាត និងសង្គ្រោះជីវិតពលរដ្ឋកម្ពុជា ឲ្យរស់រានមានជីវិតរហូតមកដល់បច្ចុប្បន្ន? សំនួរនេះ គឺមិនមានអ្វីជាអាថិកំបាំង ដែលពិបាកក្នុងការរកចម្លើយនោះទេ វាលែងតែមានក្រុមជនមួយចំនួនមានចេតនាបិទបាំងការពិត និងមិនមានសេចក្តីក្លាហានលាតត្រដាង ដើម្បីខ្លាច បាត់បង់ប្រជាប្រិយ៍ភាពរបស់ខ្លួន ពីព្រោះមានអ្នកនយោបាយខ្លះ ក៏គេមានជីវិត និងសកម្មភាពនយោបាយប្រជាភិថុតបានមកដល់សព្វថ្ងៃដោយសារគុណបំណាច់ថ្ងៃរំដោះ៧ មករានោះដែរ។ ថ្ងៃរំដោះ៧មករា ឆ្នាំ១៩៧៩ ត្រូវបានពិភពលោកទាំងមូលដឹងយ៉ាងច្បាស់ថា អ្នកដែលបានបញ្ចប់របបវាលពិឃាត និងសង្គ្រោះជីវិតមនុស្ស គឺរណសិរ្សសាមគ្គីសង្គ្រោះជាតិកម្ពុជា ដែលបានបង្កើតកម្លាំងចលនាតស៊ូ រហូតដណ្តើមបានជ័យជំនះពីពួករបបអាវខ្មៅ នៅថ្ងៃទី៧ ខែមករា ឆ្នាំ ១៩៧៩ ដែលមានថ្នាក់ដឹកនាំគណបក្សប្រជាជនកម្ពុជា ជាស្ថាបនិកនៃកម្លាំងរណសិរ្សនេះ ដោយមានការចូលរួមពីកងទ័ពស្ម័គ្រចិត្តវៀតណាម។
គុណបំណាច់ជាប្រវត្តិសាស្ត្រនេះ ជាស្នាដៃរបស់ថ្នាក់ដឹកនាំកំពូលៗ នៃគណបក្សប្រជាជនកម្ពុជា ដែលកំពុងដឹកនាំរាជរដ្ឋាភិបាលបច្ចុប្បន្ន ព្រមទាំងយុវជន ក្នុងសម័យនោះជាច្រើននាក់ទៀត ដែលទាំងនេះជាពន្លឺនៃសច្ចធម៌ប្រវត្តិសាស្ត្រមិនអាចបំភ្លេច និងបំភ្លៃខុសពីការពិតបាន នោះឡើយ។ ដូច្នេះក្នុងនាមជាពលរដ្ឋកម្ពុជា ជាយុវជនសមយ័ថ្មី ទោះជាមិនបានរួមចំណែកក្នុងការ បញ្ចប់របបវាលពិឃាត និងសង្គ្រោះជីវិតមនុស្សក៏ដោយចុះ ក៏គួរតែដឹង និងទទួលស្គាល់អំពីតម្លៃពិត នៃប្រវត្តិសាស្ត្រ ដែលជាស្រមោលអតីតកាលដ៏ជូរចត់មួយនេះ។ បច្ចុប្បន្ន មេដឹកនាំជាន់ខ្ពស់នៃរបបអាវខ្មៅប្រល័យពូជសាសន៍ បាននិងកំពុងប្រឈមមុខនឹងការផ្តន្ទាទោសពីតុលាការវិសាមញ្ញ កម្ពុជា អ.វ.ត.ក ដែលយុត្តិធម៌ត្រូវបានផ្តល់ជូនដល់ក្រុមគ្រួសាររងគ្រោះនៅក្នុងរបបនោះយ៉ាងពិតប្រាកដ។ ដូច្នេះថ្ងៃ៧មករា គឺជារបស់ប្រជាជនកម្ពុជា មិនមែនជារបស់ផ្តាច់មុខរបស់គណបក្សប្រជាជន កម្ពុជា ឬរបស់រណសិរ្សសាមគ្គីសង្គ្រោះជាតិកម្ពុជានោះទេ ប៉ុន្តែវាជារបស់ប្រជាជនខ្មែរគ្រប់ៗរូប។
ការចូលរួមធំបំផុតរបស់ប្រជាជនកម្ពុជានេះ បានធ្វើឲ្យរបបនេះដួលរំលំរលាយ រហូតបាត់អស់ទាំងស្រុងមនោគមវិជ្ជានៃក្រុមជនផ្តាច់ការ។ ដូច្នេះភារកិច្ចដ៏សំខាន់ពីរ ដែលប្រជាពលរដ្ឋគ្រប់រូប យុវជន អ្នកនយោបាយ ត្រូវតែចូលរួមជាមួយគណបក្សប្រជាជនកម្ពុជា និងរណសិរ្សសាមគ្គីសង្គ្រោះជាតិកម្ពុជានោះគឺ ១-ទប់ស្កាត់ការវិលត្រឡប់ជាថ្មីឲ្យខានតែបានរបស់របបប្រល័យពូជសាសន៍ ប៉ុល ពត និងទី២-ដោះស្រាយជីវភាពប្រជាជនឲ្យបានកាន់តែប្រសើរឡើង ថែមទៀត។ រាជរដ្ឋាភិបាលកម្ពុជា ក្រោមការដឹកនាំដោយសម្តេចតេជោ ហ៊ុន សែន បានខិតខំស្តារ កសាង និងអភិវឌ្ឍប្រទេសពីបាតដៃទទេ រហូតមានអ្វីៗគ្រប់យ៉ាង រួមទាំងដំណើរការប្រជាធិបតេយ្យ ការអភិវឌ្ឍសេដ្ឋកិច្ចជាតិឲ្យមានកំណើនជារៀងរាល់ឆ្នាំ ការគោរពសិទ្ធិមនុស្ស ជាពិសេសការធានាបាននូវស្ថិរភាពនយោបាយ សន្តិសុខទូទាំងផ្ទៃប្រទេស ការផ្សះផ្សាបង្រួបបង្រួមជាតិ ឯកភាពទឹកដី និងការរស់នៅក្រោមដំបូលនៃច្បាប់រដ្ឋធម្មនុញ្ញ ដែលមានព្រះមហាក្សត្រគ្រងរាជសម្បត្តិ។
ដូចនេះទិវាប្រវត្តិសាស្ត្រថ្ងៃ៧មករា ជាពន្លឺនៃសច្ចធម៌ប្រវត្តិសាស្ត្រជាដួងព្រលឹងនៃការរំលឹកភាពជាម្ចាស់នៃការរស់រានមានជីវិតជាថ្មីដែលមិនអាចប្រកែកបានឡើយ។ កត្តាប្រវត្តិសាស្ត្រ ទាំងនេះ បានចងភ្ជាប់រវាងអតីតកាល មកបច្ចុប្បន្នកាល ដែលមនុស្សខ្មែរគ្រប់ៗរូបត្រូវតែចងចាំស្វែងយល់ដើម្បីកុំឲ្យប្រវត្តិដ៏ឈឺចាប់ទាំងអស់នេះ កើតទ្បើងជាថ្មីទៀត នៅលើទឹកដីកម្ពុជាដ៏បវររបស់យើង។ ក្នុងន័យថា បើស្រឡាញ់ជាតិ ស្នេហាជាតិ គឺត្រូវតែស្គាល់ពីការពិតនៃប្រវត្តិសាស្ត្រ។
ដើម្បីកសាង និងអភិវឌ្ឍន៍ប្រទេសជាតិ ថ្នាក់ដឹកនាំគណបក្សប្រជាជនកម្ពុជា បានប្រកាន់ជំហរយ៉ាងរឹងមាំក្នុងការថែរក្សាការពាររាល់សមិទ្ធផលនៃសង្គមជាតិ ជាពិសេស គឺសន្តិភាព និងសន្ថិរភាពនយោបាយ ដែលជាសមិទ្ធផលដ៏ធំធេងមិនអាចកាត់ថ្លៃបាន និងជាបុព្វល័ក្ខខ័ណ្ឌសម្រាប់ការអភិវឌ្ឍសេដ្ឋកិច្ច និងសង្គម។ ក្នុងស្មារតីនេះ គណបក្សប្រជាជនកម្ពុជា បានប្តេជ្ញា ថានឹងបន្តអនុវត្តនយោបាយ សាមគ្គីប្រជាជាតិទាំងមូល ដោយមិនបែងចែកនិន្នាការនយោបាយ អតីតកាល,ភេទ,ជំនឿសាសនា,ដើមកំណើតជាតិ និងឋានៈសង្គម នៅលើមូលដ្ឋាននៃការគោរពប្រតិបត្តិខ្ជាប់ខ្ជួននូវរដ្ឋធម្មនុញ្ញ និងបាវចនា “ជាតិ សាសនា ព្រះមហាក្សត្រ” ដើម្បីថែរក្សា និងពង្រឹករាល់សមិទ្ធផលដែលសម្រេចបានរយៈពេល៣៦ឆ្នាំ កន្លងមក និងធានាជោគជ័យក្នុងដំណើរការកសាង និងការពារមាតុភូមិទៅមុខទៀត។
លើមូលដ្ឋាននៃការអនុវត្តនយោបាយនេះ ក៍បានប្តេជ្ញាថា នឹងបន្តលើកកម្ពស់ “វប្បធម៌សង្គម” ជាមួយគណបក្សនយោបាយទាំងអស់ ដោយបញ្ចប់ការប្រឈមមុខគ្នា ក្នុងគោលបំណងធានានូវស្មារតីសាមគ្គីប្រជាជាតិទាំងមូល, ធានានូវបរិយាកាសនយោបាយល្ងប្រសើរប្រកបដោយស្ថិរភាព និងធានានូវភាពសុខដុមរមនាក្នុងសង្គមជាតិ ក៏ដូចជាធានានូវការជឿទុកចិត្តរបស់អ្នកវិនិយោគទាំអក្នុង និងក្រៅប្រទេស។ នៅក្នុងផ្នែកសង្គម-សេដ្ឋកិច្ច, គណបក្សប្រជាជនកម្ពុជាគាំទ្រយ៉ាងក្លៀវក្លា និងពេញទំហឹងចំពោះការប្តេជ្ញាចិត្តរបស់រាជរដ្ឋាភិបាលក្នុងការជំរុញអនុវត្ត យុទ្ធសាស្ត្រចតុកោណ-ដំណាក់កាលទី៣ ព្រមទាំងផែនយុទ្ធសាស្ត្រអភិវឌ្ឍន៍ជាតិ ២០១៤-២០១៨ ឱ្យសម្រេចបានជោគជ័យតាមការរំពឹងទុកដោយផ្តោអាទិភាពលើ កិច្ចការសំខាន់ៗដូចជា ទី១-ការបន្តពង្រីងសន្តិភាព,ស្ថិរភាពនយោបាយ,សន្តិសុខ និងសណ្តាប់ធ្លាប់សាធារណៈ ទី២-ការបន្តជំរុញអនុវត្តគោលនយោបាយលើកកម្ពស់កំណើន,ការងារ,សមធម៌ និងប្រសិទ្ធភាពសំដៅកាត់បន្ថយភាពក្រីក្ររបស់ប្រជាជន និងបែងចែកផ្លែផ្កានៃកំណើនប្រកបដោយសមធម៌ដល់គ្រប់ស្រទាប់វណ្ណៈនៃប្រជាជន តាមរយៈការបន្តធានាសម្រេចឱ្យបាននូវកំណើនសេដ្ឋកិច្ច, ការធានាបាននូវស្ថិរភាពម៉ាក្រូសេដ្ឋកិច្ច និងស្ថិរភាពហិរញ្ញវត្ថុ,ការបន្តខិតខំកៀរគរចំណូល និងធានាប្រសិទ្ធភាពចំណាយថវិកាជាតិ ព្រមទាំងការបង្កើនភាពធន់នៃសេដ្ឋកិច្ច ជាតិចំពោះវិបត្តិ និងយានិភ័យផ្សេងៗ គួបផ្សំនឹងការបន្តជំរុញការវិនិយោគលើហេដ្ឋារចនាសម្ព័ន្ធ។ ចាំបាច់នានាក៏ដូចជាការរៀបចំឲ្យមាននូវប្រព័ន្ធឡូជីស្ទីកដ៏រស់រវើក និងការធានានូវភាពសុខដុមរមនានៅក្នុងទំនាក់ទំនងវិជ្ជាជីវៈ និងក្នុងទីផ្សារការងារ សំដៅបង្កើនភាពទាក់ទាញសម្រាប់ ការវិនិយោគជំរុញបង្កើតការងារ និងបង្កើនចំណូលសម្រាប់ប្រជាពលរដ្ឋកម្ពុជា។
ទី៣-ការបន្តផ្តល់អាទិភាពដល់ការដំឡើងប្រាក់បៀវត្សអប្បបរមារបស់មន្ត្រីរាជការ និងកងកម្លាំងប្រដាប់អាវុធ ឆ្ពោះទៅសម្រេចគោលដៅឲ្យបានជាង១លានរៀល នៅក្នុងឆ្នាំ២០១៨ ដោយផ្សាភ្ជាប់ទៅនឹងការកែទម្រង់ប្រព័ន្ធបៀវត្ស ការកែទម្រង់រដ្ឋបាល សាធារណៈ ការកែទម្រង់ការគ្រប់គ្រងហិរញ្ញវត្ថុសាធារណៈ និងការប្រយុទ្ធប្រឆាំង នឹងអំពើពុករលួយ ទន្ទឹមនឹងការបន្តផ្តោតការយកចិត្តទុកដាក់លើការធានាលក្ខខណ្ឌការងារសមរម្យ និងការលើកកម្ពស់ ជីវភាពរបស់កម្មករ-ការិនី ព្រមទាំងការខិតខំដោះស្រាយបញ្ហាជាក់ស្តែងមួយចំនួនទៀត ដែលពាក់ព័ន្ធ ដោយផ្ទាល់ ចំពោះជីវភាពប្រចាំថ្ងៃរបស់ប្រជាជនរួមមានដូចជាបញ្ហាថ្លៃអគ្គិសនី ថ្លៃទឹក និងបណ្តាញផ្គត់ផ្គង់ទឹកស្អាត ថ្លៃកសិផល និងបញ្ហាមីក្រូហិរញ្ញវត្ថុ សម្រាប់គ្រួសារកសិករជាដើម។
ទី៤-ការបន្តធានាអនុវត្តកម្មវិធីកែទម្រង់ចាំបាច់នានារបស់រាជរដ្ឋាភិបាលឲ្យមានលក្ខណៈកាន់តែសីុជម្រៅ និងទទួលបានលទ្ធផលជាផ្លែផ្កាជាក់ស្តែង ជាបណ្តើរៗ រួមមាន ការកែទម្រង់កងកម្លាំងប្រដាប់អាវុធ ការកែទម្រង់វិមជ្ឈការ និងវិសហមជ្ឈការ ការកែទម្រង់ ប្រព័ន្ធយុត្តិធម៌ និងតុលាការ ការកែទម្រង់ដីធ្លី និងការគ្រប់គ្រងធនធានធម្មជាតិ ពិសេសធនធានព្រៃឈើ ធនធានជលផលនិងធនធានរ៉ែ ដោយផ្សា ភ្ជាប់ទៅនឹងការបន្តខិតខំពង្រឹងស្ថាប័នជាតិ និងប្រព័ន្ធអភិបាលកិច្ច ដើម្បីធានាប្រសិទ្ធភាព គណនេយ្យភាព តម្លាភាព សមធម៌ និងយុត្តិធម៌សង្គម។
ទី៥-ការបន្តជំរុញការអភិវឌ្ឍធនធានមនុស្ស តាមរយៈការលើកកម្ពស់គុណភាពអប់រំ ការបណ្តុះបណ្តាលជំនាញវិជ្ជាជីវៈ និងបច្ចេកទេស ព្រមទាំងការលើកកម្ពស់គុណភាពសេវាសុខាភិបាល ទន្ទឹមគ្នានឹងការបង្កើនការយកចិត្តទុកដាក់លើកការលើកស្ទួយវិស័យវប្បធម៌ សិល្បៈ កីឡា និងសង្គមកិច្ចឲ្យឆ្លើយតបនឹងសំណូមពរនៃការជំរុញល្បឿនកសាងជាតិ ការកែលម្អ គុណភាពនៃជីវភាពរស់នៅរបស់ប្រជាជន ការដំឡើងតម្លៃសីលធម៌ ព្រមទាំងការការពារលើកកម្ពស់មរតកវប្បធម៌និងអត្តសញ្ញាណជាតិ ។
និង ៦-ការលើកកម្ពស់គុណភាព និងប្រសិទ្ធភាពនៃសេវាសាធារណៈ ដើម្បីឆ្លើយតបទៅនឹងសំណូមពរ និងសេចក្តីត្រូវការរបស់ប្រជាជន ហើយទទួលបាននូវការពេញចិត្តពីសំណាក់ប្រជាជន។ បន្ថែមលើនេះ គណបក្សប្រជាជនកម្ពុជាផ្តល់អាទិភាពពិសេសទៅលើការអភិវឌ្ឍយុវជន ដែលជាសសរទ្រូង និងជាកម្លាំងបន្តវេន ក្នុងការកសាង និងការពារប្រទេសជាតិ ក៏ដូចជាការលើកកម្ពស់សិទ្ធិស្ត្រីកុមារ និងជនពិការ ព្រមទាំងការជួយគាំពារដល់ក្រុមជនងាយរងគ្រោះក្នុងសង្គមឲ្យមានជីវភាពរស់នៅបានសមរម្យ ស្របជាមួយការរីកចម្រើននៃសង្គមជាតិ។
ជាមួយគ្នានោះគណបក្សប្រជាជនកម្ពុជាគាំទ្រការបង្កើតច្បាប់ ស្តីពីសមាគម និងអង្គការមិនមែនរដ្ឋាភិបាលនិងច្បាប់ស្តីពសហជីព ដើម្បីការពារទ្រទ្រង់សិទ្ធិ សេរី ភាពនិងផលប្រយោជន៍របស់សមាគម អង្គការមិនមែនរដ្ឋាភិបាល និងសហជីពទាំងអស់ និងផលប្រយោជន៍ សាធារណៈព្រមទាំងធានាឲ្យកិច្ចដំណើរការរបស់អង្គការទាំងនេះ ប្រព្រឹត្តទៅប្រកបដោយប្រសិទ្ធភាព ស្របតាមគោលការណ៍ នីតិរដ្ឋ និងអភិបាលកិច្ចល្អ។ គណបក្សប្រឆាំងដាច់ខាត ចំពោះរាល់ទង្វើជ្រៀតជ្រែកពីមជ្ឈដ្ឋានបរទេសចូលក្នុងដំណើរការនេះ ដែលជាការរំលោភបំពានលើឯករាជ្យ និងអធិបតេយ្យរបស់កម្ពុជា ហើយអំពាវនាវឲ្យមានការគោរពចំពោះព្រះរាជាណាចក្រកម្ពុជា ដែលជារដ្ឋអធិបតេយ្យ និងជាសមាជិកមួយនៃអង្គការសហប្រជាជាតិ។
គណបក្សប្រជាជនកម្ពុជា គាំទ្រពេញទំហឹងចំពោះការប្តេជ្ញាចិត្តមោះមុតរបស់រដ្ឋាភិបាលក្នុងកិច្ចការពារអធិបតេយ្យជាតិ និងបូរណភាពទឹកដី ជាពិសេសការខិតខំដោះស្រាយបញ្ហាព្រំដែនជាមួយប្រទេសជតិខាង ដោយឈរលើមូលដ្ឋានរដ្ឋធម្មនុញ្ញ ច្បាប់ជាតិ ច្បាប់អន្តរជាតិ និងឯកសារគតិយុត្តពាក់ព័ន្ធនានា ដើម្បីកសាងខ្សែបន្ទាត់ព្រំដែនទាំងមូលជាមួយប្រទេសជិតខាង ទៅជាព្រំដែនស្ថិរភាព សន្តិភាព មិត្តភាព សហប្រតិបត្តិការ និងអភិវឌ្ឍន៍៕
សន្តិភាពស្ថិរភាពនយោបាយនិងការអភិវឌ្ឍន៍ជាសមិទ្ធផលដ៏ធំធេងមិនអាចកាត់ថ្លៃបាននៃជ័យជំនះ៧មករា
0 Comments