ភ្នំពេញ ៖ រដ្ឋមន្ត្រីក្រសួងទេសចរណ៍ បានណែនាំឲ្យប្រតិបត្តិករទេសចរណ៍ទូទាំងប្រទេសកុំដំឡើងថ្លៃសេវាកម្មនាឱកាសប្រឡងបាក់ឌុប ដើម្បីសម្រួលដល់ការចំណាយរបស់បេក្ខជនដែលមានជីវភាពក្រីក្រមកពីជនបទ។
លោកថោង ខុន រដ្ឋមន្ត្រីក្រសួងទេសចរណ៍បានមានប្រសាសន៍ថា ម្ចាស់អាជីវកម្មទេសចរណ៍ទាំងអស់ដែលរួមមានម្ចាស់សណ្ឋាគារ ផ្ទះសំណាក់ សេវាកម្មលក់ម្ហូបអាហារត្រូវរក្សាតម្លៃសេវាធម្មតានៅថ្ងៃប្រឡងបាក់ឌុបខាងមុខនេះបើអាចធ្វើទៅបាន។
ក្នុងសេចក្តីសេចក្តីជួនដំណឹងចេញផ្សាយកាលពីថ្ងៃ១៥ សីហា ឆ្នាំ២០១៨ រដ្ឋមន្ត្រីក្រសួងទេសចរណ៍មានប្រសាសន៍ថា ការដែលក្រសួងណែនាំឲ្យរក្សាតម្លៃសេវាកម្មទេសចរណ៍ធម្មតានេះ ដោយសារតែនៅថ្ងៃទី២០ដល់ថ្ងៃទី២១ ខែសីហាខាងមុខនេះ ក្រសួងអប់រំ យុវជន និងកីឡា នឹងរៀបចំការប្រឡងសញ្ញាបត្រមធ្យមសិក្សទុតិយភូមិទូទាំងប្រទេស ហើយសិស្សានុសិស្ស និងក្រុមការងារត្រូវបំណាស់ទីតាមមណ្ឌលប្រឡងផ្សេងៗដោយស្នាក់នៅទីរួមខេត្ត។
ក្រសួងទេសចរណ៍សង្ឃឹមជឿជាក់ថា «អស់លោក លោកស្រីជាប្រធានមន្ទីរទេសចរណ៍ សមាគមឧស្សាហកម្មទេសចរណ៍និង ម្ចាស់សេវាកម្មទេសចរណ៍ទាំងអស់ផ្តល់កិច្ចសហការ និងអនុវត្តន៍នូវខ្លឹមសារជូនដំណឹងនេះឲ្យមានប្រសិទ្ធភាព និងការទទួលខុសត្រូវខ្ពស់»។
លោកស៊ាន សុគន្ធ ប្រធានមន្ទីរទេសចរណ៍ខេត្តកំពង់ចាមបានគាំទ្រចំពោះការណែនាំនេះ ហើយលោកបានផ្សព្វផ្សាយសេចក្តីជួនដំណឹងនេះដល់ម្ចាស់អាជីវកម្មទេសចរណ៍ មានដូចជាសណ្ឋាគារ ផ្ទះសំណាក់ សេវកម្មលក់ម្ហូបអាហាទូទាំងខេត្តមិនត្រូវឡើងថ្លៃឡើយ។
លោកបានបន្តថា« ការរក្សាតម្លៃធម្មតានេះ និងអាចចូលរួមលើកទឹកចិត្តដល់សិស្សានុសិស្សក្រីក្រមកពីបណ្តាស្រុកឆ្ងាយៗឲ្យមានលទ្ធភាពចូលរួមប្រឡងបាក់ឌុបនេះបានរលួនដូចសិស្សទូទៅផងដែរ។ ម្យ៉ាងវិញទៀត ម្ចាស់សេវាកម្មទេសចរណ៍ក៏ចំណេញដែរ ព្រោះកាលណាជួលបន្ទប់ និងលក់ម្ហូបអាហារច្រើនក៏ទទួលបានផលកំរៃតាមនេះដែរ»។
គួរបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិនៅឆ្នាំនេះនឹងប្រព្រឹត្តិទៅនៅថ្ងៃទី២០និង២១ ខែសីហា ឆ្នាំ២០១៨ ខាងមុខដោយមានបេក្ខជនចូលរួមប្រឡងចំនួន១១៧ ០៦១នាក់កើនឡើងជាងឆ្នាំមុនជិត១៤០ ០ ០នាក់និងមាន១៩៥មណ្ឌលចែកជា៤៧១៦បន្ទប់ នៅតាមរាជធានីខេត្តទូទាំងប្រទេស៕
Source: Kampuchea Thmey Daily
0 Comments