កំពង់ស្ពឺ ៖ ក្មេងទំនើងមួយក្រុមបានជិះម៉ូតូស៊េរីទំនើបបង្ហោះនៅតាមសួនច្បារ ដែលអាជ្ញាធរខេត្តទើបធ្វើរួចរាល់សម្រាប់ជាសម្បត្តិសាធារណៈក្នុងខេត្តនោះ ត្រូវបានកងកម្លាំងកងរាជអាវុធហត្ថចាប់យកមកអប់រំ និងឲ្យម្តាយឪពុកមកធានាយកទៅអប់រំបន្ត។
ករណីបង្កភាពអនាធិបតេយ្យបាត់បង់សណ្ដាប់ធ្នាប់សាធារណៈខាងលើបានកើតឡើងកាលពីវេលាម៉ោង២១និង៣០នាទីថ្ងៃទី០៨ ខែមករា ឆ្នាំ២០១៥ ស្ថិតនៅសួនច្បារមុនសាលាខេត្តកំពង់ស្ពឺ ក្នុងភូមិទួលគោក សង្កាត់ស្វាយក្រវ៉ាន់ ក្រុងច្បារមនខេត្តកំពង់ស្ពឺ។ ករណីនេះបង្កឡើង ដោយយុវជនឈ្មោះឆាង ពេជ្រ ភេទប្រុសអាយុ ២១ឆ្នាំ មុខរបរលក់-ទិញម៉ូតូ រស់នៅភូមិថ្នល់កែង ឃុំតាំងក្រូច ស្រុកសំរោងទង ខេត្តកំពង់ស្ពឺ។
យោងតាមការណែនាំរបស់លោក អ៊ូ សំអួន អភិបាលខេត្តកំពង់ស្ពឺ លើការងាររឹតបន្តឹងសន្តិសុខសណ្ដាប់ធ្នាប់សាធារណៈក្នុងឱកាសរំលឹកខួបលើកទី៣៦ថ្ងៃ៧មករា ២០១៤-២០១៥ កងរាជអាវុធហត្ថបានដាក់ពង្រាយ កងកម្លាំងការពារនៅតាមចំណុចសំខាន់ៗជាច្រើននានាក្នុងខេត្ត។
សាក្សីបានឲ្យដឹងថា នៅវេលាខាងលើគេបានឃើញក្រុមក្មេងៗទំនើងដែលមាន ម៉ូតូ២ទៅ៣គ្រឿងបាននាំគ្នាជិះដេញគ្នាប្រសេចប្រសាចនៅមុខសាលាខេត្ត ម្តុំសួនច្បារជាប់មាត់ស្ទឹងដែលជាចំណុចមានមនុស្សអ៊ូអរ មកទស្សនានិងដើរលេង ខណៈអាជ្ញាធរខេត្តកំពង់រៀបចំពិធីអបអរបុណ្យរំលឹកខួបលើកទី៣៦ថ្ងៃ៧មករាជាប្រវត្តិសាស្ត្រ របស់ប្រជាជនកម្ពុជាទាំងមូល។
សមត្ថកិច្ចកងរាជអាវុធហត្ថ បានឲ្យដឹងថា កម្លាំងកងរាជអាវុធហត្ថ ដែលបានដាក់យាមតាមគោលដៅបានចាប់ក្មេងទំនើងខាងលើរួមទាំងម៉ូតូចំនួន ២គ្រឿង ម៉ាក និក(NEX) ពណ៌ខៀវមិនមានស្លាកលេខ និងមួយគ្រឿងទៀតម៉ាក ស្សូមមើ (Zoomer RX)ពណ៌ទឹកក្រូច មិនមានពាក់ស្លាកលេខដូចគ្នា ខណៈពួកគេបានបើកបរបង្កការភ័យខ្លាចដល់ពលរដ្ឋដែលកំពុងឈរលេងនៅតាមសួនច្បារ ដែលសាលាខេត្តកំពុងសាងសង់ឲ្យមានសោភណភាពនោះ។
សូមរំលឹកថា ក្រោមកិច្ចដឹកនាំរបស់លោកអភិបាលខេត្តនាអាណត្តិនេះបានអភិវឌ្ឍន៍លើគ្រប់វិស័យក្នុងនោះការងារសន្តិសុខត្រូវបានរឹតបន្តឹងនៅគ្រប់តំបន់ក្នុងខេត្ត បូករួមទាំងការកសាងគ្រប់ហេដ្ឋារចនាសម្ព័ន្ធ និងសោភណភាពនៅតាមទីសាធារណៈនានានៅទូទាំងខេត្ត។ មិនតែប៉ុណ្ណោះនៅតាមអង្គភាពមន្ទីរជុំវិញក៏ បានរៀបចំរបស់អង្គភាពរបស់ខ្លួនបានស្អាត និងមានរបៀបរៀបរយជាងមុន។ ដូចនេះសន្តិសុខជុំវិញខេត្តត្រូវតែបង្ក្រាបបើទោះក្រុមទាំងនោះមានខ្នងបង្អែកឬមានអ្នកធំណាកាងពីក្រោយក៏មិនរួចខ្លួនដែរ៕
0 Comments