ភ្នំពេញ ៖ បុរសម្នាក់ត្រូវបានសមត្ថកិច្ចប៉ូលិសប៉ុស្តិ៍បឹងកក់ទី២ធ្វើការឃាត់ខ្លួនដើម្បីកសាងសំណុំរឿងចាត់ការទៅតាមច្បាប់ ក្រោយពេលដែលបុរសម្នាក់នេះបានធ្វើសកម្មភាពឆបោកយកម៉ូតូមិត្តភក្តិមួយគ្រឿង ហើយនៅពេលគេចខ្លួនបានរយៈពេលប្រមាណ៣ខែត្រូវម្ចាស់ម៉ូតូឃើញទើបចាប់ខ្លួនប្រគល់ជូនប៉ូលិសតែម្តង។
ជនសង្ស័យត្រូវបានឃាត់ខ្លួនកាលពីរាត្រីថ្ងៃទី០៨ ខែមករា ឆ្នាំ២០១៥វេលាម៉ោង២០ នៅចំណុចផ្សារធំថ្មី ខណ្ឌដូនពេញ។
ជនសង្ស័យម្នាក់នេះត្រូវបានសមត្ថកិច្ចប៉ូលិសខណ្ឌទួលគោកប្រាប់ឲ្យស្គាល់ ឈ្មោះកាង សំអាង ហៅម៉ាប់ ភេទប្រុស អាយុ២៩ឆ្នាំ មុខរបរមិនពិតប្រាកដ ស្នាក់នៅផ្ទះលេខ១១៧ ផ្លូវលំ សង្កាត់ក្រាំងធ្នុង ខណ្ឌពោធិ៍សែនជ័យ។ ជនសង្ស័យរូបនេះបានធ្វើសកម្មភាពឆបោកយកម៉ូតូជនរងគ្រោះម៉ាកហុង ដាសេ១២៥ពណ៌ខ្មៅ ស៊េរី២០១៤ពាក់ស្លាកលេខភ្នំពេញ1C 9420ដែលជាកម្មសិទ្ធិរបស់ជនរងគ្រោះឈ្មោះងន់ សំអន ភេទ ប្រុស អាយុ២៥ឆ្នាំ មានមុខរបរជាអ្នករកស៊ីបិទស្កុតម៉ូតូ ស្នាក់នៅសង្កាត់បឹងសាឡាង ខណ្ឌទួលគោក។
មន្ត្រីប៉ូលិសនិយាយឲ្យដឹងថា កាលពីរសៀលថ្ងៃទី០៨ ខែតុលា ឆ្នាំ២០១៤កន្លងមកនេះ ដោយជនសង្ស័យជាមនុស្សស្គាល់គ្នាជាមួយជនរងគ្រោះនោះ ក៏បានមកតូបបិទស្កុតម៉ូតូរបស់ជនរងគ្រោះដែលមានទីតាំងស្ថិតនៅតាមបណ្ដោយផ្លូវ៣១៧ សង្កាត់បឹងកក់ទី២ ខណ្ឌទួលគោក ដើម្បីអង្គុយលេង ហើយនៅពេលអង្គុយលេងបានប្រមាណមួយម៉ោងជនសង្ស័យរូបនេះបានខ្ចីម៉ូតូជនរងគ្រោះ ថាទៅយកខោអាវមួយភ្លែត។ ក្រោយពីបានម៉ូតូដល់ដៃហើយជនសង្ស័យបានយកទៅបាត់រហូត។ លុះមកដល់យប់ថ្ងៃកើតហេតុជនរងគ្រោះបានឃើញ ជនសង្ស័យរូបនេះកំពុងអង្គុយហូបអីនៅផ្សារធំថ្មីទើបចាប់ខ្លួនយកមកប្រគល់ឲ្យប៉ូលិសប៉ុស្តិ៍បឹងកក់ទី២ចាត់ការតាមច្បាប់តែម្តង៕
0 Comments