ភ្នំពេញ ៖ អតីតពិធីការិនីទូរទស្សន៍ស៊ីធីអិនកញ្ញា សាសា ក្រោយពីរងការធ្វើបាបពីអ្នកមានអំណាចម្នាក់គឺអតីតមានងារជាឧកញ៉ាលោក សុខ ប៊ុន ហើយត្រូវបានចេញទៅព្យាបាលជំងឺនៅក្រៅប្រទេសអស់រយៈពេលជាច្រើនថ្ងៃមកនោះ ឥឡូវនាងបានប្រកាសត្រៀមវិលត្រឡប់មកស្រុកវិញហើយស្របពេលនាងបានបញ្ចេញសារ តាមរយៈបណ្តាញសង្គមហ្វេសប៊ុក។
នៅក្នុងខ្លឹមសារ ដែលសរសេរបង្ហោះនៅក្នុងបណ្តាញសង្គមហ្វេសប៊ុកកញ្ញា សាសា បាននិយាយយ៉ាងខ្លីថា «គេងក្រោកៗ ឥឡូវមុខឡើងប៉ោង ស្អែកបានទៅវិញហើយ!!!!។ តាមរយៈអត្ថន័យខាងលើអាចបញ្ជាក់ថា កញ្ញា សាសានឹងត្រូវវិលត្រឡប់មកវិញនៅថ្ងៃទី២៨ ខែកក្កដា នេះ ខណៈអាការៈជំងឺរបស់នាងបានធូរស្បើយហើយនោះ។
កម្ពុជាថ្មីនៅព្រលប់ថ្ងៃទី២៨ ខែកក្កដា ឆ្នាំ២០១៥នេះមិនអាចសុំការបកស្រាយបន្ថែមពីកញ្ញា សាសា បាននៅឡើយទេ ព្រោះលេខទូរស័ព្ទរបស់នាងមិនអាចទំនាក់ទំនងបាន។
គូរម្លឹកថា ចាប់តាំងពីបែកធ្លាយវីឌីអូបង្ហាញពីការប្រើអំពើហិង្សារបស់លោក សុខ ប៊ុន ទៅលើអតីតពិធីការិនី សាសា កាលថ្មីៗមកនោះវាបានក្លាយជារឿង ដ៏រំជើបរំជួលតាមបណ្ដាញផ្សព្វផ្សាយនានា ពាក្យនិន្ទារិះគន់យ៉ាងច្រើន ក៏បានបាញ់ស្រោចយ៉ាងខ្លាំងទៅលើលោក សុខ ប៊ុន បន្ទាប់ពីគេបានឃើញវីដេអូឃ្លីបនោះមករហូតធ្វើឲ្យលោកម្នាក់នេះអាម៉ាស់មុខលាឈប់ពីដំណែងជាឧកញ៉ា និងត្រូវចូលខ្លួនទទួលទោសនៅគុកព្រៃសកាលពីមុននេះ៕
សាសា ត្រៀមត្រឡប់មកកម្ពុជាវិញ
0 Comments