នៅថ្ងៃអង្គារ លោកប្រធានាធិបតី បារ៉ាក់ អូបាម៉ា នឹងណែនាំពីសកម្មភាពប្រតិបត្តិមួយ ដើម្បីព្យាយា មបន្ធូរបន្ថយអំពើហិង្សាកាំភ្លើងនៅសហរដ្ឋអាមេរិក ដោយឆ្លងកាត់សភា ហើយដំណើរការនៅឆ្នាំ២០១៦ ដោយចាប់ផ្តើមកាលពីឆ្នាំមុននៅក្នុងសេតវិមាន លោក អូបាម៉ា នឹងមិនអើពើអំពីគណបក្សប្រឆាំងទេ ហើយចាត់វិធានជាឯកតោភាគី ដើម្បីគ្រប់គ្រងការលក់កាំភ្លើង និងទប់ស្កាត់ការទិញខុសច្បាប់ ។
អគ្គមេធាវី Loretta Lynch បាននិយាយថា វិធានការនេះនឹងរឹតបន្តឹងច្បាប់លើអ្នកត្រូវតែចុះឈ្មោះជា ឈ្មួញកាំភ្លើង ហើយអ្នកទិញត្រូវតែពិនិត្យមើលជីវប្រវត្តិ។
វានឹងជំរុញឲ្យមន្ទីរបញ្ចកោណទទួលបានអាវុធពីក្រុមហ៊ុនផលិត ដែលបានប្រើ “បច្ចេកវិទ្យាសុវត្ថិភាពកាំភ្លើង” ដូចជាម៉ាស៊ីនស្កេនស្នាមម្រាមដៃ។
លោក អូបាម៉ា នឹងពិភាក្សាពីវិធានការថ្មីនេះ នៅក្នុងបន្ទប់ខាងកើតនៃសេតវិមាននៅថ្ងៃអង្គារ។
មនុស្សប្រមាណជា ៣០.០០០ នាក់បានស្លាប់នៅក្នុងអំពើហិង្សាកាំភ្លើងជារៀងរាល់ឆ្នាំ នៅក្នុងសហអាមេរិក ខណៈភាគច្រើនគឺដោយសារការធ្វើអត្តឃាត។
ក្នុងអំឡុងពេលលោក អូបាម៉ា កាន់តំណែងជាប្រធានាធិបតីរយៈពេល៧ឆ្នាំ លោកជាញឹកញាប់បានបង្ហាញកំហឹង និងការខកចិត្ត ចំពោះការបដិសេធរបស់សភា ក្នុងការរឹតបន្តឹងការគ្រប់គ្រងកាំភ្លើង។
នៅមុនថ្ងៃនៃសេចក្ដីប្រកាសនេះ លោក អូបាម៉ា បានទទួលស្គាល់ថា សកម្មភាពប្រតិបត្តិរបស់លោកនឹងមិនត្រូវបានដោះស្រាយដល់រាល់បទល្មើសហិង្សា នៅក្នុងប្រទេសនេះទេ។ វានឹងមិនទប់ស្កាត់រាល់ការបាញ់ប្រហារធំមួយឡើយ។ វានឹងមិនអាចយកគ្រប់កាំភ្លើងចេញពីដៃរបស់ឧក្រិដ្ឋជនបានឡើយ។
ប៉ុន្តែលោកបាននិយាយថា “វានឹងអាចជួយជីវិតនៅក្នុងប្រទេសនេះ ហើយបន្ថយភាពឈឺចាប់របស់ក្រុមគ្រួសារនានា”។
ទោះបីជាយ៉ាងណាក៏ដោយ បេក្ខជនប្រធានាធិបតីជាច្រើនរូបនៃគណបក្សសាធារណរដ្ឋ និងប្រធានសភាលោក Paul Ryan បានចោទប្រកាន់លោកអូបាម៉ាថាបានប្រឆាំងចំពោះជនជាតិអាមេរិក ដែលមានតម្លៃសិទ្ធិរដ្ឋធម្មនុញ្ញក្នុងការទទួលបានអាវុធ។
លោក Ryan បានឲ្យដឹងថា “យើងទាំងអស់គ្នារងការឈឺចាប់ ដោយអំពើឃោរឃៅនាពេលថ្មីៗនេះនៅក្នុងប្រទេសរបស់យើង ប៉ុន្តែទង្វើរបស់ប្រធានាធិបតីអាចរារាំងពួកគេបានទេ។ យើងបានឃើញជាប់លាប់ថា មូលហេតុនៃការវាយប្រហារទាំងនេះបានក្លាយជាជំងឺផ្លូវចិត្ត”។
ការស្ទង់មតិនានាបានបង្ហាញថា ជនជាតិអាមេរិកភាគច្រើនបានគាំទ្រច្បាប់កាន់កាប់កាំភ្លើងតឹងរ៉ឹងជាងមុន។ ប៉ុន្តែការគាំទ្រនោះមានការថយចុះ ដោយសារតែការព្រួយបារម្ភអំពីក្រុមរដ្ឋឥស្លាម និងការគំរាមកំហែងកាន់តែធំពីក្រុមភេរវកម្ម។
ផែនការរបស់ លោក អូបាម៉ា អាចនឹងដាក់សម្ពាធចំពោះសម្ព័ន្ធមិត្តនៃគណបក្សប្រជាធិបតេយ្យរបស់គាត់ ដែលនឹងប្រឈមមុខនឹងការបោះឆ្នោតដ៏លំបាក៕
AFP
លោក អូបាម៉ា បង្ខំចិត្តចាត់វិធានការ ចំពោះការគ្រប់គ្រងកាំភ្លើង
0 Comments