ក្លិបបាល់ទាត់គីរីវង់សុខសែនជ័យ ដែលមានមូលដ្ឋាននៅខេត្តតាកែវ សមាជិកក្នុងពានរង្វាន់លីគលំដាប់ទី២កម្ពុជាកាលពីឆ្នាំ២០១៧ ទំនងនឹងទទួលបានកៅអីចូលរួមក្នុងពានរង្វាន់លីគកំពូលកម្ពុជា (Metfone Cambodian League) ដោយស្វ័យប្រវត្តិដើម្បីជំនួសកៅអីក្រុមវេស្ទើនភ្នំពេញ ដែលប្រកាសរំសាយក្រុមកាលពីពេលថ្មីៗ ដោយសារបញ្ហាហិរញ្ញវត្ថុ។
យ៉ាងណាក្តីដំណឹងនេះស្ថិតនៅជាពាក្យចចាមអារ៉ាមនៅឡើយ ខណៈគណៈកម្មការប្រកួតបាល់ទាត់ជាតិកម្ពុជា (CNCC) នៅមិនទាន់ចេញសេចក្តីជូនដំណឹងណាជាក់លាក់នៅឡើយ។ ម្យ៉ាងសហព័ន្ធកីឡាបាល់ទាត់កម្ពុជា ក៏មិនទាន់រៀបចំកម្មវិធីប្រកួតបាល់ទាត់លីគលំដាប់ទី២សម្រាប់ឆ្នាំ២០១៨ នៅឡើយដែរមកទល់នឹងចុងខែធ្នូ នេះ។ កាលពីរដូវកាលឆ្នាំ២០១៨ កន្លងទៅគឺសហព័ន្ធកីឡាបាល់ទាត់កម្ពុជា បានសម្រេចឱ្យក្រុមខ្លាំងចំនួន២មកពីលីគលំដាប់ទី២ ឡើងទៅលេងក្នុងពានរង្វាន់លីគកំពូលកម្ពុជា ដែលជម្រុះក្រុមបាតតារាងចំនួន២ក្រុមចេញ។
យ៉ាងណាក្តីក្លិបគីរីវង់សុខសែនជ័យ បានបង្ហាញពីការត្រៀមខ្លួនយ៉ាងសកម្មក្រោយការការដឹកនាំពីសំណាក់គ្រូបង្វឹកថ្មីគឺលោក Ekapob Potisai ដែលជាអតីតកីឡាករជម្រើសជាតិថៃ ជំនាន់និងជាអតីតគ្រូបង្គោលនៃក្លឹប Savan United នៃលីគកំពូលឡាវផងដែរ។ យ៉ាងណាក្តីក្លិបនេះមានលោក សុខ ពុទ្ធិវុធ ជាប្រធានក្លិបហើយមានលោក ឌុក វាសនា ជាអ្នកចាត់ការទូទៅរបស់ក្លិបផងដែរ។
ក្រុមគីរីវង់សុខសែនជ័យ បានធ្លាក់ទៅចេញពីពានរង្វាន់លីគកំពូលកម្ពុជា (Metfone Cambodian League) កាលពីឆ្នាំ២០១៧ កន្លងទៅក្រោយឈរលេខរៀងទី១២ ក្នុងចំណោមក្រុមជាសមាជិកទាំង១២នៅឆ្នាំនោះ។ ទន្ទឹមនឹងគ្នានេះដែរលោក ផាន់ ចាន់ផាត ដែលជាគ្រូបង្វឹកចាស់ធ្លាប់បានដឹកនាំជាច្រើនឆ្នាំមកនេះត្រូវបានក្លិបប្តូរតួរនាទីទៅជាគ្រូជំនួយវិញ។
សម្រាប់នៅឆ្នាំ២០១៨ នេះក្រុមគីរីវង់សុខសែនជ័យ បានចូលរួមក្នុងពានរង្វាន់សម្តេចអគ្គមហាសេនាបតីតេជោ ហ៊ុន សែន ដោយចាញ់ក្រុមយុវជនសាលាបាល់ទាត់ជាតិបាទី ដោយលទ្ធផល ២ទល់១ ក្នុងវគ្គផ្តាច់ព្រ័ត្រជើងឯកថ្នាក់ខេត្ត។ ប៉ុន្តែពេលឡើងដល់វគ្គជម្រុះថ្នាក់ជាតិបានធ្លាក់ត្រឹមវគ្គ១៦ក្រុមចុងក្រោយ បន្ទាប់ពីចាញ់ក្រុមអគ្គស្នងការដ្ឋាននគរបាលជាតិដោយលទ្ធផល៣ទល់២៕
Source: Kampuchea Thmey Daily
0 Comments