អាជ្ញាធរបាននិយាយកាលពីថ្ងៃសុក្រថា ពួក Hacker បានលួចទិន្នន័យសុខភាពរបស់ពលរដ្ឋសិង្ហបុរីចំនួន១.៥លាននាក់រួមទាំងលោកនាយករដ្ឋមន្ត្រី Lee Hsien Loong ផងដែរ។
ក្រសួងសុខាភិបាលនិងក្រសួងព័ត៌មានរបស់ប្រទេសសិង្ហបុរីបាននិយាយថា ទិន្នន័យរបស់រដ្ឋាភិបាលត្រូវបានវាយប្រហារដោយចេតនា តម្រង់គោលដៅនិងរៀបចំផែនការបានយ៉ាងល្អ។ ក្រសួងទាំងពីរបានហៅការវាយប្រហារនេះថា “មិនធ្លាប់មានពីមុនមក”។
រដ្ឋមន្ត្រីក្រសួងសុខាភិបាលលោក Gan Kim Yong បានប្រាប់សន្និសីទសារព័ត៌មានមួយថា “អ្នកវាយប្រហារបានកំណត់គោលដៅជាពិសេសនិងម្តងហើយម្តងទៀតទៅលើព័ត៌មានផ្ទាល់ខ្លួននិងព័ត៌មានជំងឺរបស់លោកនាយករដ្ឋមន្ត្រី Lee Hsien Loong”។
ទោះបីជាយ៉ាងណាក៏ដោយ ក្រុមមន្ត្រីបានបដិសេធធ្វើអត្ថាធិប្បាយអំពីអត្តសញ្ញាណរបស់ពួក Hacker ដោយលើកឡើងពីបញ្ហា “សន្តិសុខប្រតិបតិ្តការ” ប៉ុន្តែបាននិយាយថា ទិន្នន័យរបស់លោកនាយករដ្ឋមន្ត្រីមិនបានបង្ហាញលើអ៊ីនធឺណិតនៅកន្លែងណាមួយទេ។
អាជ្ញាធរបាននិយាយថា ពួក Hacker បានប្រើប្រាស់កុំព្យូទ័រដែលមានកម្មវិធីមេរោគដើម្បីទទួលបានការចូលទៅមើលទិន្នន័យចន្លោះថ្ងៃទី២៧ខែមិថុនាដល់ថ្ងៃទី៤ខែកក្កដាមុនពេលអ្នកគ្រប់គ្រងបានប្រទះឃើញ “សកម្មភាពមិនធម្មតា”។
ក្រសួងសុខាភិបាលនិងក្រសួងគមនាគមន៍បាននិយាយថា ទិន្នន័យទាំងនោះរួមមានព័ត៌មានផ្ទាល់ខ្លួននិងការផ្តល់ថ្នាំដល់អ្នកជំងឺប៉ុន្តែកំណត់ត្រាវេជ្ជសាស្ត្រនិងកំណត់ត្រាព្យាបាលមិនត្រូវបានប៉ះពាល់នោះទេ។
កាលពីអតីតកាល ពួក Hacker មួយចំនួនបានយកទិន្នន័យនិងកម្មវិធីដែលលួចបានដើម្បីលក់តាមអ៊ីនធឺណិត។
ប្រទេសសិង្ហបុរីមានទំនាក់ទំនងយ៉ាងជិតស្និទ្ធជាមួយប្រព័ន្ធឌីជីថលនិងសេវាកម្មសំខាន់ៗរាប់បញ្ចូលទាំងកំណត់ត្រាវេជ្ជសាស្ត្រផងដែរដែលមន្ទីរពេទ្យនិងគ្លីនិករដ្ឋអាចចែករំលែកតាមរយៈប្រព័ន្ធទិន្នន័យកណ្តាល៕ AFP
Source: Kampuchea Thmey Daily
0 Comments