ភ្នំពេញ ៖ ប្រធានគណបក្សសម្ព័ន្ធដើម្បីប្រជាធិបតេយ្យ (LDP) លោក ខឹម វាសនា បានអះអាងថា ការធ្វើយុទ្ធនាការម្រាមដៃស្អាតរបស់ក្រុមលោក សម រង្ស៊ី គឺដើម្បីផលប្រយោជន៍ខ្លួន ប៉ុន្តែសកម្មភាពនេះ មិនចេះតែធ្វើបានទេ ហើយមកដល់ពេលនេះ គេកំពុងតែបារម្ភថា ការអំពាវនាវឲ្យម្រាមដៃស្អាតនេះ នឹងបរាជ័យ ទើបគេមានគម្រោងបាតុកម្មនៅថ្ងៃស ដើម្បីឈប់កុំឲ្យសកម្មជនរបស់ខ្លួនចេញទៅបោះឆ្នោត។
លោក ខឹម វាសនា លើកឡើងបែបនេះ នៅក្នុងសន្និសីទសារព័ត៌មានមួយ កាលពីថ្ងៃទី១៩ ខែកក្កដា ឆ្នាំ២០១៨ ស្តីពីជំហររបស់គណបក្ស ចំពោះការបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ ជាពិសេសទាក់ទងការគូសសញ្ញាគាំទ្រគណបក្សនៅពេលបោះឆ្នោត។
លោក ខឹម វាសនា ថ្លែងយ៉ាងនេះថា “ការអំពាវនាវឲ្យម្រាមដៃស្អាតនេះ គឺដើម្បីផលប្រយោជន៍ខ្លួនរបស់ពួកគេទេ ក៏ប៉ុន្តែបងប្អូន វាមិនចេះតែធ្វើបានទេ គេកំពុងតែមានការបារម្ភថា ការអំពាវនាវឲ្យម្រាមដៃស្អាតរបស់ពួកគេ ថានឹងបរាជ័យ ហេតុអីខ្ញុំថា បរាជ័យ គេមានអារម្មណ៍ថាបរាជ័យ ពីព្រោះគេចង់ធ្វើបាតុកម្មធំ នៅថ្ងៃស ជាពិសេសបាតុកម្មនៅក្រៅប្រទេស ខ្ញុំថា អាហ្នឹងបែបអត់ទុកចិត្តអាការអំពាវនាវហ្នឹង បានអត់ទុកចិត្តការអំពាវនាវមិនឲ្យទៅបោះឆ្នោតហ្នឹងទេ។ ចឹងហើយបានខិតខំធ្វើបាតុកម្មនៅថ្ងៃសហ្នឹងណា ដើម្បីកុំឲ្យគេ ទៅបោះឆ្នោត ចឹងមានន័យថា ការអំពាវនាវហ្នឹងអត់ប្រសិទ្ធភាពទេ”។
តាមលោក ខឹម វាសនា “អ្នកដែលមិនទៅបោះឆ្នោតហ្នឹង ភាគច្រើនពួកអាដើរក្រឡុក ក្រឡុកតាមហ្វេសប៊ុក តាមអីហ្នឹងណា វាដើរនិយាយហើយ...សរុបមកអាយុទ្ធនាការម្រាមដៃស្អាតនេះ មិនមែនដើម្បីប្រទេសជាតិទេ ដើម្បីមុខមាត់របស់វា។ ខ្ញុំគិតថា មាន២០ ទៅ៣០ភាគរយ មិនទៅបោះឆ្នោត ហើយ៧០ ភាគរយនឹងទៅបោះឆ្នោត ចឹងការដែលថា ម្រាមដៃស្អាតហ្នឹងបរាជ័យហើយ ទី១ ដើម្បីប្រយោជន៍ផ្ទាល់ខ្លួន មិនមែនដើម្បីប្រយោជន៍ជាតិ ទី២ អាមធ្យោបាយហ្នឹងបរាជ័យ មិនបានសម្រេចទេ”។
ប្រធានគណបក្សសម្ព័ន្ធដើម្បីប្រជាធិបតេយ្យ (LDP) លោក ខឹម វាសនា លើកឡើងដែរថា ស្ថានភាពបច្ចុប្បន្នមិនមានគណបក្សណាអាចយកឈ្នះគណបក្សប្រជាជនកម្ពុជាបានទេ ហើយក៏មិនអាចទៅពឹងបរទេស ឲ្យមកគាបសង្កត់រាជរដ្ឋាភិបាល ហើយមិនអាចប្រើបាតុកម្មដើម្បីទម្លាក់រាជរដ្ឋាភិបាលបានដែរ ដូច្នេះនៅកម្ពុជា ការបោះឆ្នោត គឺជាជម្រើសតែមួយគត់។ លោកបញ្ជាក់យ៉ាងនេះថា “មិនអាចអ្នកណាយកឈ្នះ គណបក្សប្រជាជនកម្ពុជាបានទេ ចឹងលទ្ធផលខ្ញុំគិតថា គណបក្សប្រជាជនកម្ពុជានឹងឈ្នះ ប៉ុន្តែយើងមិនអាចទៅពឹងបរទេសមកគាបសង្កត់រាជរដ្ឋាភិបាលបានទេ យើងមិនអាចប្រើបាតុកម្មដើម្បីទម្លាក់រាជរដ្ឋាភិបាលកម្ពុជា អត់អាច ដូច្នេះការបោះឆ្នោតទៅយុត្តិធម៌ ឬមិនយុត្តិធម៌ គឺវាជាផ្លូវតែមួយគត់...បាតុកម្ម ឬពឹងពាក់បរទេសមិនមែនជាផ្លូវទេ”។
លោក ខឹម វាសនា លើកឡើងដែរថា កាលលោកនៅជាមួយលោក សម រង្ស៊ី លោកបានមើលឃើញថា នៅក្នុងគណបក្សនោះ បរិបូណ៌ទៅដោយមនុស្សចាក់រុក ឆ្កឹះឆ្កៀល បំប៉ោងសភាពការណ៍ វាមិនមែនជាគណបក្សមួយស្រឡាញ់ប្រទេសជាតិ ឬជាគណបក្ស ដែលអាចដឹកនាំប្រទេសបាននោះទេ ហេតុនេះហើយបានជាលោកចាកចេញមកបង្កើតគណបក្សមួយ ហើយ “ខ្ញុំយល់ថា គណបក្សហ្នឹងថ្ងៃណាមួយគង់នឹងរលាយទេ ពីព្រោះបើទោះបីជារដ្ឋាភិបាលហ្នឹង ជាគណបក្សថ្មី ក៏មិនអាចទទួលយកបានដែរ អ្នកណាទុកបាន ចង្រៃខ្លាំងណាស់ ខ្ញុំថាមិនត្រូវមានវត្តមានគណបក្សបែបហ្នឹងនៅស្រុកខ្មែរទេ។ ចឹងហើយបានជាសកម្មជនថាតាមមេវា ថាខ្ញុំជាក្មួយ ជាម យៀប ថាជាអាយ៉ងស្អីៗហ្នឹង ខ្ញុំថាហ្អែងចាំមើល ពាក្យសម្តីហ្នឹងខ្ញុំបានសរសេរទុកក្នុងហ្វេសប៊ុកយូរហើយ តាំងពីគណបក្សសង្គ្រោះជាតិមិនទាន់រលាយមកម្លេះ ខ្ញុំថាហ្អែងចាំមើលអ្នកណារលាយមុន ហើយរលាយហ្នឹងហ្អែងកុំថា មកពីគណបក្សប្រជាជន គឺមកពីអត្តចរិតគណបក្សហ្អែងវាចឹង គេអត់អោនឲ្យមិនបាន កុំថាតែគណបក្សប្រជាជន រដ្ឋាភិបាលគណបក្សណាក៏គេមិនអាចអត់អោនឲ្យបានដែរ។ ចឹងសរុបមកគណបក្សហ្នឹងមិនគួរមានវត្តមាននៅលើទឹកដីកម្ពុជាទេ។ ពីព្រោះបើយើងចង់ផ្លាស់ប្តូររដ្ឋាភិបាល ដើម្បីឲ្យល្អ ចុះបើយកគណបក្សបែបនេះហ្នឹង ទៅម៉េចរួច។ វាអត់មានការលះបង់ វាមានតែការប្រមូលផ្តុំ ដើម្បីផលប្រយោជន៏ផ្ទាល់ខ្លួន រួចហើយធ្វើនយោបាយ បង្កើតគោលនយោបាយ ដើម្បីទាក់យកសន្លឹកឆ្នោត”៕
Source: Kampuchea Thmey Daily
0 Comments