សមាជិកសំខាន់ម្នាក់នៃក្រុមប្រឹក្សាយោបល់អន្ដរជាតិស្តីពីរដ្ឋរ៉ាក់ឃីន ដែលរងការវាយប្រហារដោយវិបត្តិគឺបានលាលែងពីតំណែងហើយ ដោយបានប្រាប់ AFP កាលពីថ្ងៃសៅរ៍ថា ក្រុមប្រឹក្សាដែលត្រូវបានតែងតាំងដោយលោកស្រី Aung San Suu Kyi មួយនេះ កំពុងប្រឈមនឹងហានិភ័យក្នុងការក្លាយទៅជា “ផ្នែកមួយនៃបញ្ហា” នៅក្នុងជម្លោះមួយដែលបានបង្ខំឲ្យជនមូស្លីមរ៉ូហ៊ីងយ៉ាប្រមាណ៧០០,០០០នាក់ភៀសខ្លួន។
សមាជិកព្រឹទ្ធសភាថៃចូលនិវត្តន៍និងជាឯកអគ្គរដ្ឋទូតលោក Kobsak Chutikul គឺជាលេខាធិការរបស់ក្រុមនេះដែលត្រូវបានជ្រើសរើសដោយមេដឹកនាំស៊ីវិលលោកស្រី Aung San Suu Kyi ដើម្បីផ្តល់ដំបូន្មានដល់រដ្ឋាភិបាលរបស់លោកស្រីអំពីរបៀបដោះស្រាយបញ្ហាក្រោយយុទ្ធនាការយោធាមួយដែលបានជំរុញជនជាតិភាគតិចចេញពីប្រទេស។
ការបង្ក្រាបដ៏ឃោរឃៅបានចាប់ផ្តើមកាលពីខែសីហាឆ្នាំមុននិងបានបណ្តាលឲ្យភូមិរ៉ូហ៊ីងយ៉ារាប់រយត្រូវរងការបំផ្លិចបំផ្លាញ។
លោក Kobsak Chutikul បាននិយាយថា តំណែងរបស់លោកបានក្លាយជាការមិនអាចទទួលយកបានមុនកិច្ចប្រជុំពេញអង្គលើកទីពីរនៃក្រុមប្រឹក្សានេះជាមួយមន្ត្រីក្នុងរដ្ឋធានី Naypyidaw របស់ប្រទេសមីយ៉ាន់ម៉ានៅសប្តាហ៍នេះ។
លោកបានប្រាប់ AFP តាមទូរស័ព្ទពីទីក្រុងបាងកកថា “ខ្ញុំបានប្រាប់អំពីលាលែងពីតំណែងនៅក្នុងកិច្ចប្រជុំបុគ្គលិកមួយកាលពីថ្ងៃអង្គារទី១០ខែកក្កដា”។ គាត់បាននិយាយថា ក្រុមប្រឹក្សានេះមានហានិភ័យអាចក្លាយជា “ផ្នែកមួយនៃបញ្ហា”។
គួរបញ្ជាក់ថា ភាពគួរទុកចិត្តរបស់ក្រុមប្រឹក្សាផ្តល់យោបល់នេះត្រូវបានរងការខូចខាតពីដំបូងដោយការលាលែងពីតំណែងរបស់អតីតអ្នកការទូតអាមេរិកលោក Bill Richardson ដែលធ្លាប់ជាអ្នកជិតស្និទ្ធ របស់លោកស្រី Suu Kyi ។
គាត់បានចាកចេញពីក្រុមប្រឹក្សានេះកាលពីខែមករានៅក្នុងសង្គ្រាមពាក្យសម្តីដ៏សាហាវមួយជាមួយម្ចាស់ជ័យលាភីពានរង្វាន់ណូបែល៕ AFP
Source: Kampuchea Thmey Daily
0 Comments