អតីតអង្គរក្សដែលរងភាពអាម៉ាស់នៅចំកណ្តាលរឿងអាស្រូវដ៏ធំបំផុតនៃតំណែងប្រធានាធិបតីដ៏ក្មេងខ្ចីរបស់លោក Emmanuel Macron នឹងត្រូវបង្ហាញខ្លួននៅថ្ងៃពុធមុខគណៈកម្មាធិការព្រឹទ្ធសភាមួយដែលនឹងសួរគាត់អំពីទំនាក់ទំនងជិតស្និទ្ធរបស់គាត់ជាមួយមេដឹកនាំបារាំង។
លោក Alexandre Benalla បានធ្វើឲ្យមានការផ្តោតអារម្មណ៍ទូទាំងពិភពលោកកាលពីខែកក្កដាបន្ទាប់ពីសារព័ត៌មាន Le Monde បានបង្ហាញថា គាត់គឺជាបុរសម្នាក់ដែលត្រូវថតជាប់ខណៈពេលវាយដុំបាតុករនៅឯការជួបជុំទិវា May Day ដោយស្លៀកពាក់ជាប៉ូលិស។
ជំនួយការផ្នែកសន្តិសុខជាន់ខ្ពស់របស់លោក Macron អាយុ២៧ឆ្នាំរូបនេះបាននិយាយថា គាត់បានចូលរួមបាតុកម្មនោះក្នុងនាមជាអ្នកសង្កេតការណ៍ម្នាក់ហើយបានចូលជួយប៉ូលិសដើម្បីគ្រប់គ្រងការតវ៉ា។
អតីតអ្នកកាងក្នុងក្លិបរាត្រីរូបនេះត្រូវបានបណ្តេញចេញបន្ទាប់ពីត្រូវបានកំណត់អត្តសញ្ញាណនៅក្នុងវីដេអូនោះ។ លោក Benalla គឺជាប្រធាននៃក្រុមសន្តិសុខរបស់លោក Macron ក្នុងយុទ្ធនាការឆ្នាំ២០១៧និងនៅតែជាផ្នែកមួយនៃរង្វង់ខាងក្នុងរបស់ប្រធានាធិបតីក្រោយពីជ័យជំនះរបស់គាត់។
ដោយត្រូវបានគេចោទប្រកាន់ពីបទវាយដុំនិងក្លែងបន្លំជាមន្ត្រីប៉ូលិស, គាត់បាននិយាយពីដំបូងថា គាត់នឹងមិនអើពើនឹងការកោះហៅទៅព្រឹទ្ធសភាទេប៉ុន្តែក្រោយមកគាត់បានទទួលស្គាល់ថាគាត់ត្រូវបានបង្ខំដោយច្បាប់ដើម្បីឲ្យចូលរួម។
សំណួររបស់ព្រឹទ្ធសមាជិកមិនត្រូវបានគេរំពឹងថានឹងផ្តោតលើការវាយដុំនោះទេប៉ុន្តែជាការជីកកកាយទៅលើការងារផ្នែកខាងក្នុងនៃតំណែងប្រធានាធិបតីរបស់លោក Macron។
លោក Jean-Pierre Sueur សមាជិកគណបក្សសង្គមនិយមដែលទទួលបន្ទុកត្រួតពិនិត្យការងាររបស់គណៈកម្មាធិការនេះបាននិយាយថា “អ្វីដែលយើងចាប់អារម្មណ៍នោះគឺមុខងាររបស់រដ្ឋ”។
សមាជិកគណៈកម្មាធិការនេះចំនួនបីរូបមកពីគណបក្ស Republic on the Move (LREM) របស់លោក Macron បានប្រកាសផែនការធ្វើពហិការសវនាការថ្ងៃពុធដោយចោទប្រកាន់ព្រឹទ្ធសភាដែលត្រូវបានគ្រប់គ្រងដោយអ្នកសាធារណរដ្ឋស្តាំនិយមថា បានប្រើប្រាស់ប្រព័ន្ធតុលាការក្នុងចេតនាដើម្បីទទួលបានតំណែងប្រធានាធិបតី៕ AFP
Source: Kampuchea Thmey Daily
0 Comments