របាយការណ៍បានអះអាងកាលពីថ្ងៃសុក្រថា ពីរខែមុនការបោះឆ្នោតឆ្នាំ២០១៦ លោកប្រធានាធិបតី Donald Trump ត្រូវបានថតសំឡេង ខណៈដែលកំពុងពិភាក្សាអំពីការបង់ប្រាក់ដើម្បីបិទបាំងរឿងរ៉ាវដែលគេចោទប្រកាន់ជាមួយតារាម៉ូដែល Playboy ម្នាក់។
ការថតសំឡេងនេះត្រូវបានធ្វើឡើងដោយអតីតមេធាវីយូរអង្វែងរបស់គាត់ឈ្មោះ Michael Cohen ដែលកំពុងស្ថិតក្រោមការស៊ើបអង្កេតរបស់សហព័ន្ធក្នុងទីក្រុងញូវយ៉កសម្រាប់កិច្ចព្រមព្រៀងរបស់គាត់និងថាតើការបង់ប្រាក់របស់គាត់បានរំលោភបំពានច្បាប់ហិរញ្ញវត្ថុយុទ្ធនាការដែរឬទេ។
កាលពីថ្ងៃសុក្រ ប្រធានាធិបតីគណបក្សសាធារណរដ្ឋរូបនេះមិនបានឆ្លើយតបទៅនឹងសំណួររបស់អ្នកកាសែតអំពីការថតសំឡេងរបស់លោក Cohen ទេខណៈដែលគាត់បានរៀបចំខ្លួនដើម្បីជិះយន្តហោះចេញពីសេតវិមានធ្វើដំណើរទៅកាន់ក្លឹបវាយកូនហ្គោលរបស់គាត់នៅរដ្ឋ New Jersey។
កាសែត New York Times បានលាតត្រដាងរឿងរ៉ាវនេះដោយនិយាយថា FBI បានរកឃើញខ្សែអាត់សំឡេងក្នុងអំឡុងការវាយឆ្មក់មួយនៅការិយាល័យរបស់លោក Cohen កាលពីដើមឆ្នាំនេះ។ ទោះយ៉ាងណាក្តី លោក Cohen មិនទាន់ត្រូវបានចាប់ខ្លួនឬចោទប្រកាន់នៅឡើយទេ។
អតីតតារាម៉ូដែល Playboy នាង Karen McDougal អះអាងថា នាងមានទំនាក់ទំនងច្រើនខែជាមួយនឹងលោក Trump បន្ទាប់ពីពួកគេបានជួបគ្នាក្នុងឆ្នាំ២០០៦មិនយូរប៉ុន្មានបន្ទាប់ពីភរិយារបស់លោក Trump គឺលោកស្រី Melania បានផ្តល់កំណើតដល់កូនប្រុសឈ្មោះ Barron ។
កាសែត Wall Street Journal បានចុះផ្សាយថា ការសន្ទនាខែកញ្ញាឆ្នាំ២០១៦រវាងលោក Trump និងលោក Cohen គឺស្តីអំពីការទិញសិទ្ធិនៃរឿងរបស់នាង McDougal ដែលនាងបានលក់នៅមួយខែមុននោះទៅឲ្យសារព័ត៌មាន The National Enquirer ក្នុងតម្លៃ១៥០,០០០ដុល្លារ។
កាសែតនេះបានបិទបាំងដោយរារាំងវាពីការលេចធ្លាយជាសាធារណៈ។ ប្រធានក្រុមហ៊ុនមេរបស់ខ្លួនគឺ American Media គឺជាមិត្តភក្តិរបស់លោក Trump ។
របាយការណ៍កាលពីថ្ងៃសុក្របានលើកឡើងនូវសំណួរអំពីមូលហេតុដែលយុទ្ធនាការរបស់លោក Trump បដិសេធពីការដឹងឮនៃកិច្ចព្រមព្រៀងរវាងនាង McDougal និង American Media នៅពេលវាបញ្ចេញជាសាធារណៈក៏ដូចជាការរំពឹងទុករបស់អ្នកគាំទ្រអំពីការខូចខាតដែលលោក Cohen អាចបង្កឡើងចំពោះលោកប្រធានាធិបតីផងដែរ។
មេធាវីផ្ទាល់ខ្លួននាពេលបច្ចុប្បន្នរបស់លោក Trump គឺលោក Rudy Giuliani បានអះអាងទៅកាសែត New York Times ថា លោក Cohen ពិតជាមានខ្សែអាត់សំឡេងនោះមែនប៉ុន្តែអះអាងថា លោកប្រធានាធិបតីមិនបានធ្វើអ្វីខុសទេ៕ AFP
Source: Kampuchea Thmey Daily
0 Comments