បាត់ដំបង ៖ ផ្លូវនៅកណ្ដាលក្រុងបាត់ដំបង១ ខ្សែ បាន និង កំពុងចាប់ផ្តើមស្ថាបនាហើយដោយគម្រោងក្រាលកៅស៊ូនាពេលដ៏ខ្លីខាងមុខនេះ នេះបើតាមសម្តីរបស់លោកអភិបាលខេត្ត មានប្រសាសន៍ នាព្រឹកថ្ងៃទី២១ ខែកក្កដា ឆ្នាំ២០១៨នេះ ក្រោយពីផ្លូវ១ខ្សែ នេះបានទ្រុឌទ្រោមយ៉ាងខ្លាំង និងមានរណ្ដៅស្អេកស្កះស្ទើរតែប្រជាពលរដ្ឋធ្វើដំណើរលែងកើត។
គួរបញ្ជាក់ដែរថា ផ្លូវដែលមានសភាពខូចខាតយ៉ាងដំណំនេះ ស្ថិតនៅកណ្តាលសង្កាត់ស្វាយប៉ោ ដោយតភ្ជាប់ពីភូមិ២០ឧសភា ទៅភូមិកំពង់ក្របី ព្រមទាំងបានតភ្ជាប់ពីសង្កាត់ស្វាយប៉ោ ទៅកាន់សង្កាត់ទួលតាឯកផងដែរ ប៉ុន្តែកន្លងមក គឺមានរយៈពេលរាប់ឆ្នាំហើយ ដែលផ្លូវលេខ ១២១ នេះ ជួបនឹងការខូចខាតខ្លាំង។
បន្ទាប់ពីកម្ពុជាថ្មី បានចេញផ្សាយម្តងរួចមក គេសង្កេតឃើញថា ទាំងអាជ្ញាធរ ក៏ដូចជាអង្គភាពពាក់ព័ន្ធ បានចុះត្រួតពិនិត្យព្រមទាំងបានដាក់គ្រឿងចក្រអោយធ្វើការឈូសឆាយ និងពង្រាបជាបណ្តោះអាសន្ន ដើម្បីអោយប្រជាពលរដ្ឋអាចធ្វើដំណើរបានប្រចាំថ្ងៃសិន។
លុះនៅព្រឹកមិញនេះ ក្រុមការងារបានចុះសម្អាតផ្លូវដែលមានគម្រោងក្រាលកៅស៊ូនេះ ព្រមទាំងបានចាក់ក្រាលទ្រនាប់ជាបណ្តើរៗហើយ ក្រោយការពិនិត្យមើលរបស់ លោកងួន រតនៈ អភិបាល នៃគណអភិបាល ខេត្តបាត់ដំបង រួមជាមួយនឹងក្រុមការងារផង ដោយលោកបានមានប្រសាសន៍ថា ផ្លូវលេខ ១២១ នេះ គឺគម្រោងក្រាលកៅស៊ូ មានទំហំ ៨ ម៉ែត្រ គុណ ២៦០ ម៉ែត្រ តាមបែប DBST ដោយក្រាលកៅស៊ូ ២ ជាន់។
លោកអភិបាលខេត្តបានសង្កត់ធ្ងន់ថា ផ្លូវ១ខ្សែនេះ គឺជាផ្លូវដ៏សំខាន់ ដែលមានប្រជាពលរដ្ឋធ្វើដំណើរលើផ្លូវនេះយ៉ាងច្រើនជាទីបំផុត ដូច្នេះខេត្តបានសម្រេចអោយស្ថាបនាផ្លូវនេះមុនគេ ក្នុងចំណោមផ្លូវដែលមានការខូចខាតបន្តិចបន្តួចឯទៀតៗ។ ក្នុងនោះដែរក្រុមការងារបានសន្យាថា រយៈពេល២ថ្ងៃទៀត ផ្លូវនេះលែងជាផ្លូវដីទៀតហើយ ដោយសារតែការក្រាលកៅស៊ូ នឹងសម្រេចមួយរយភាគរយ៕
Source: Kampuchea Thmey Daily
0 Comments