ប៉ៃលិន ៖ ហេតុការណ៍គ្រោះថ្នាក់ចរាចរណ៍មួយរវាងម៉ូតូឌុបគ្នាទាំងស្រវឹង បុកជាមួយម៉ូតូអ្នកលក់ប្រហិត បណ្តាលឱ្យមនុស្ស០២នាក់ រងរបួសធ្ងន់/ស្រាល ត្រូវបានដឹកទៅសង្គ្រោះនៅមន្ទីរពេទ្យបង្អែកខេត្តប៉ៃលិនភ្លាមៗ។
ករណីខាងលើនេះ បានកើតឡើងកាលពីវេលាម៉ោង២០និង៥០នាទីយប់ ថ្ងៃទី២០ ខែកក្កដា ឆ្នាំ២០១៨ លើកំណាត់ផ្លូវជាតិលេខ៥៧ ត្រង់ចំណុចផ្លូវបំបែកជាបួន ក្នុងភូមិចំការកាហ្វេ សង្កាត់ទូលល្វា ក្រុងប៉ៃលិន ខេត្តប៉ៃលិន។
អ្នកបើកបរម៉ូតូបង្កឈ្មោះ ព្រហ្ម ជីវ័ន ភេទប្រុស អាយុ២៥ឆ្នាំ រងរបួសស្រាល ទី២ឈ្មោះ ណារ៉ូ ភេទ ប្រុស អាយុ២៥ឆ្នាំ ទាំងពីរនាក់រស់នៅភូមិបឌិននៀវ សង្កាត់ប៉ៃលិន ក្រុងប៉ៃលិន ខេត្តប៉ៃលិន។ចំណែកភាគីម៉ូតូលក់ប្រហិតមិនត្រូវបានស្គាល់អត្តសញ្ញាណនោះទេ។
បើតាមសាក្សីនៅកន្លែងកើតហេតុ បានឲ្យដឹងថា ៖ មុនពេលកើតហេតុគេឃើញបុរសពីរនាក់ បានជិះម៉ូតូមួយគ្រឿងម៉ាកMSX ពណ៌លឿង ខ្មៅ គ្មានស្លាកលេខ ក្នុងទិសដៅពីលិចមកកើត លើកំណាត់ផ្លូវជាតិលេខ៥៧ ក្នុងល្បឿនលឿន ទំនងជាស្រវឹង លុះមកដល់ចំណុចកើតហេតុត្រង់ផ្លូវបំបែកជាបួន ក៏បានបុកជាមួយម៉ូតូអ្នកលក់ប្រហិតពេញទំហឹង បណ្តាលឲ្យខ្ទាតម៉ូតូMSX ទៅបុកម៉ូតូមួយគ្រឿងផ្សេងទៀត រងរបួសធ្ងន់/ស្រាល។ ចំណែកភាគីម៉ូតូអ្នកលក់ប្រហិត មិនមានអ្នករងរបួសនោះទេ ប៉ុន្តែទូដាក់ប្រហិត ត្រូវបានបែកខ្ទេចអស់តែម្តង។
ប្រភពព័ត៌មាន បានបន្តថា ៖ ក្រោយពេលកើតហេតុ ភាគីម៉ូតូបង្កម៉ាកMSX ត្រូវបានជួយលើកគ្នា ដឹកទៅសង្គ្រោះនៅមន្ទីរពេទ្យបង្អែកខេត្តប៉ៃលិនភ្លាមៗ ដោយឡែកសមត្ថកិច្ចចរាចរណ៍ នៃស្នងការនគរបាលខេត្តប៉ៃលិន ក៏បានចុះដល់កន្លែងកើតហេតុ ដើម្បីធ្វើការវាស់វែង និងនាំយកម៉ូតូទាំងពីរគ្រឿង ទៅរក្សាទុកនៅការិយាល័យចរាចរណ៍ផ្លូវគោកខេត្តប៉ៃលិន រង់ចាំការដោះស្រាយគ្នាតាមផ្លូវច្បាប់។
តាមប្រភពព័ត៌មាន ពីសមត្ថកិច្ចចរាចរណ៍ផ្លូវគោក ខេត្តប៉ៃលិន បានឲ្យដឹងថា ៖ ករណីខាងលើបង្កមកពីភាគីម៉ូតូម៉ាកMSX ដែលអ្នកបើកបរផ្ទុកនូវសារធាតុស្រវឹង បើកបរក្នុងល្បឿនលឿន។ បច្ចុប្បន្នវត្ថុតាងម៉ូតូទាំង២ ត្រូវបានយកមករក្សាទុកនៅការិយាល័យចរាចរណ៍ផ្លូវគោកខេត្ត រង់ចាំដោះស្រាយគ្នាតាមនីតិវិធី៕
Source: Kampuchea Thmey Daily
0 Comments