ស្វាយរៀង ៖ ជនសង្ស័យម្នាក់ ត្រូវបានសមត្ថកិច្ច ស្រុកស្វាយទាប ឃាត់ខ្លួន ខណៈដែលក្លែងជានគរបាលបោកប្រាស់ស្រីស្នេហ៍យកម៉ូតូហុងដាឌ្រីម និងទូរស័ព្ទដៃ កាលពីថ្ងៃទី១៥ ខែកុម្ភៈ ឆ្នាំ២០១៩ នៅមុខផ្សារស៊ិនជូរី ខណ្ឌពោធិ៍សែនជ័យ រាជធានីភ្នំពេញ។
ឥឡូវ ត្រូវបានសមត្ថកិច្ចនគរបាលស្រុកស្វាយទាប ឃាត់ខ្លួនបានទាំងម៉ូតូ តាមបញ្ជារបស់លោកឧត្ដមសេនីយ៍ទោស្នងការ ដោយមានការសម្របសម្រួលពីលោកព្រះរាជអាជ្ញាអមសាលាដំបូងខេត្ត ក៏ដូចជាលោកវរសេនីយ៍ឯក អធិការនគរបាលស្រុកស្វាយទាបផងដែរ។
យោងតាមសមត្ថកិច្ចយើងបានឲ្យដឹងថា ជនសង្ស័យ ដែលសមត្ថកិច្ចឃាត់ខ្លួននោះមាន ឈ្មោះ រស់ ណាក់ រស់នៅឃុំ អង្គតាសូ ស្រុកស្វាយទាប ខេត្តស្វាយរៀង និងក្លែងជាមន្ត្រីនគរបាលជាតិ ឈ្មោះ ណាក់ វីរះ អត្តលេខ០៤០៦៨។ ចំណែកជនរងគ្រោះ មិនត្រូវបានគេប្រាប់ឲ្យស្គាល់ឈ្មោះនោះទេ ហើយបានស្គាល់គ្នាតាមfacebookជាមួយជនសង្ស័យខាងលើ បាន២ខែ ក៏ត្រូវប្រុសស្នេហ៍ បោកយកម៉ូតូ និងទូរស័ព្ទដៃទៅបាត់តែម្ដង។
ប្រភពបានបន្តទៀតថា ក្រោយពីកម្លាំងសមត្ថកិច្ចឃាត់ខ្លួន ជនសង្ស័យត្រូវបានកសាងសំណុំរឿងនិងប្រគល់ម៉ូតូជាវត្ថុតាង ទៅឲ្យសមត្ថកិច្ចខាងខណ្ឌពោធិ៍សែនជ័យ រាជធានីភ្នំពេញ នៅថ្ងៃទី២៣ ខែកុម្ភៈ ឆ្នាំ២០១៩កន្លងទៅនេះ។
សូមបញ្ជាក់ផងដែរថា សមត្ថកិច្ច បានឃាត់ជនសង្ស័យខាងលើ នៅថ្ងៃទី២២ ខែកុម្ភៈ ឆ្នាំ២០១៩ កាលពីវេលាម៉ោង១៦និង១៥នាទី ខណៈកំពុងអនុវត្តច្បាប់ចរាចរណ៍លើដងផ្លូវជាតិលេខ១ ស្ថិតក្នុងភូមិ ទួលអង្គុប ឃុំសំបួរ ស្រុកស្វាយទាប ខេត្តស្វាយរៀង៕
Source: Kampuchea Thmey Daily
0 Comments