គ.ជ.ប រៀបចំកិច្ចប្រជុំជាមួយភាគីពាក់ព័ន្ធស្តីពីការបិទផ្សាយបញ្ជីទីតាំងការិយាល័យបោះឆ្នោតនិងការចុះឈ្មោះបោះឆ្នោត

Cambodia News February 25, 2019

ភ្នំពេញ ៖ នៅវេលាម៉ោង១០ព្រឹក ថ្ងៃទី២៥ ខែកុម្ភៈ ឆ្នាំ២០១៩ គណៈកម្មាធិការជាតិរៀបចំការបោះឆ្នោត (គ.ជ.ប) បានរៀបចំកិច្ចប្រជុំជាមួយភាគីពាក់ព័ន្ធ ស្តីពីការបិទផ្សាយបញ្ជីទីតាំងការិយាល័យបោះឆ្នោត មុនពេលចុះឈ្មោះបោះឆ្នោត និងការចុះឈ្មោះបោះឆ្នោត ការបញ្ជាក់តាមឋានានុក្រម និងការបញ្ជូនមក គ.ជ.ប។

កិច្ចប្រជុំនេះ ធ្វើឡើងនៅសាលសន្និសីទសារព័ត៌មានជាន់ទី១ របស់ គ.ជ.ប ដែលស្ថិតនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ ក្រោមអធិបតីភាពលោក ហ៊ែល សារ៉ាត់ សមាជិក គ.ជ.ប និងជាប្រធានអង្គប្រជុំ ហើយអ្នកចូលរួមក្នុងកម្មវិធីនេះរួមមាន តំណាងក្រុមប្រឹក្សាធម្មនុញ្ញ តំណាងព្រឹទ្ធសភា និងរដ្ឋសភា តំណាងក្រសួងពាក់ព័ន្ធ តំណាងគណបក្សនយោបាយ តំណាងអង្គការមិនមែនរដ្ឋាភិបាលជាតិ និងអន្តរជាតិ តំណាងស្ថានទូតជប៉ុន អ្នកសារព័ត៌មានជាតិ និងអន្តរជាតិ។

ថ្លែងទៅកាន់អង្គប្រជុំ លោក ហ៊ែល សារ៉ាត់ បានលើកឡើងថា កិច្ចប្រជុំនេះធ្វើឡើងក្នុងគោលបំណង ដើម្បីផ្សព្វផ្សាយអំពីការបិទផ្សាយបញ្ជីឈ្មោះ ទីតាំងការិយាល័យបោះឆ្នោត ក្នុងគោលដៅរៀបចំបញ្ជីបោះឆ្នោត សម្រាប់ការិយាល័យបោះឆ្នោត ក្នុងក្រុង ស្រុក ខណ្ឌ នីមួយៗ។

តាមលោក ហ៊ែល សារ៉ាត់ មានការងារពីរដែល គ.ជ.ប ត្រូវរៀបចំចាត់ចែងក្នុងការត្រៀមបោះឆ្នោតជ្រើសរើសក្រុមប្រឹក្សា នាថ្ងៃទី២៦ ខែឧសភា ឆ្នាំ២០១៩ ខាងមុខនេះ ដែលការងារនោះរួមមាន ទី១. ការងារបិទផ្សាយបញ្ជីទីតាំងការិយាល័យបោះឆ្នោត ក្នុងគោលបំណងរៀបចំបញ្ជីបោះឆ្នោតដែលត្រូវធ្វើ នៅថ្ងៃទី២៥ ខែកុម្ភៈ ឆ្នាំ២០១៩ ខាងមុខ នៅ គធ/ខប និងនៅសាលប្រជុំឃុំ សង្កាត់ ទូទាំងប្រទេស និងមានការផ្សព្វផ្សាយនៅលើគេហទំព័ររបស់គជបផងដែរ។ ទី២. ដោយសារការបោះឆ្នោតនេះ ជាការបោះឆ្នោតអសកល គឺមានតែសមាជិកក្រុមប្រឹក្សាឃុំ សង្កាត់ ក្នុងតំណែងប៉ុណ្ណោះ ដែលជាអ្នកបោះឆ្នោតជ្រើសរើសក្រុមប្រឹក្សា ដូច្នេះការចុះឈ្មោះបោះឆ្នោត គឺត្រូវធ្វើនៅសាលប្រជុំឃុំ សង្កាត់ តាមរបៀបស្រង់ឈ្មោះបញ្ចូលទៅក្នុងបញ្ជីបោះឆ្នោត និងបញ្ជូនតាមឋានានុក្រមមក គ.ជ.ប។ កាលបរិច្ឆេទ នៃការចុះឈ្មោះបោះឆ្នោតត្រូវចាប់ផ្ដើមពីថ្ងៃទី០៤ ដល់ថ្ងៃទី២៧ ខែមីនា ឆ្នាំ២០១៩៕