អ្នកប្រដាល់ជើងចាស់ថ្មីរបស់កម្ពុជា២រូប គឺចាន់ ប៊ុនលាភ និង ចាន់ ចំរើន នឹងត្រូវជួបប្រកួតជាអ្នកប្រដាល់ថៃ នាយប់ថ្ងៃសៅរិ៍ ទី០២ ខែវិច្ឆិកា ឆ្នាំ២០១៨នេះ នៅលើសង្វៀនបាយ័នស្ទឹងមានជ័យ។
អ្នកប្រដាល់ជើងចាស់គឺ ចាន់ ប៊ុនលាភ ក្លិបនិរោធមានជ័យ ត្រូវគេផ្តល់ឳកាសអោយជួបប្រកួតជាមួយអ្នកប្រដាល់ថៃឈ្មោះឃុមផេត វ៉.ស៊ូដនឺន (Khumphetch vor. Suodneun)ដោយ ប្រកួតក្នុងទ ម្ងន់ ៦៧ គីឡូក្រាម។ អ្នកប្រដាល់ថៃនេះ ធ្លាប់មកប្រកួតនៅស្រុកខ្មែរប៉ុន្មានលើកហើយកន្លងមក ។
ឃុមផេត វ៉.ស៊ូដនឺន គេមានប្រវត្តិប្រកួតចំនួន៧១ លើកប៉ុណ្ណោះ ក្នុងនោះវាយឈ្នះ៥៧លើក ចាញ់១១លើក និងស្មើ០៣លើក។ នេះបើតាមអ្នកដឹកនាំកីឡាករថៃមកប្រកួតអោយដឹង។
ចាន់ ប៊ុនលាភ គេមានផ្លែល្អ ពិសេសគឺផ្លែកែង និងជង្គង់ ប៉ុន្តែអ្វីដែលគេបារម្ភជំនួសប៊ុនលាភ នោះ គឺខ្លាចតែចាញ់កម្លាំងស៊ុហ្វ ឃុមផេត មួយមុខប៉ុណ្ណោះ ។ចាន់ ប៊ុនលាភ មានប្រវត្តិប្រកួតមិនតិចក្រោម១០០លើកនោះទេ ប្រកួតជាមួយថៃលើកចុងក្រោយនេះ វាយចាញ់ Chhorkchai ក្នុងទឹកទី៣ កាលពីថ្ងៃទី០៥វិច្ឆិកា២០១៧ ។
ទោះជាយ៉ាងណា ចាន់ ប៊ុនលាភដែលជួបប្រកួតជាមួយថៃឃុមផេតនេះ គេមិនហ៊ានអះអាងមុនថា ប៊ុនលាភឈ្នះក្នុងការប្រកួតនេះទេ ។ ចាំមើល តើប៊ុនលាភឈ្នះឬមួយក៏ឃុមផេត ឈ្នះសម្រាប់ការជួបគ្នានេះ ? ។
ឃុមផេត គេល្អនិងវាយខ្លាំងគួរសមដែរ ។ អ្នកប្រដាល់ថៃរូបនេះ ជាម្ចាស់ខ្សែក្រវាត់ទៀតផង។គេមកប្រកួតនៅស្រុកខ្មែរលើកចុងក្រោយនេះ គឺវាយចាញ់មឿន សុខហ៊ុច អ្នកប្រដាល់ក្លិបពុទ្ធសេរីវង្សកីឡា ត្រឹមតែពិន្ទុប៉ុណ្ណោះ។
ចំពោះ អ្នកប្រដាល់ចាន់ ចំរើន ក្លិបនិរោធមានជ័យ នឹងត្រូវស្វាគមន៍អ្នកប្រដាល់ថៃឈ្មោះ ឆាមួកផេត ប្រាន២៦(Chamuakpetch Phran26) ដែលជាជើងខ្លាំងនៅស្រុកថៃ ។ពួកគេទាំងពីរ ជួបប្រកួតគ្នាក្នុងទម្ងន់៥៧គីឡូក្រាម។
គូនេះ គឺផ្ទុយគ្នាស្រឡះតែម្តង ដោយចាន់ ចំរើន ជាអ្នកប្រដាល់ដែលចាត់ទុកថា ជាជើងខ្លាំង ស្រករក្រោយ ព្រោះគេទើបតែជួបប្រកួតជាមួយអ្នកប្រដាល់បរទេសប៉ុន្មានលើកតែប៉ុណ្ណោះ ហើយក៏ជាអ្នកប្រដាល់ដែលមានបទពិសោធន៍ខ្ចីនៅឡើយដែរ។
ចាន់ ចំរើន មានប្រវត្តិប្រកួតប្រមាណ៥២លើកប៉ុណ្ណោះ ក្នុងនោះវាយឈ្នះ៣៥ ចាញ់១៧និងស្មើ០១លើក ហើយធ្លាប់ផ្តួលដៃគូអោយសន្លប់ចំនួន១២ ។ គេជាអ្នកប្រដាល់ជើងខ្លាំងស្រករក្រោយ ដោយមានចិត្តធំ កម្លាំងខ្លាំង វាយមិនសំចៃដៃឡើយ ។ ប៉ុន្តែយ៉ាងណាការប្រកួតលើកនេះ មិនដឹងថាចំរើនអាចយកឈ្នះ មួកផេត ប្រាន២៦ បានឬក៏អត់នោះទេ?។ ចំរើន ប្រកួតជាមួយថៃលើកចុងក្រោយនេះ វាយឈ្នះNuth Kor.Kesanon ដោយពិន្ទុ ។
មួកផេត ប្រាន២៦ ជាអ្នកប្រដាល់មានស្នៀតទាត់និងកណ្តាប់ដៃល្អ ។នេះបើតាមអ្នកដឹកនាំកីឡាករថៃអោយដឹង។ គេមិនធ្លាប់មកប្រកួតនៅស្រុកខ្មែរទេកន្លងមក ។ ទោះជាយ៉ាងណា ចាន់ ចំរើន មិនអាចមើលស្រាលចំពោះមួកផេត ប្រាន២៦ នេះឡើយ ។ចាំមើល រវាងចាន់ ចំរើន និង មួកផេត ប្រាន២៦ តើនរណាជាអ្នកឈ្នះនៅក្នុងការជួបគ្នានេះ ?។
ចំពោះការប្រកួតរវាងខ្មែរនិងខ្មែរវិញ ធិន សុវណ្ណ អ្នកប្រដាល់ក្លិបកងពលតូចលេខ៧០ ដែលបាត់មុខពីសង្វៀនប្រដាល់យូរមកហើយនោះ ពេលនេះត្រូវគេផ្គូឲ្យជួបប្រកួតជាមួយ អូន ចាន់ឡឹង អ្នកប្រដាល់ក្លិបកុសលកីឡា ។អ្នកប្រដាល់ទាំងពីរនាក់នេះ ប្រកួតគ្នាក្នុងទម្ងន់៦៩គីឡូក្រាម ។
ធិន សុវណ្ណ មិនធ្លាប់ជួប អូន ចាន់ឡឹង នោះទេកន្លងមក ។ ដូច្នេះចាំមើល ការជួបគ្នាលើកដំបូងនេះ តើធិន សុវណ្ណ អាចយកឈ្នះអូន ចាន់ឡឹង បានឬអត់? ។ ចំណែកម៉ិល សារុន អ្នកប្រដាល់ក្លិបអាណាចក្រគុនខ្មែរ ត្រូវគេផ្គូអោយជួបប្រកួតជាមួយ សាតស៊ីលាង អ្នកប្រដាល់ក្លិបកងពលតូចទ័ពឆ័ត្រយោង៩១១ ដោយប្រកួតគ្នាក្នុងទម្ងន់៦០គីឡូក្រាម៕
Source: Kampuchea Thmey Daily
0 Comments