ភ្នំពេញ ៖ យុវជនម្នាក់ បានស្លាប់ភ្លាមៗនៅនឹងកន្លែងកើតហេតុ និងយុវជន៣នាក់ទៀត ត្រូវរងរបួសធ្ងន់ធ្ងរ ដោយសារតែពួកគាត់បើកម៉ូតូបោះពួយបុកគ្នាពេញទំហឹងប៉ើងខ្ទាតមនុស្ស និងម៉ូតូរមូរចូលគ្នាខ្ទេចខ្ទីអស់បង្កជាការភ្ញាក់ផ្អើលកាលពីវេលាម៉ោង១និង០៥នាទីរំលងអធ្រាត្រឈានចូលថ្ងៃទី៣០ ខែកញ្ញា ឆ្នាំ២០១៨ នៅចំណុចផ្លូវប្រសព្វលេខ២៤៦ កែងផ្លូវសុធារស់ ក្នុងសង្កាត់ចតុមុខ ខណ្ឌដូនពេញ។
សមត្ថកិច្ចបានឲ្យដឹងថា គ្រោះថ្នាក់ចរាចរណ៍មួយ បានកើតឡើងរវាងម៉ូតូម៉ាកគ្លីកពាក់ស្លាកលេខ1AL4449ភ្នំពេញនិងម៉ូតូម៉ាកNEXពាក់ស្លាកលេខ1GN0927ភ្នំពេញ បណ្ដាលអោយមនុស្សស្លាប់ម្នាក់ឈ្មោះមឿនសុវណ្ណារ៉ា ភេទប្រុស អាយុ១៨ឆ្នាំ ស្នាក់នៅភូមិព្រែកតាគង់ សង្កាត់ព្រែកតាសេក ខណ្ឌជ្រោយចង្វា មុខរបរនៅផ្ទះ និងរបួសធ្ងន់០៣នាក់ ស្រីម្នាក់ សម្រាកព្យាបាលនៅគ្លីនិកហុងហាក់។
សមត្ថកិច្ចទៀតថា មូលហេតុបង្កម៉ូតូម៉ាកNexពាក់ស្លាកលេខ1GN0927ភ្នំពេញបើកបរមិនគោរពសិទ្ធិស្តាំ ទើបបណ្តាលឲ្យបុកគ្នាពេញទំហឹងស្លាប់និងរបួសដូច្នេះតែម្តង។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញភាគីម៉ូតូម៉ាកNexបើកឌុបនារីម្នាក់រួមដំណើរជាមួយធ្វើដំណើរតាមបណ្តោយផ្លូវសុធារសពីត្បូងទៅជើង លុះមកដល់ចំណុចកើតហេតុគាប់ជួនម៉ូតូម៉ាកClickបើកឌុបគ្នា២នាក់ដែរ ដែលបើកយ៉ាងលឿនដូចគ្នា ក៏បុកគ្នាពេញទំហឹងបណ្តាលឲ្យភាគីទាំងសងខាងត្រូវរងរបួសធ្ងន់ធ្ងរ៣នាក់ និងស្លាប់ម្នាក់នៅនឹងកន្លែងកើតហេតុតែម្តង។ ចំណែកម៉ូតូទាំង២គ្រឿងក៏រងការខូចខាតរមូរចូលគ្នាខ្ទេចខ្ទីស្ទើរទាំងស្រុងផងដែរ។
សមត្ថកិច្ចបញ្ជាក់ថា ករណីគ្រោះថ្នាក់ចរាចរណ៍នេះ បានប្រគល់អោយនគរបាលចរាចរណ៍ក្រុងចុះមកវាស់វែងយកម៉ូតូទាំង០២គ្រឿងទៅរក្សាទុកនៅការិយាល័យ ជើងគោករាជធានីភ្នំពេញ។រីឯសពជនរងគ្រោះត្រូវបានម្ដាយមកទទួលយកទៅធ្វើបុណ្យនៅផ្ទះក្នុងភូមិព្រែកតាគង់សង្កាត់ព្រែកតាសេកខណ្ឌជ្រោយចង្វាររាជធានីភ្នំពេញ៕
Source: Kampuchea Thmey Daily
0 Comments