ការប្រកួតពាក់កណ្តាលផ្តាច់ព្រ័ត្រដណ្តើមពានរង្វាន់ជើងឯក TV5 Knock Out Series by k.cement ទម្ងន់៦០គីឡូក្រាម លើសង្វៀន TV5 ព្រែកកំពឹស កាលពីយប់ថ្ងៃសៅរ៍ទី២៩ ខែកញ្ញា ឆ្នាំ២០១៨ លាភ រដ្ឋា អ្នកប្រដាល់ក្លិបដីឡូតិ៍មានរិទ្ធខេត្តបន្ទាយមានជ័យ និង លន បញ្ញា អ្នកប្រដាល់សមាគមកីឡាប្រដាល់ក្រសួងការពារជាតិ ពួកគេទាំងពីរនឹងត្រូវឡើងទៅជួបគ្នានៅក្នុងវគ្គផ្តាច់ព្រ័ត្រ បន្ទាប់ពីពួកគេបានវាយឈ្នះលើគូប្រកួតនោះក្នុងវគ្គពាក់កណ្តាលផ្តាច់ព្រ័ត្រនោះ។
លាភ រដ្ឋា គេបានវាយឈ្នះឡុង រ៉ាមី អ្នកប្រដាល់ក្លិបខ្លារខិនមានរិទ្ធដោយពិន្ទុបន្ទាប់ពីប្រកួតគ្នាបីទឹក ក្នុងមួយទឹកមាន៣នាទីនោះ។ លាភ រដ្ឋា គេឈ្នះឡុង រ៉ាមី ដាច់តែម្តង ដោយចៅក្រមទាំង៥រូប បានផ្តល់ពិន្ទុអោយរូបគេ(លាភ រដ្ឋា)ឈ្នះទាំងអស់គ្នា ។
ឡុង រ៉ាមី គេចាញ់នេះ គឺដោយសារគេចាញ់ចិត្តលាភ រដ្ឋា គេវាយរាងខ្លាចញញើតក្នុងការប្រកួតមួយទឹកដំបូង ដោយត្រូវរដ្ឋាដេញវាយក្រាបលើរេញជាញឹកញាប់ ។ តែមក ដល់ចុងទឹកទី២និងទឹកទី៣នោះ រ៉ាមី បានស៊ាំនឹងការប្រកួតនេះ ហើយបានវាយតទល់ជាមួយលាភ រដ្ឋា រហូតដល់ចប់ទឹកទី៣ និងចាញ់ត្រឹមពិន្ទុប៉ុណ្ណោះ ។
ចំណែក លន បញ្ញា គេបានផ្តួលលិញ ភារម្យ អ្នកប្រដាល់ក្លិបភារម្យគុនខ្មែរអោយចុះចាញ់នៅក្នុងទឹកទី៣ ក្នុងការប្រកួតពាក់កណ្តាលផ្តាច់ព្រ័ត្រនេះដែរ។ លន បញ្ញា គេបានយកឈ្នះលិញ ភារម្យ ក៏ដោយសារកម្ពស់ខ្ពស់ដែរ ។ ភារម្យ ត្រូវបញ្ញា ចាប់វាយជង្គង់និងទាត់ត្រូវឡើងចង់ទក់សាច់ ដែលនៅក្នុងទឹកទី១ត្រូវអាជ្ញាកណ្តាលរាប់៨ម្តង ទឹកទី២រាប់៨ម្តងទៀត និងដើមទឹកទី៣ ពេលដែលបញ្ញាវាយដួលទៀត អ្នកអោយទឹកក៏បោះកន្សែងសុំចុះចាញ់តែម្តង ធ្វើឲ្យបញ្ញា ឈ្នះលិញ ភារម្យក្នុងដើមទឹកទី៣នេះ ។
លាភ រដ្ឋា និង លន បញ្ញា បន្ទាប់ពីឈ្នះនេះ គេទាំងពីរនាក់ នឹងត្រូវប៉ះគ្នាក្នុងវគ្គផ្តាច់ព្រ័ត្រ ដើម្បីប្រជែងគ្នាដណ្តើមយកតំណែងជើងឯកពានរង្វាន់ TV5 Knock Out Series by K.cement ទម្ងន់ ៦០ គីឡូក្រាម ដែលអ្នកទទួលបានឋានៈជើងឯកនឹងទទួលបានប្រាក់រង្វាន់៤.០០០ដុល្លារ ហើយលេខ២ បាន២.០០០ដុល្លារនោះ ។
ចំណែក លិញ ភារម្យ គេក៏ឡើងទៅផ្តាច់ព្រ័ត្រដែរ តែក្នុងឋានៈប្រកួតដណ្តើមយកចំណាត់ថ្នាក់លេខ៣ប៉ុណ្ណោះ ជាមួយនឹងឡុង រ៉ាមីនោះ ។
ចំពោះការប្រកួតលក្ខណះមិត្តភាពអន្តរជាតិវិញ ធន់ មករា អ្នកប្រដាល់សមាគមកីឡាប្រដាល់ក្រសួងការពារជាតិ បានផ្តួលអ្នកប្រដាល់ថៃOry Sayam អោយសន្លប់ក្នុងទឹកទី៣ ដោយសារថ្វីកែងនិងជង្គង់របស់គេ ។
ចំណែក សំអាត សុវត្ថឌី អ្នកប្រដាល់ក្លិបកុលបុត្រគុនខ្មែរ បានវាយចាញ់ ធា នុរាជ អ្នកប្រដាល់ក្លិបមកុដរាជសីហ៍ដោយពិន្ទុ បន្ទាន់ពីវាយគ្នាប្រាំទឹកពេញនោះ ។ សំអាត សុវត្ថឌី ត្រូវបែកឈាមលើភ្នែកខាងស្តាំ ដោយសារកែងរបស់ធា នុរាជ៕
Source: Kampuchea Thmey Daily
0 Comments