តំណាងក្រុមបឹងកេតអែហ្វស៊ី ដែលជាបេក្ខភាពកំពុងប្រជែងជើងឯកក្នុងព្រឹត្តិការណ៍បាល់ទាត់លីគកំពូលកម្ពុជា (Metfone Cambodian League 2018) បានអះអាងថា ក្រុមខ្លួនត្រូវជ័យជម្នះនៅក្នុងប្រកួតដែលសល់ទាំង២លើកចុងក្រោយ ដោយមិនគិតពីលទ្ធផលរបស់ក្រុមគូប្រជែងណាហ្គាវើល ដែលកំពុងតែឈរកំពូលតារាងនាពេលបច្ចុប្បន្ននោះទេ។
លោក ហៅ សុជាតិ ដែលជាគ្រូបង្វឹកក្រុមបឹងកេត បានលើកឡើងថា «សម្រាប់យើង ២ប្រកួតចុងក្រោយនេះគឺជាសម្ពាធខ្លាំងមែនទែន ដោយសារ ២ប្រកួតចុងក្រោយយើងត្រូវការឈ្នះ ហើយក្រុមដែលយើងត្រូវប៉ះជាមួយសុទ្ធតែជាក្រុមខ្លាំងៗទៀត។ ដូចនេះពីរប្រកួតចុងក្រោយយើងត្រូវតែយកឈ្នះឲ្យបាន យើងអត់ខ្វល់ពីលទ្ធផលរបស់ណាហ្គាទេ ហើយចុងក្រោយទោះជាយើងបានពាន ឬមិនបាន ក៏យើងគិតថាលទ្ធផលនេះគឺល្អដែរ»។
ក្រុមបឹងកេត តាមរយៈ២០ប្រកួតមកនេះទើបតែស្គាល់បរាជ័យតែ២លើកប៉ុណ្ណោះ ពោលគឺធ្លាប់បានយកឈ្នះក្រុមអាស៊ីអឺរ៉ុប ៤ទល់៣ ហើយឈ្នះវេស្ទើនភ្នំពេញ ៣ទល់១ បន្តឈ្នះអគ្គស្នងការដ្ឋាននគរបាលជាតិ ៥ទល់១ តែស្មើសូលទីឡូអង្គរ ១ទល់១ ហើយយកឈ្នះក្រសួងការពារជាតិ ២ទល់០ ឈ្នះព្រះខ័នរាជស្វាយរៀង ៣ទល់១ ស្មើជាមួយអគ្គីសនីកម្ពុជា ១ទល់១ ឈ្នះអង្គរថាយហ្គឺរ ៤ទល់០ ឈ្នះភ្នំពេញក្រោន ៣ទល់២ ស្មើវិសាខា ១ទល់១ និងឈ្នះណាហ្គាវើល ៣ទល់២ នៅជើងទី១ ហើយឈ្នះអាស៊ីអឺរ៉ុប ៤ទល់០ ឈ្នះវេស្ទើនភ្នំពេញ ៥ទល់១ ឈ្នះអគ្គស្នងការដ្ឋាននគរបាលជាតិ ១ទល់០ និងឈ្នះសូលទីឡូអង្គរ ២ទល់១ ចាញ់ក្រសួងការពារជាតិ ២ទល់០ ឈ្នះវិសាខា ១ទល់០ ចាញ់ណាហ្គាវើល ២ទល់០ ឈ្នះព្រះខ័នរាជស្វាយរៀង ១ទល់០ និងឈ្នះអគ្គីសនីកម្ពុជា ៥ទល់០ ក្នុងជើងទី២។
ក្រុមបឹងកេត ត្រូវការជ័យជម្នះប្រកួតដែលនៅសល់ទាំងអស់ដើម្បីប្រជែងកៅអីពីក្រុមកំពូលតារាងណាហ្គាវើល មកវិញ ខណៈតាមការកំណត់របស់ CNCC ក្រុមដែលបញ្ចប់រដូវកាលមានពិន្ទុច្រើនជាងគេនោះនឹងឈ្នះជើងឯកប្រចាំឆ្នាំផងដែរ។ ប្រកួតនៅសល់ក្រុមបឹងកេត ត្រូវប៉ះក្រុមអង្គរថាយហ្គឺរ និងភ្នំពេញក្រោន។
ជារួមក្រុមបឹងកេត ប្រកួតឈ្នះ១៥លើក ស្មើគ្នា៣លើក និងចាញ់២លើក មាន៤៨ពិន្ទុក្នុងដៃ ទាត់ចូលទីគេចំនួន៤៩គ្រាប់ ហើយរបូត១៩គ្រាប់។ លោក ហៅ សុជាតិ ត្រូវក្លិបតែងតាំងឲ្យឈរឈ្មោះជាគ្រូបង្វឹកស្តីទីកាលពីរដូវកាលឆ្នាំ២០១៦ កន្លងទៅក្រោយការចាកចេញរបស់លោក ប្រាក់ សុវណ្ណារ៉ា ខណៈលោកបានចាប់ដៃជាមួយលោក កែវ កុសល ដឹកនាំក្រុមកាលពីដើមរដូវកាលក៏ដូចជាក្នុងយុទ្ធនាការប្រកួតវគ្គជម្រុះពានរង្វាន់ AFC Cup 2018។ កាលពីឆ្នាំចាស់លោកឈ្នះបានរង្វាន់គ្រូបង្វឹកឆ្នើមប្រចាំរដូវកាលពី CNCC ផងដែរ៕
Source: Kampuchea Thmey Daily
0 Comments