ភ្នំពេញ ៖ មនុស្សបីនាក់ រួមទាំងម្ចាស់ផ្ទះសំណាក់ម្នាក់ផងដែរ ត្រូវបានកម្លាំងនគរបាលខណ្ឌពោធិ៍សែនជ័យសហការជាមួយប៉ុស្ដិ៍នគរបាលកន្ទោកចុះទៅបង្ក្រាបចាប់ខ្លួនបានភ្លាម បន្ទាប់ពីមានសេចក្ដីរាយការពីប្រជាពលរដ្ឋល្អថាក្នុងផ្ទះសំណាក់ អូដមនោះ មានអ្នកសេពគ្រឿងញៀនជាញឹកញាប់ ដែលការបង្ក្រាបនេះធ្វើឡើង កាលពីវេលាម៉ោង១១និង៣០នាទីព្រឹកថ្ងៃទី១៩ ខែកញ្ញា ឆ្នាំ២០១៨នៅក្នុងផ្ទះសំណាក់ អូដឹម ស្ថិតនៅក្នុងភូមិកន្ទោកខាងជើង សង្កាត់កន្ទោក ខណ្ឌពោធិ៍សែនជ័យ។
មនុស្សដែលត្រូវឃាត់ខ្លួននោះ១ឈ្មោះ បែល វ៉ាន់ដា ភេទប្រុស អាយុ៣៨ឆ្នាំ ជាម្ចាស់ផ្ទះសំណាក់ខាងលើទី២ ឈ្មោះ ម៉ាក ស្រីនាង ភេទស្រីអាយុ២១ឆ្នាំមុខរបរបម្រើហាងខារ៉ាអូខេ និងទីឈ្មោះ ៣វ៊ិត វុទ្ធី ភេទប្រុស អាយុ២៩ឆ្នាំ មុខរបរមេការផ្ទះសំណាក់ខាងលើ។ នៅក្នុងខណៈនោះកម្លាំងនគរបាលបានដកហូតបានថ្នាំញៀន១កញ្ចប់ រួមជាមួយឧបករណ៍សម្រាប់ប្រើប្រាស់គ្រឿងញៀនមួយចំនួនទៀតផងដែរ។
នគរបាលបានឲ្យដឹងថា មុនពេលឈានដល់ការបង្ក្រាបខាងលើកម្លាំងនគរបាលបានធ្វើការស្រាវជ្រាវ និងទទួលបានព័ត៌មានថា មានការប្រើប្រាស់គ្រឿងញៀននៅក្នុងផ្ទះសំណាក់មួយនោះ បន្ទាប់មកកម្លាំងបានចុះទៅធ្វើការត្រួតពិនិត្យនិងឃាត់ខ្លួនជនសង្ស័យខាងលើនាំទៅសាកសួរនិងកសាងសំណុំរឿងនៅផ្នែកប្រឆាំងគ្រឿងញៀនខណ្ឌពោធិ៍សែនជ័យ។
ប្រភពបន្តថា ម្យ៉ាងទៀតនៅពេលចុះទៅដល់ផ្ទះសំណាក់នោះនគរបាលបានពិនិត្យបញ្ជីឈ្មោះដែលបានចូលស្នាក់នៅឃើញមានឈ្មោះលោកប៊ុត សីហា តារាចម្រៀងthe voice Cambodia ស្នាក់នៅក្នុងបន្ទប់ផ្ទះសំណាក់នោះរយៈពេល៤៨ថ្ងៃកន្លងមកហើយ ប៉ុន្តែខណៈនោះតារាចម្រៀងរូបនោះមិនបានស្ថិតនៅទីនោះឡើយ គឺចេញផុតមុននគរបាលទៅដល់បន្តិចហើយក៏មិនបានដឹងថា លោកមានជាប់ពាក់ព័ន្ធនិងគ្រឿងញៀន ឬ អត់នោះឡើយ។ នគរបាលបានឃាត់យកមកសាកសួរនិងកសាងឯកសារបញ្ជូនទៅផ្នែកព្រហ្មទណ្ឌខណ្ឌចាត់ការបន្ដតាមនីតិវិធី៕
Source: Kampuchea Thmey Daily
0 Comments