បើក​រថយន្ត​ប្រើ​ល្បឿន​ហួស​កម្រិត​ បុក​​អ្នក​ជិះ​ម៉ូតូ​ស្លាប់​ស្ត្រី​ម្នាក់

កំពង់ចាម​ ៖ ​គ្រោះថ្នាក់​ចរាចរណ៍​​ បង្ក​ដោយ​រថយន្ត​ដឹក​ដំឡូង និង​ម៉ូតូ​កាលពី​ថ្ងៃទី៣០​ ខែកញ្ញា​ ឆ្នាំ​២០១៨​ វេលា​ម៉ោង​៨​និង​១៥​​នាទី នៅ​ចំណុច ភូមិ​អណ្តូងច្រុះ ឃុំ​អំពិល ស្រុក​កំពង់សៀម ខេត្តកំពង់ចាម​ បាន​ធ្វើអោយ​ស្ត្រី អ្នក​បើក​ម៉ូតូ​ម្នាក់​ស្លាប់​យ៉ាង​អាណោចអាធ័ម​ ដោយ​សព​ក្លាយជា​កម្ទេច​សាច់​ដាច់​អវយវៈ​ចេញពី​គ្នា រីឯ​ក្បាល​ដែល​មាន​មួក​សុវត្ថិភាព​ជាប់​នៅ​ជាមួយ​ក៏​ដាច់​ចេញ​ពី​ក​ឃើញ​គួរ​ឲ្យ​តក់ស្លុត។

ប៉ូលិស​បានអោយដឹងថា ​ករណី​គ្រោះថ្នាក់​ចរាចរណ៍​ មួយ​នេះ កើតឡើង​ រវាង​រថយន្ត ម៉ូតូ និង រថយន្ត គឺ រថយន្ត​ម៉ាក ហាន់​ដាយ ពណ៌​ស​ពាក់​ស្លាក លេខ ព្រះសីហនុ 3A-5742 ​អ្នក​បើកបរ មិន​ស្គាល់ឈ្មោះ​​( រត់​បាត់​) បើកបរ​ក្នុង​ទិសដៅ​ពី​លិច​ទៅ​កើត​ក្នុង​ល្បឿន​លឿន​​ហួស​កម្រិត ​ក៏​បាន​បុក​ជាមួយ​ម៉ូតូ​ម៉ាក ហុងដា (​វ៉េវ​) ពណ៌​ខ្មៅ ពាក់​ស្លាក​លេខ កំពង់ចាម 1C-8103 បើកបរ​ដោយ​ឈ្មោះ ស្រ៊ន់ សាវឿន ភេទ ស្រី អាយុ 58​ឆ្នាំ មាន​ទីលំនៅ ភូមិ​ទី​7 ក្រុង​កំពង់ចាម ខេត្តកំពង់ចាម (​ពាក់មួក​សុវត្ថិភាព​) ហើយ​បាន​ជ្រុល​មក​បុក​គូថ​រថយន្ត​ម៉ាក តូ​យូ​តា​ហាយ​លែ​ន​ឌ័​រ ពណ៌​ទឹកមាស ពាក់​ស្លាក​លេខ​ភ្នំពេញ 2N-9895 បើកបរ​ដោយ​ឈ្មោះ ហ៊ាង សុភា ភេទ​ប្រុស អាយុ 41​ឆ្នាំ នៅ ភូមិ​ច្រាំង​ចំរេះ​១ ខណ្ឌ​ឫស្សីកែវ ភ្នំពេញ បើកបរ​ពី​លិច ទៅ​កើត។

ប៉ូលិស​បាន​បន្ត​ថា ​ករណី​នេះ​ បណ្ដាល​អោយ​ស្ត្រី​អ្នក​បើក​ម៉ូតូ​ ឈ្មោះ​ស្រន់ សាវឿន​ស្លាប់ នៅ​ក្រោម​រថយន្ត​ នៅនឹង​កន្លែង​កើតហេតុ។

ប៉ូលិស​បាន​បន្តថា រីឯ​វត្ថុតាង​ជំនាញ​បាន​យកមក​រក្សាទុក នៅ​អធិការដ្ឋាន​នគរបាល​ស្រុក​កំពង់សៀម ខេត្តកំពង់ចាម។

ចំណែក​សព បាន​ប្រគល់​អោយ​គ្រួសារ​យក​ទៅ​ធ្វើបុណ្យ​តាម​ប្រពៃណី។ រីឯ​អ្នកបើកបរ​រថយន្ត​ម៉ាក​ហាន់​ដាយ បាន​ទុក​រថយន្ត​ចោល​ ហើយ​រត់គេចខ្លួន​បាត់ ​ជំនាញ​កំពុង​ស្រាវជ្រាវ​ស្វែងរក​ជន​បង្ក៕
​

​

Source: Kampuchea Thmey Daily