រតនគិរី ៖ អញ្ជើញចូលរួមក្នុងការសំណេះសំណាលជាមួយក្រុមគ្រូពេទ្យបង្អែកអនុសាខាសមាគមន៍កម្ពុជាដើម្បីសន្តិភាព អភិវឌ្ឍន៍ និងយុវជនស្រឡាញ់សន្តិភាព នាព្រឹកថ្ងៃទី២៩ ខែកញ្ញា វេលាម៉ោង៨និង៣០នាទីនេះ លោកងិនណែលអភិបាលក្រុងបានលុង បានសង្កត់ធ្ងន់ៗថា អំពីការផ្សព្វផ្សាយគោលនយោបាយនិងយុត្តិសាស្ត្រដំណាក់កាលទី៤ របស់រាជរដ្ឋាភិបាលក្នុងអាណត្តិទី៦ នៃរដ្ឋសភាក្នុងនាមជាមន្ត្រីបម្រើឲ្យវិស័យសុខាភិបាលត្រូវមានស្មារតីទទួលខុសត្រូវខ្ពស់ក្នុងការព្យាបាលអ្នកជំងឺធានាបាននូវគុណភាពល្អ សេវាកម្មល្អ ប្រកបដោយភាពជឿជាក់ពីអ្នកជំងឺមកទទួលសេវាព្យាបាល។
លោកអភិបាលបានសង្កត់ធ្ងន់បន្ថែមទៀតថា ក្នុងនាមយើងជាលោកគ្រូ អ្នកគ្រូពេទ្យត្រូវ រៀបចំអាកប្បកិរិយាមារយាទ ទន់ភ្លន់សុភាពរាបសា ប្រកបដោយសីលធម៌វិជ្ជាជីវៈ មិនរើសអើង វណ្ណៈ ជាតិសាសន៍ឬនិន្នាការនយោបាយ បន្តខិតខំក្នុងការប្រតិបត្តិការផ្តល់សេវាសុខាភិបាលឲ្យសកម្ម និងយកចិត្តទុកដាក់ជាងមុនជូនដល់ប្រជាពលរដ្ឋ។
ពង្រឹងវិន័យការងារនិងកែប្រែទម្លាប់ការងារដោយផ្តើមចេញពីបុគ្គលម្នាក់ៗ ដើម្បីជំរុញការកែលំអគុណភាពសេវា និងធានាសេវា២៤hលើ២៤h។ ជំរុញការអភិវឌ្ឍបន្ថែមនូវហេដ្ឋារចនាសម្ព័ន្ធសុខាភិបាលសាធារណៈ។
លោកស្រី សេងចាន់បូរ ប្រធានប្រតិបត្តិសមាគមន៍នារីកម្ពុជាដើម្បីសន្តិភាពនិងការអភិវឌ្ឍភូមិសង្កាត់ទាំងបួនក្នុងក្រុងបានលុងបានពាំនាំនូវអំណោយដែលមាន សារុង ខោអាវកូនង៉ែត ក្រមា នំបុ័ង សំឡការី និងទឹកបរិសុទ្ធជាងមួយរយយូរដើម្បីចែកជូនផ្ទាល់ដៃដល់អ្នកជំងឺកំពុងសម្រាកព្យាបាលក្នុងមន្ទីរពេទ្យ។ ថ្លែងទៅកាន់ថ្នាក់ដឹកនាំក្រុងបានលុង ដែលមានវត្តមាននាពេលនោះលោកស្រី សេង ចាន់បូរ សំដែងការស្វាគមន៍និងសប្បាយរីករាយ អបអរសាទរយ៉ាងក្រៃលែងបំផុត។ លោកស្រីថា សមាគមន៍នារីកម្ពុជាដើម្បីអភិវឌ្ឈន៍ក្រុងបានលុងទើបប្រសូតឡើងមានរយៈពេលតែបីខែប៉ុណ្ណោះ រីឯសកម្មភាពដំណើរការក្នុងការចុះជួយជាសមាគមន៍ដល់ប្រជាពលរដ្ឋតាមមូលដ្ឋានបានចំនួន១២សកម្មភាពក្នុងនោះសកម្មភាពធំៗបានចំនួន២កន្លងមកនេះ។
លោកស្រីបន្តថា ថវិការទាំងអស់ដែលបានមកធ្វើសកម្មភាពទាំងនេះ គឺបានមកដោយសារការកៀងគរ ពីសប្បុរសជននិងសមាជិកសមាគមន៍នារីកម្ពុជា។
ដោយឡែក លោក ហ៊ីង ផានសុគន្ធា ប្រធានមន្ទីរពេទ្យបង្អែកខេត្តបានផ្តល់បទសម្ភាសន៍ចំពោះក្រុមអ្នកសារព័ត៌មានឲ្យដឹងអំពីតួលេខអ្នកជំងឺ ដែលកំពុងសំរាកព្យាបាលក្នុងមន្ទីរពេទ្យសព្វថ្ងៃទាំងក្មេងទាំងចាស់ បុរសនិងស្ត្រី មានចំនួនសរុប៩៧នាក់ ចំណែកស្ត្រីសម្រាលកូនក្នុងមន្ទីរពេទ្យ មានចំនួន១៧នាក់។ លោក ប្រធានសូមសំដែងនូវការអបអរសាទរ ចំពោះវត្តមានពីថ្នាក់ដឹកនាំបានយកចិត្តទុកដាក់លើវិស័យសុខាភិបាលជាពិសេស ក្រុមសមាគមន៍នារីកម្ពុជា ស្របពេលរដូវកាលបុណ្យភ្ជុំបិណ្ឌរបស់ជាតិ ដែលអ្នកជំងឺកំពុងព្យាបាលពុំមានឱកាសបានចេញទៅវត្តធ្វើបុណ្យដាក់ទាន និងជួបជុំក្រុមគ្រួសារនិងសាច់ញាតិនោះឡើយ៕
Source: Kampuchea Thmey Daily
0 Comments