រតនគិរី ៖ ជនសង្ស័យម្នាក់ បានរត់ទៅលាក់ខ្លួននៅឯស្រុកកំណើតរបស់ខ្លួន បន្ទាប់ពីបានធ្វើសកម្មភាពលួចយកម៉ូតូមួយគ្រឿងម៉ាកវ៉េវឆ្លាម ពណ៌ខ្មៅ អត់ស្លាកលេខកាលពីវេលាម៉ោង៣ទៀបភ្លឺ ឈានចូលថ្ងៃទី២៨ ខែកញ្ញា ឆ្នាំ២០១៨ នៅត្រង់ចំណុចការដ្ឋានទី៤ ក្នុងក្រុមហ៊ុនដូងប្រេងហ័ងអាញ់យ៉ាឡាយ(វៀតណាម) ស្ថិតនៅភូមិស្រែពកធំ ឃុំសិរីមង្គល ស្រុកកូនមុំ។
លោកវរសេនីយ៍ត្រី ជា សារិត អធិការរងទទួលផែនព្រហ្មទណ្ឌបានឲ្យដឹងថា ជនសង្ស័យ ឈ្មោះ តឿន ទី ភេទប្រុស អាយុ១៨ឆ្នាំ ជនជាតិខ្មែរ មានស្រុកកំណើតនៅភូមិច្រវ៉ាក់ដែក ឃុំឈូក ស្រុកក្រូចឆ្មា ខេត្តត្បូងឃ្មុំ បច្ចុប្បន្នរស់នៅភូមិ៣ ឃុំត្រពាំងក្រហម ស្រុកកូនមុំ ខេត្តរតនគិរី។ ជនសង្ស័យត្រូវសមត្ថកិច្ចតាមស្រាវជ្រាវរកឃើញកំពុងលាក់ខ្លួននៅស្រុកកំណើត កម្លាំងនគរបាលស្រុកកូនមុំក៏បានសហការជាមួយកម្លាំងនគរបាលប៉ុស្តិ៍ឃុំឈូក ឲ្យជួយរកនីតិវិធីលួងលោមឲ្យវិលត្រឡប់មកផ្ទះវិញ នៅពេលនោះ ជនសង្ស័យក៏ព្រមមកតាមពាក្យលួងលោមរបស់នគរបាលប៉ុស្តិ៍ឃុំឈូកដែរ។
លោកថា លុះមកដល់ផ្លូវបំបែកអូរពងមាន់ខេត្តស្ទឹងត្រែង បងប្អូនខាងជនរងគ្រោះ(ម្ចាស់ម៉ូតូ)បានរាយការណ៍មកសមត្ថកិច្ចជំនាញឲ្យចុះទៅចាំទទួលនៅប៉ុស្តិ៍ត្រពាំងក្រហម តែពេលនោះរថយន្តដែលជនសង្ស័យបានជិះនោះដឹកភ្ញៀវចូលទៅក្រុមហ៊ុនដូងប្រេងវៀតណាម។ បន្ទាប់ពីបានទៅដល់ក្រុមហ៊ុននោះ ស្រាប់តែជនសង្ស័យដូចដឹងខ្លួនទាន់ ក៏ចុះពីលើរថយន្តទៅបត់ជើងតូចក៏រត់គេចខ្លួនបាត់ ហើយបានបងប្អូនជនរងគ្រោះតេប្រាប់សមត្ថកិច្ចថា ជនសង្ស័យបានរត់រួចបាត់ទៅហើយ។ ពេលនោះកម្លាំងជំនាញរបស់អធិការស្រុកកូនមុំក៏បានឡើងទៅទប់ស្កាត់រកចាប់បានជនសង្ស័យ បន្ទាប់មកឃើញជនសង្ស័យកំពុងតែជិះម៉ូតូមកដល់ សមត្ថកិច្ចក៏ចាប់បានតែម្តងនៅវេលាម៉ោងប្រមាណ ៥ល្ងាចថ្ងៃទី២៨ ខែកញ្ញា ឆ្នាំ២០១៨ រីឯម៉ូតូដែលជនសង្ស័យយកទៅនោះបានបញ្ចាំគេនៅខេត្តក្រចេះចំនួនទឹកប្រាក់២៥០ដុល្លារ។
បច្ចុប្បន្នកម្លាំងអធិការដ្ឋាននគរបាលស្រុកកូនមុំបានយកមកឃុំខ្លួនបណ្តោះអាសន្ន និងកសាងសំណុំរឿងបញ្ជូនទៅអយ្យការអមសាលាដំបូងខេត្តចាត់វិធានការទៅតាមផ្លូវច្បាប់៕
Source: Kampuchea Thmey Daily
0 Comments