ភ្នំពេញ ៖ លោកជំទាវកិត្តិសង្គហបណ្ឌិតម៉ែន សំអន ឧបនាយករដ្ឋមន្ត្រីរដ្ឋមន្ត្រីក្រសួងទំនាក់ទំនងជាមួយរដ្ឋសភាព្រឹទ្ធសភានិងអធិការកិច្ច បានថ្លែងនូវការគាំទ្រនិងស្វាគមន៍ចំពោះក្រុមហ៊ុនឯកជនគ្រប់ប្រភេទដែលមកវិនិយោគនៅប្រទេសកម្ពុជា។
ការថ្លែងបែបនេះ ខណៈពេលដែលលោកជំទាវកិត្តិសង្គហបណ្ឌិតអញ្ជើញចូលរួមជាកិត្តិយសក្នុងកម្មវិធីសម្ពោធ ហាងកាហ្វេ អ៊ីនថះនីន និង សាឡន នាព្រឹកថ្ងៃច័ន្ទ ៧រោច ខែភទ្របទ ឆ្នាំ ច សំរឹទ្ធិស័ក ព.ស ២៥៦២ ត្រូវនឹងថ្ងៃទី១ ខែ តុលា ឆ្នាំ២០១៨។
លោកជំទាវកិត្តិសង្គហបណ្ឌិតថ្លែងថា ហាងកាហ្វេ បច្ចុប្បន្ន គឺជាទីពេញនិយមរបស់ប្រជាជន មិនថា តែនៅក្នុងប្រទេសកម្ពុជា ឬ ប្រទេសផ្សេងៗ ក្នុងពិភពលោក មិនថា ក្មេង មិនថាចាស់។ បច្ចុប្បន្ននេះ បណ្តាប្រទេសនៅខាងអឺរ៉ុប និងប្រទេសអភិវឌ្ឍមួយចំនួន តាមសិ្ថត្ថិ ដែលគេចងក្រងឡើងក្នុងឆ្នាំ ២០១៧ បង្ហាញអោយឃើញថា ការលក់កាហ្វេ មានការកើនឡើងរៀងរាល់ឆ្នាំ ដែលមួយឆ្នាំ ៗ កើនឡើងដល់ ២០ភាគរយ។
ដោយឡែក ភាគរយនៃអ្នកទទួលទានកាហេ្វនៅក្នុងប្រទេសកម្ពុជា ក៏មានច្រើន ហើយចំនួននេះនឹងកើនឡើងជារៀងរាល់ឆ្នាំ ដែលនឹងជំរុញឲ្យចំនួនហាងលក់កាហេ្វកើនផងដែរ ហើយដែលហាងខ្លះជាហាងក្នុងស្រុក ហាងខ្លះ ទិញសិទ្ធិធ្វើអាជីវកម្មពីបរទេស។
លោកជំទាវ កិត្តិសង្គហបណ្ឌិតបានថ្លែងនូវការកោតសរសើរចំពោះលោកស្រីយក់ សម្បត្តិ ដែលជាថៅកែក្រុមហ៊ុនបើកសម្ពោធហាងកាហ្វេអ៊ីនថះនីន និងសាឡន នេះឡើង ពិតជាបង្ហាញឱ្យឃើញពីភាពល្បីល្បាញរបស់សហគ្រិនកម្ពុជា។ ម្យ៉ាងទៀត ការបើកសហគ្រាសថ្មីនេះ ក៏ជាការរួមចំណែកមួយក្នុងការអភិវឌ្ឍសេដ្ឋកិច្ច តាមរយៈការបង់ពន្ធ និងបង្កើតការងារដល់សិស្ស និងនិស្សិតដែលបានបញ្ចប់ការសិក្សា ឬកំពុងសិក្សាក្នុងការរកចំណូលចិញ្ចឹមជីវិតឬរកចំណូលបន្ថែមសម្រាប់រៀនសូត្របន្ត។
រាជារដ្ឋាភិបាល នៃព្រះរាជាណាចក្រកម្ពុជា នីតិកាលទី៦នៃរដ្ឋសភា តាមរយៈយុទ្ធសាស្ត្រចតុកោណដំណាក់កាលទី ៤ មានចែងច្បាស់ពីការលើកស្ទួយវិស័យឯកជន រួមទាំងការគាំពារសហគ្រាសធុនតូចនិងមធ្យម និងចាត់ទុកជាសសរទ្រូងមួយ នៃការជំរុញកំណើនសេដ្ឋកិច្ចផងដែរ។
ទន្ទឹមនឹងនេះសូមគូសបញ្ជាក់ផងដែរថា សហគ្រិនកម្ពុជាដទៃទៀត មានកាលានុវត្តន៍ភាពធ្វើអាជីវកម្មបានរីកចម្រើនក៏ដោយសារគោលនយោបាយសេដ្ឋកិច្ចរបស់ប្រទេសយើង មានលក្ខណៈបើកទូលាយ សេរី មិនមានការរឹតត្បិត ហើយដែលសំខាន់គឺ ប្រទេសជាតិមានសុខសន្តិភាព និងមានការអភិវឌ្ឍ ប្រកបដោយនិរន្តរភាព។
បើប្រទេសជាតិមានសន្តិភាព ប្រជាជនមានឱកាសសិក្សា រៀនសូត្រ បង្កើននូវជំនាញថ្មីៗ ហើយមានឱកាសប្រើប្រាស់ជំនាញនោះក្នុងមុខរបរអាជីវកម្មរបស់ខ្លួនផងដែរ ដូច្នេះកត្តាសន្តិភាពគឺជាកត្តាសំខាន់បំផុត៕
Source: Kampuchea Thmey Daily
0 Comments