បាត់ដំបង ៖ ទីតាំងលក់ឆ្នោតយួនរាប់សិបកន្លែង ដែលស្ថិតនៅក្នុងស្រុកសំឡូត ត្រូវបានគេអះអាងថា មានការកាងយ៉ាងពេញទំហឹងពីសំណាក់លោកអធិការ កោ ស៊ុនកាំង នេះបើតាមការបំភ្លឺពីមេឆ្នោតមួយចំនួន ក្រោយពីមានកិច្ចប្រតិបត្តិការបង្ក្រាបរបស់កម្លាំងបង្ការ បង្ក្រាប នៃស្នងការដ្ឋាន នគរបាលខេត្ត កាលពីថ្ងៃទី២៩ ខែកញ្ញា ឆ្នាំ២០១៨ វេលាម៉ោង ១៥ រសៀល រួចមក។
នៅក្នុងកិច្ចប្រតិបត្តិការនេះដែរ សមត្ថកិច្ចដែលដឹកនាំដោយលោក ឈឿង គឹមសុងនាយរងការិយាល័យ នគរបាលព្រហ្មទណ្ឌកម្រិតស្រាល បានបែងចេកជាច្រើនមុខសញ្ញាព្រមទាំងបានឃាត់ខ្លួនមនុស្ស៤នាក់ ដែលជាមេឆ្នោតធំប្រចាំស្រុកសំឡូត គឺ គោលដៅទី១ នៅចំណុចផ្សារសុង ស្ថិតក្នុងភូមិ សុង១ ឃុំសុង ស្រុកសំឡូត ខេត្តបាត់ដំបង ដោយឃាត់បានមនុស្សម្នាក់ឈ្មោះ មាស យិន ភេទប្រុស អាយុ ៣៣ឆ្នាំ។ គោលដៅទី២ នៅចំណុចផ្សារតាសាញ ស្ថិតក្នុងភូមិទទឹម ឃុំតាសាញ ស្រុកសំឡូត ខេត្តបាត់ដំបង ឃាត់ខ្លួនបានមនុស្សម្នាក់ ឈ្មោះ ជុំ សាបាន ភេទប្រុស អាយុ ៥៥ឆ្នាំ។ គោលដៅទី ៣ នៅចំណុចផ្សារអក្សរតេ ស្ថិតក្នុងភូមិព្រៃធំ ឃុំកំពង់ល្ពៅ ស្រុកសំឡូត ខេត្តបាត់ដំបង ឃាត់ខ្លួនបានមនុស្សម្នាក់ឈ្មោះ គ្រី សុគន្ធ ភេទប្រុស អាយុ ៣៩ឆ្នាំ។ និងគោលដៅទី៤ នៅចំណុចភូមិកំពង់ល្ពៅ ឃុំកំពង់ល្ពៅ ស្រុកសំឡូត ខេត្តបាត់ដំបង ឃាត់ខ្លួនបានមនុស្សម្នាក់ឈ្មោះ ងឿន រីណា ភេទស្រី អាយុ ២៧ឆ្នាំ។
នៅក្នុងការបង្ក្រាបមេឆ្នោតទាំង៤ទីតាំងនេះ សមត្ថកិច្ចបានដកហូតនូវវត្ថុតាងមួយចំនួនរួមមាន ៖ ម៉ាស៊ីនគិតលេខចំនួន ០៥គ្រឿង ប៊ិចសរសេរចំនួន ០៧ដើម ក្រដាសដាន ចំនួន ០២សន្លឹក សៀវភៅកត់លេខឆ្នោតចំនួន ០៧ក្បាល ទឹកលុបចំនួន ០៤ដើមទូរស័ព្ទដៃម៉ាកសាំស៊ុង ចំនួន ០២គ្រឿង និង ប្រាក់ខ្មែរចំនួន ៨៧៣,៥០០រៀល ( ប្រាំបីសែន ប្រាំពីរម៉ឺន បីពាន់ ប្រាំរយរៀល)។
បើតាមការលួចខ្សឹបពីសំណាក់ប្រភពច្បាស់ការមួយបានអោយ កម្ពុជាថ្មី ដឹងថា រយៈកាលកន្លងមក គឺចាប់តាំងពីលោក កោ ស៊ុនកាំង ឡើងកាន់តំណែងជាអធិការ នគរបាល ស្រុកសំឡូត គឺលោកបានប្រើវិធីសាស្ត្រ និងល្បិចយ៉ាងច្រើនក្នុងការប្រមូលផលពីមេឆ្នោតនៅក្នុងស្រុកសំឡូតទាំងមូល នេះគ្រាន់តែនិយាយរឿងបទល្មើសល្បែងឆ្នោតតែម្យ៉ាងប៉ុណ្ណោះ ដោយមួយកន្លែងៗ ចាប់ពី ២០ ដុល្លារ រហូតដល់ ១០០ ដុល្លារ ទៅតាមទីកន្លែង តូច ឬ ធំ។
ប្រភពដដែលបានសង្កត់ធ្ងន់ថា ក្រោយមក នៅក្នុងរយៈពេលប្រមាណ ៣ ខែ ចុងក្រោយនេះ គឺមានមេឆ្នោតធំម្នាក់ឈ្មោះ ប៊ុន ចាន់តូ ដែលខ្លះបានស្គាល់ថា គេរស់នៅ ក្រុងបាត់ដំបង ខ្លះថានៅខេត្ត ប៉ៃលិន ដោយគេនោះប្រើប្រាស់រថយន្តរថយន្តលុចស៊ីស៤៧០ពណ៌ស បានចុះទៅទំនាក់ទំនងជាមួយលោកអធិការ ដើម្បីធ្វើការប្រមូលគ្រប់បណ្តាមេឆ្នោតទាំងអស់ដែលមាននៅក្នុងស្រុកសំឡូតអោយលក់ទៅអោយលោកអធិការ ដោយការប្រមូលផ្តុំមេឆ្នោតគឺគេបានធ្វើឡើងនៅតាមប៉ុស្តិ៍ នគរបាលរដ្ឋបាលគ្រប់ប៉ុស្តិ៍ក្នុងការចរចាគ្នាជាមួយមេឆ្នោត ជាថ្នូរនឹងការមិនចាប់ចង។
ចាប់តាំងពីពេលនោះមក មេឆ្នោតទាំងអស់ដែលមាននៅក្នុងស្រុកសំឡូតទាំងមូលលែងមានការព្រួយបារម្ភអំពីការរករឿង និងចាប់ឃាត់ខ្លួនពីសំណាក់សមត្ថកិច្ចទៀតហើយ ដោយសារតែមានការកាងយ៉ាងពេញទំហឹងពីសំណាក់លោក អធិការ កោ ស៊ុនកាំងដើម្បីទទួលបាននូវផលប្រយោជន៍ផ្ទាល់ខ្លួន។
បើទោះបីជាលោកអធិការរូបនេះ បានផ្តល់បទសម្ភាសន៍ថា លោកមិនដែលបានប៉ះពាល់លុយរបស់មេឆ្នោត ១ ម៉ឺនរៀលក៏ដោយ ក៏រឿងអាស្រូវរបស់លោក ត្រូវបានមេឆ្នោតមួយចំនួន ធ្វើការបកស្រាយគ្មានសល់នោះឡើយ ជុំវិញអំពើពុករលួយរបស់លោកដែលបានប្រព្រឹត្តិនៅក្នុងមូលដ្ឋាន ហើយក៏នៅមានរឿងដ៏ស្អុយរលួយជាច្រើនទៀត ដែលកម្ពុជាថ្មី ទើបទទួលបាន៕
Source: Kampuchea Thmey Daily
0 Comments