ភ្នំពេញ ៖ បុរសម្នាក់ បានស្លាប់ភ្លាមៗនៅនឹងកន្លែងកើតហេតុ បន្ទាប់ពីជិះម៉ូតូ ត្រូវឡានតាក់ស៊ីម៉ែត្រធុនតូចមួយគ្រឿងបើកកៀរឲ្យដួល ហើយបានខ្ទាតចូលក្រោមកង់ឡានធុនធំប្រភេទយីឌុបមួយគ្រឿងទៀត ដែលបើកមកប្រកៀកប្រកិតគ្នា បណ្ដាលឲ្យកិនជនរងគ្រោះស្លាប់ភ្លាមមួយរំពេច កាលពីវេលាម៉ោង៨និង៣០នាទីយប់ ថ្ងៃទី២០ ខែកក្កដា ឆ្នាំ២០១៨ នៅតាមបណ្ដោយផ្លូវសហព័ន្ធរុស្សីត្រង់ចំណុចមុខព្រលានយន្តហោះអន្តរជាតិភ្នំពេញ ស្ថិតនៅក្នុងភូមិក្បាលដំរី២ សង្កាត់កាកាប២ខណ្ឌពោធិ៍សែនជ័យ។
ជនរងគ្រោះមានឈ្មោះ សេង សុខុម ភេទប្រុស អាយុ៣៤ឆ្នាំ មុខរបរដើរម៉ៅផ្លែឈើតាមចម្ការយកលក់ឲ្យម៉ូយ រស់នៅភូមិព្រែកតានប់ឃុំកំពង់ស្វាយ ស្រុកកៀនស្វាយ ខេត្តកណ្ដាល។
រថយន្តយីឌុបម៉ាកFUSO ពណ៌ស ពាក់ស្លាកលេខភ្នំពេញ3B1898 បើកដោយបុរសម្នាក់ និងរួមដំណើរជាមួយព្រូម្នាក់ទៀតធ្វើដំណើរក្នុងទិសដៅពីកើតទៅលិច។ ចំណែកម៉ូតូរងគ្រោះម៉ាកហុងដាឌ្រីមសេ១២៥ ស៊េរីឆ្នាំ២០១៨ ពណ៌ខ្មៅ ពាក់ស្លាកលេខភ្នំពេញ.1GS995។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថា នៅមុនពេលកើតហេតុគេឃើញជនរងគ្រោះជិះម៉ូតូក្នុងទិសដៅពីកើតទៅលិចក្នុងល្បឿនលឿនមធ្យម ដោយជិះកណ្ដាលផ្លូវ បន្ទាប់មកបានប៉ះជាមួយរថយន្តតាក់ស៊ី ម៉ែត្រពណ៌ក្រហមមួយ គ្រឿងដែលបើកបរស្របទិសគ្នា ដោយរថយន្ដនោះ បានកៀរម៉ូតូជនរងគ្រោះឲ្យដួល រួចខ្ទាតទៅផ្នែកខាងឆ្វេង ត្រូវរថយន្តយីឌុប ដែលបើកបរមកប្រកៀកប្រកិតគ្នានោះ បានកិនត្រូវកង់ផ្នែកកណ្តាល បណ្តាលឲ្យជនរងគ្រោះស្លាប់ភ្លាមៗ ហើយរថយន្តតាក់ស៊ីម៉ែត្របានបើកគេចចេញពីកន្លែងកើតហេតុបាត់។ ចំណែករថយន្តយីឌុបព្យាយាម បើកចេញបានប៉ុន្មានម៉ែត្រ ត្រូវបានប្រជាពលរដ្ឋ និងអ្នករត់ម៉ូតូឌុបឃាត់រថយន្តបាន ប្រគល់ឲ្យសមត្ថកិច្ចភ្លាមៗផងដែរ។
បើតាមសមត្ថកិច្ចជំនាញចរាចរណ៍ខណ្ឌពោធិ៍សែនជ័យបានឲ្យដឹងថា សពជនរង គ្រោះមានស្នាមកិនចំផ្នែកចំហៀងខ្លួននិងប្រអប់ដៃ ចំណែកម៉ូតូជនរងគ្រោះមិនមានខូចខាតឡើយនៅស្អាតចែស. រីឯរថយន្តយីឌុបមានស្នាមប៉ះកង់កណ្តាលផ្នែកខាងស្តាំ។
ក្រោយពេលកើតហេតុកម្លាំងនគរបាលមូលដ្ឋានបានប្រគល់ភារៈនេះទៅឲ្យកម្លាំងការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញធ្វើការវាស់វែង យកម៉ូតូនិងរថយន្តទៅរក្សាទុករង់ចាំការដោះស្រាយគ្នាតាមច្បាប់។ ចំណែកសពជនរងគ្រោះក្រោយធ្វើកំណត់ហេតុរួចបានប្រគល់អោយក្រុមគ្រួសារយកទៅធ្វើបុណ្យតាមប្រពៃណីនៅឯស្រុកកំណើត៕
Source: Kampuchea Thmey Daily
0 Comments