ប្រភពមន្ទីរពេទ្យបាននិយាយថា បុរសម្នាក់ត្រូវបានសម្លាប់កាលពីថ្ងៃសៅរ៍នៅក្នុងបាតុកម្មថ្ងៃថ្មីនៅប្រទេសអ៊ីរ៉ាក់ ខណៈដែលអាជ្ញាធរបានតស៊ូដើម្បីទប់ស្កាត់ចលាចល ដែលបានឈានដល់រដ្ឋធានីបាដាដ។
ការស្លាប់ចុងក្រោយបំផុតនេះ បានធ្វើឲ្យចំនួនមនុស្សដែលត្រូវសម្លាប់ក្នុងការតវ៉ាឡើងដល់ប្រាំបួននាក់ ខណៈដែលប្រជាជនអ៊ីរ៉ាក់មានការខឹងសម្បាទៅលើបញ្ហាវិបត្តិសេដ្ឋកិច្ចសង្គម។
ប្រភពវេជ្ជសាស្ត្រមួយបាននិយាយថា បុរសដែលត្រូវបានសម្លាប់នោះគឺមានអាយុប្រហែល២០ឆ្នាំនិងបានស្លាប់ បន្ទាប់ពីត្រូវគេបាញ់ប្រហារនៅក្នុងទីក្រុង Diwaniyah ភាគ ខណៈមនុស្សរាប់រយនាក់បានប្រមូលផ្តុំគ្នានៅខាងក្រៅការិយាល័យកណ្តាលរបស់ក្រុមប្រដាប់អាវុធក្នុងតំបន់មួយ។
ប្រភពដដែលបានបន្ថែមទៀតថា ការបាញ់ប្រហារនេះគឺជាស្នាដៃរបស់ឆ្មាំម្នាក់មកពីអង្គភាព Badr ដ៏មានឥទ្ធិពលដែលគាំទ្រដោយប្រទេសអ៊ីរ៉ង់។
ភាពចលាចលបានផ្ទុះឡើងនៅខេត្ត Basra កាលពីថ្ងៃទី៨ខែកក្កដានៅពេលដែលកងកម្លាំងសន្តិសុខបានបើកការបាញ់ប្រហារដោយសម្លាប់មនុស្សម្នាក់នៅពេលអ្នកតវ៉ាទាមទារឲ្យមានការងារនិងសេវាមូលដ្ឋាន។
អ្នកផ្សេងទៀតដែលត្រូវបានសម្លាប់ក្នុងអំឡុងបាតុកម្មនៅខែនេះគឺត្រូវបានបាញ់ដោយពួកអ្នកវាយប្រហារដែលគេមិនស្គាល់មុខ។
កាលពីដើមសប្តាហ៍នេះ អាជ្ញាធរបាននិយាយថា បុគ្គលិកសន្តិសុខជាង២៦០នាក់បានរងរបួសនៅក្នុងការប៉ះទង្គិចគ្នាកំពុងបន្ត។
ខណៈពេលដែលប្រជាជនអ៊ីរ៉ាក់នៅភាគខាងត្បូងបានបន្តប្រមូលផ្ដុំគ្នាប្រឆាំងនឹងអំពើពុករលួយ ភាពអត់ការងារធ្វើ តម្លៃខ្ពស់ ការកាត់ផ្តាច់អគ្គិសនីនិងការខ្វះខាតទឹកស្អាតនោះ, បាតុករក៏បានប្រមូលផ្តុំគ្នានៅក្នុងរដ្ឋធានីបាដាដផងដែរកាលពីថ្ងៃសុក្រ៕ AFP
Source: Kampuchea Thmey Daily
0 Comments