ភ្នំពេញ ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា សមាគម និងអង្គការមិនមែនរដ្ឋាភិបាល ដែលមិនបានសុំចុះឈ្មោះ ជាអ្នកសង្កេតការណ៍ ចូលរួមសង្កេតការណ៍បោះឆ្នោតនៅ គ.ជ.ប មិនអាចធ្វើសកម្មភាពបំពេញការងារ និងចេញសេចក្ដីថ្លែងការណ៍វាយតម្លៃលើការបោះឆ្នោតបានឡើយ នេះបើតាមខ្លឹមសារសេចក្តីណែនាំ ដែលចេញដោយ គ.ជ.ប កាលពីថ្ងៃទី២០ ខែកក្កដា ឆ្នាំ២០១៨។
សេចក្តីណែនាំរបស់ គ.ជ.ប បានលើកឡើងថា ការសង្កេតការណ៍បោះឆ្នោត មានទិសដៅអោយសមាគម និងអង្គការមិនមែនរដ្ឋាភិបាល ពិនិត្យ និងមើលលើដំណើរការបោះឆ្នោត ដើម្បីប្រមូលទិន្នន័យសម្រាប់ធ្វើសេចក្តីថ្លែងការណ៍វាយតម្លៃលើភាពអាចទទួលយកបាននូវលទ្ធផលបោះឆ្នោត។ អនុលោមតាមមាត្រា១០ មាត្រា១១ មាត្រា១២ និងមាត្រា១៣ នៃច្បាប់ស្ដីពីការបោះឆ្នោតជ្រើសតាំងតំណាងរាស្ត្រ តម្រូវឲ្យសមាគម និងអង្គការមិនមែនរដ្ឋាភិបាល ដែលមានបំណងចូលរួមសង្កេតការណ៍ការបោះឆ្នោត ស្នើសុំចុះឈ្មោះជាអ្នកសង្កេតការណ៍នៅគណៈកម្មាធិការជាតិរៀបចំការបោះឆ្នោត ហើយត្រូវអនុវត្តតាមបទបញ្ជា និងនីតិវិធី របស់ គ.ជ.ប និងក្រមសីលធម៌សម្រាប់អ្នកសង្កេតការណ៍បោះឆ្នោតក្នុងដំណើរការបោះឆ្នោត។
តាមគោលការណ៍ខាងលើនេះ គ.ជ.ប បានធ្វើការណែនាំដល់សមាគម និងអង្គការមិនមែនរដ្ឋាភិបាលចំនួន៣ចំណុចរួមមាន ទី១, សមាគម និងអង្គការមិនមែនរដ្ឋាភិបាល ដែលបានស្នើសុំចូលរួមសង្កេតការណ៍បោះឆ្នោត ដែលត្រូវបានទទួលស្គាល់ដោយ គ.ជ.ប មានសិទ្ធិបំពេញការងារសង្កេតការណ៍ និងចេញសេចក្តីថ្លែងការណ៍វាយតម្លៃនូវការបោះឆ្នោត ស្របតាមច្បាប់បទបញ្ជា និងនីតិវិធី របស់ គ.ជ.ប និងក្រមសីលធម៌សម្រាប់អ្នកសង្កេតការណ៍បោះឆ្នោត ក្នុងដំណើរការបោះឆ្នោត។ ទី២, ក្នុងពេលចុះបំពេញការងារ ត្រូវពាក់ប័ណ្ណសម្គាល់ដែល គ.ជ.ប បានផ្ដល់ជូន ទី៣, សមាគម និងអង្គការមិនមែនរដ្ឋាភិបាល ដែលមិនបានសុំចុះឈ្មោះ ជាអ្នកសង្កេតការណ៍ចូលរួមសង្កេតការណ៍បោះឆ្នោតនៅ គ.ជ.ប មិនអាចធ្វើសកម្មភាពបំពេញការងារ និងចេញសេចក្តីថ្លែងការណ៍នានា ដែលអាចសន្និដ្ឋានបានថា ជាការវាយតម្លៃលើការបោះឆ្នោតបានឡើយ។
តាមគ.ជ.ប ដើម្បីអោយការបោះឆ្នោតប្រព្រឹត្តទៅបានដោយរលូន ល្អ តាមគោលការណ៍នៃការបោះឆ្នោតដោយ សេរី ត្រឹមត្រូវ និងយុត្តិធម៌ ស្របតាមច្បាប់ សមាគម និងអង្គការមិនមែន រដ្ឋាភិបាលត្រូវអនុវត្តតាមសេចក្តីណែនាំនេះឲ្យមានប្រសិទ្ធភាពខ្ពស់។
សូមបញ្ជាក់ថា ដំណើរការបោះឆ្នោតជ្រើសតាំងតំណាងរាស្ដ្រនីតិកាលទី៦ ឆ្នាំ២០១៨ នឹងប្រព្រឹត្តិទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខ ហើយការឃោសនារកសំឡេងឆ្នោត មានរយៈពេល២១ថ្ងៃ ដោយចាប់ពីថ្ងៃទី០៧ ខែកក្កដា ដល់ថ្ងៃទី២៧ ខែកក្កដា ឆ្នាំ២០១៨។ ជាមួយគ្នានេះ ការបោះពុម្ពសន្លឹកឆ្នោត ក៏ត្រូវបានបញ្ចប់ផងដែរ និងបានដឹកចេញពីរោងពុម្ព ទៅរក្សាទុកនៅក្នុងឃ្លាំងរបស់ គ.ជ.ប កាលពីថ្ងៃទី១៣ ខែកក្កដា ឆ្នាំ២០១៨ ហើយនឹងដឹកបន្តទៅកាន់ការិយាល័យបោះឆ្នោតទាំង២២៩៦៧ ការិយាល័យ ទូទាំងប្រទេស មិនឲ្យលើស៣៦ម៉ោងមុនថ្ងៃបោះឆ្នោត៕
Source: Kampuchea Thmey Daily
0 Comments