ពួកគេជឿថា ពួកគេមានសុវត្ថិភាព ប៉ុន្តែតំណក់ឈាមគឺជាបញ្ហាសម្រាប់ពួកគេ។ ១៥ឆ្នាំបន្ទាប់ពីការប្លន់នៅក្នុងហាងគ្រឿងអលង្ការបារាំង ជនល្មើស៤នាក់ត្រូវបានរកឃើញនៅក្នុងប្រទេសស៊ែប៊ី។
ប៉ូលិសអន្តរជាតិបាននិយាយថា ចន្លោះពីឆ្នាំ១៩៩៩ដល់ឆ្នាំ២០១៥ ឧក្រិដ្ឋជនទាំងនេះត្រូវបានគេគិតថាបានធ្វើការប្លន់ប្រដាប់អាវុធយ៉ាងតិច៣៨០លើកដោយសំដៅទៅលើហាងលក់គ្រឿងអលង្ការនានានិងប្រមូលលុយបានចំនួន៣៩១លានដុល្លារ។
នៅព្រឹកមួយក្នុងខែកញ្ញាឆ្នាំ២០០៣ បុរសពាក់ម៉ាស់មួយក្រុមបានសម្រុកចូលហាងគ្រឿងអលង្ការមួយនៅទីក្រុង Belfort ដែលជាទីក្រុងមួយស្ថិតនៅភាគខាងកើតប្រទេសបារាំងមានចម្ងាយត្រឹមតែ២៥គីឡូម៉ែត្រប៉ុណ្ណោះពីព្រំដែនប្រទេសស្វីស។
មនុស្សម្នាក់បានទាញកាំភ្លើងមួយដើមខណៈដែលអ្នកដទៃទៀតបានបំបែកកញ្ចក់ដោយចាប់យកគ្រឿងអលង្ការនិងនាឡិកាមានតម្លៃ៣៥០,០០០អឺរ៉ូមុនពេលភៀសខ្លួនក្នុងមួយនាទី។
ក្រោយមក ប៉ូលិសបានតាមចាប់ខ្លួនអ្នកសមគំនិតជាជនជាតិស៊ែប៊ី។ ប៉ុន្តែចោរទាំងនោះមិនដែលត្រូវបានចាប់ខ្លួននោះទេ។
ហើយពួកគេមិនដែលត្រូវបានកំណត់អត្តសញ្ញាណទេរហូតដល់ឆ្នាំ២០១៣បន្ទាប់ពីមានការរីកចម្រើនក្នុងការស៊ើបអង្កេតកោសល្យវិច្ច័យទៅលើដានឈាមនៅលើទូកញ្ចក់ នៅលើទូកែវនិងប្រអប់គ្រឿងអលង្ការ។
តាមរយៈការវិភាគ DNA ពួកគេបានកំណត់អត្តសញ្ញាណជនជាតិស៊ែប៊ីចំនួនពីរនាក់ដែលគេមិនស្គាល់នៅប្រទេសបារាំងប៉ុន្តែត្រូវតាមចាប់នៅប្រទេសអូទ្រីស។ ពួកគេមានឈ្មោះ Zica និង Boka ដែលអ្នកទាំងពីរមានអាយុ៤១ឆ្នាំ។
ហើយដោយឆ្លងកាត់កំណត់ត្រាទូរស័ព្ទ ពួកគេក៏បានរកឃើញជនសង្ស័យពីរនាក់ដែលសង្ស័យថាជាប់ពាក់ព័ន្ធនឹងការប្លន់នោះផងដែរ។ អ្នកទាំងពីរឈ្មោះ Sasa អាយុ៣៧ឆ្នាំនិង Luka អាយុ៤៨ឆ្នាំ។
អ្នកទាំងបួនគឺមកពីទីក្រុង Uzice ដែលធ្លាប់ជាទីក្រុងឧស្សាហកម្មរីកចម្រើនមួយមានចម្ងាយប្រហែល១៥០គីឡូម៉ែត្រភាគនិរតីទីក្រុង Belgrade ។
ទោះបីជាពួកគេត្រូវបានកំណត់អត្តសញ្ញាណក៏ដោយ អ្នកទាំង៤នៅតែមិនអាចទៅដល់ប្រព័ន្ធយុត្តិធម៌របស់បារាំងបានទេដោយសារតែប្រទេសស៊ែប៊ីមិនធ្វើបត្យាប័នពលរដ្ឋរបស់ខ្លួន៕ AFP
Source: Kampuchea Thmey Daily
0 Comments